សេដ្ឋកិច្ច

កម្ពុជា-ជប៉ុន មានទំនាក់ទំនងកាន់តែរីកចម្រើនពិសេសលើវិស័យសេដ្ឋកិច្ច និងពាណិជ្ជកម្ម

បានផុស

៣ years មុន

នៅ

ថ្ងៃព្រហស្បតិ៍ ២ មីនា ២០២៣

ដោយ

ទំនាក់ទំនងរវាងកម្ពុជា និងជប៉ុន មានការរីកចម្រើន និងកាន់តែរឹងមាំពីមួយថ្ងៃទៅមួយថ្ងៃ ជាពិសេសទៅលើវិស័យសេដ្ឋកិច្ច និងពាណិជ្ជកម្ម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទំនាក់ទំនងរវាងប្រទេសទាំងពីរនឹងកាន់តែរឹងមាំបន្ថែមទៀត តាមរយៈការជំរុញអ្នកវិនិយោគ ទេសចរ ជប៉ុនមកកាន់កម្ពុជា និងជាពិសេសការពង្រឹកកិច្ចសហប្រតិបត្តិការលើវិស័យសេដ្ឋកិច្ច-ពាណិជ្ជកម្មបន្ថែមទៀត។ នេះជាការលើកឡើងរបស់លោក កឹម ស៊ីថន រដ្ឋលេខាធិការប្រចាំការ នៅក្នុងពិធីបើកនៃកម្មវិធី “Japanese Sake Tasting Fair” ដែលរៀបចំដោយអង្គការពាណិជ្ជកម្មក្រៅប្រទេសជប៉ុន (JETRO) កាលពីចុងខែ កុម្ភៈកន្លងទៅ។

លោក កឹម ស៊ីថន បានវាយតម្លៃខ្ពស់ចំពោះអង្គការ JETRO ដែលតែងតែផ្តល់ការគាំទ្រ និងផ្តល់កិច្ចសហការជិតស្និទ្ធជាមួយក្រសួងពាណិជ្ជកម្ម ក៏ដូចជាស្ថាប័នពាក់ព័ន្ធក្នុងពេលកន្លងមក ក្នុងទិសដៅពង្រីក និងពង្រឹងទំនាក់ទំនងធុរកិច្ច និងវិនិយោគរវាងប្រទេសទាំងពីរ។

លើកទឹកចិត្តឱ្យវិនិយោគិនកម្ពុជា និងជប៉ុន បង្កើនការទាញយកអត្ថប្រយោជន៍ពីកិច្ចព្រមព្រៀងពាណិជ្ជកម្មសេរីដែលកម្ពុជា និងជប៉ុនជាភាគីហត្ថលេខី ជាពិសេសកិច្ចព្រមព្រៀងពាណិជ្ជកម្មសេរីអាស៊ាន-ជប៉ុន និងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (អាសិប) ដែលនេះនឹងចូលរួមចំណែកសំខាន់ក្នុងការពង្រីកទំហំពាណិជ្ជកម្មនិងវិនិយោគទ្វេភាគី និងការអភិវឌ្ឍសេដ្ឋកិច្ចរបស់ប្រទេសទាំងពីរបន្ថែមទៀត។

លោករដ្ឋលេខាធិការ ក៏បានអររគុណចំពោះរាជរដ្ឋាភិបាលនិងប្រជាជនជប៉ុន ដែលតែងតែផ្តល់ជំនួយនិងការគាំទ្រកម្ពុជា ក្នុងការប្រយុទ្ធប្រឆាំងនឹងជំងឺកូវីដ-១៩ និងជាពិសេសការគាំទ្រកម្ពុជាក្នុងនាមជាប្រធានអាស៊ានឆ្នាំ២០២២ កន្លងទៅ ដោយកម្ពុជាទទួលបានលទ្ធផលជោគជ័យគួរជាទីមោទនៈ។

យោងតាមទិន្នន័យជញ្ជីងពាណិជ្ជកម្មអគ្គនាយកដ្ឋានគយ និងរដ្ឋាករកម្ពុជា បានបង្ហាញថា ក្នុងឆ្នាំ ២០២២ ការនាំចេញ-នាំចូលទំនិញរវាងកម្ពុជា និងជប៉ុន មានទឹកប្រាក់សរុប១៩៤៨,០១៩លានដុល្លារ កើនជាង១២ភាគរយបើធៀបនឹងឆ្នាំ ២០២១។ ក្នុងនោះ ការនាំចេញទំនិញពីកម្ពុជា ទៅជប៉ុនមានចំនួនជាង ១,១៧ ពាន់លានដុល្លារ៕