ប្រធានគយដាស់តឿនអ្នកជិះម៉ូតូធំគ្មានពន្ធឱ្យចូលខ្លួនទៅបង់ពន្ធមុនការបង្ក្រាបអាចសម្រាលបន្ទុកខ្លះ

អ្នកជិះម៉ូតូធំៗគ្មានពន្ធ គឺជាមុខសញ្ញា ដែលអគ្គនាយកដ្ឋានគយ និងរដ្ឋាករកម្ពុជា ផ្ដោតលើការយកចិត្តទុកដាក់​ចុះបង្ក្រាប និងគ្រប់គ្រងពេលនាំចូលតាមព្រំដែន។ នេះបើតាមការបញ្ជាក់របស់លោក គុណ ញឹម រដ្ឋមន្ត្រីប្រតិភូ​អមនាយករដ្ឋមន្ត្រី និងជាអគ្គនាយកនៃអគ្គនាយកដ្ឋានគយ និងរដ្ឋាករកម្ពុជា ថ្លែងនៅក្នុងសន្និសីទសារព័ត៌មាន ដើម្បីបង្ហាញពីលទ្ធផលបិទបញ្ចប់នៃការងារ ប្រមូលពន្ធអាករលើរថយន្តគ្មានពន្ធ មានស្រាប់ក្នុងប្រទេស នៅអគ្គនាយកដ្ឋានគយ និងរដ្ឋាករកម្ពុជា នារសៀលថ្ងៃទី១២ ខែមករា ឆ្នាំ២០២៣។

លោក គុណ ញឹម បានលើកឡើងថា នៅតាមព្រំដែនគយ បានរឹតបន្តឹងប៉ុន្តែនៅតែមានការលួចនាំចូលបាន។ ត្រង់ចំណុចនេះ ប្រធានគយ បានគូសបញ្ជាក់ថា« នៅតាមព្រំដែនយើងដឹងហើយ ការរត់ពន្ធម៉ូតូមានជាហូរហែ ពិសេសការរត់ពន្ធម៉ូតូតាមច្រករបៀងគឺជាបញ្ហាស្មុគស្មាញដែលយើងពិបាកទប់ស្កាត់ឱ្យបាន ១០០ភាគរយ ទោះយើងទប់ស្កាត់បានច្រើន តែក៏នៅមានរបូតមកដែរ»។

ទន្ទឹមនឹងនេះដែរ គយក៏បានរឹតបន្តឹងត្រួតពិនិត្យ ការនាំចូលម៉ូតូធំ ពីប្រទេសឆ្ងាយៗ ដូចជា មកពីអឺរ៉ុប, ជប៉ុន, កូរ៉េ ដែលផ្ទុកក្នុងកុងតឺន័រផងដែរ។ បញ្ហានេះ លោក គុណ ញឹម បានឱ្យដឹងថា ការនាំចូលម៉ូតូ ដែលផ្ទុកក្នុងទូកុងតឺន័រ អគ្គនាយកដ្ឋានគយ និងរដ្ឋាករកម្ពុជា បានត្រួតពិនិត្យចោះៗមានន័យថា ១០តូកុងតឺន័រ អាចចុចឲ្យត្រួតពិនិត្យលម្អិត៥ទូ ឬ៦ទូ ដើម្បីទប់ស្កាត់ កុំឲ្យចំនួនម៉ូតូអត់ពន្ធគេចវេះបង់ពន្ធ នាំចូលមកក្នុងប្រទេស។

បើតាមលោក គុណ ញឹម ជាគោលការណ៍អគ្គនាយកដ្ឋានគយ និងរដ្ឋាករកម្ពុជា មិនមានការអនុគ្រោះពន្ធលើម៉ូតូ គ្មានពន្ធមានស្រាប់ក្នុងប្រទេសនេះទេ។

ជាក់ស្តែង កាលពីពេលថ្មីៗនេះ កម្លាំងគយ និងរដ្ឋាកររាជធានីភ្នំពេញ បានឆ្មក់ចុះពិនិត្យអនុលោមភាពម៉ូតូធំទំនើបៗ​ជាច្រើន ដែលប្រមូលផ្ដុំគ្នា នៅខណ្ឌជ្រោយចង្វារ ប្រមាណ ១៥០គ្រឿងគ្មានពន្ធ  ដែលគ្រោងធ្វើដំណើរកម្សាន្ដ ទៅខេត្តសៀមរាប ប៉ុន្ដែមិនទាន់បានចេញដំណើរផង ក៏ត្រូវសមត្ថកិច្ចគយចុះពិនិត្យឃាត់ទុក ដោយគេដឹងថា ម៉ូតូធំដែលគ្មានពន្ធទាំងនោះ ខ្លះមានតម្លៃរហូតដល់ខ្ទង់ម៉ឺនដុល្លារ៕