មន្រ្តីជាន់ខ្ពស់កម្ពុជា-វៀតណាម បង្កើនកិច្ចសហការ​លើវិស័យពាណិជ្ជកម្ម និងឧស្សាហកម្ម

លោ កឹម ស៊ីថន រដ្ឋមន្ត្រីស្តីទីក្រសួងពាណិជ្ជកម្ម បានអនុញ្ញាតឱ្យគណៈប្រតិភូក្រសួងឧស្សាហកម្ម និងពាណិជ្ជកម្មនៃសាធារណរដ្ឋសង្គមនិយមវៀតណាម ដឹកនាំដោយ លោក Chu Thang Trung អគ្គនាយករងអាជ្ញាធរឧបាស្រ័យពាណិជ្ជកម្ម និងសហការី​ ចូលជួបសម្តែងការគួសម និងពិភាក្សាការងារ នាកំឡុងពេលរូប លោក និងគណៈប្រតិភូអញ្ជើញបំពេញទស្សនកិច្ចការងារនៅព្រះរាជាណាចក្រកម្ពុជា។

ក្នុងជំនួបពិភាក្សារនេះ គឺដើម្បីពង្រឹងពង្រីកទំនាក់ទំនងរវាងក្រសួងពាណិជ្ជកម្មកម្ពុជា និងក្រសួងឧស្សាហកម្ម និងពាណិជ្ជកម្មវៀតណាម សំដៅធ្វើការរួមគ្នាក្នុងការគាំទ្រ និងជំរុញពាណិជ្ជកម្មទ្វេភាគីឱ្យកាន់​តែប្រសើឡើង​បន្ថែមទៀត។

លោក Chu Thang Trung បានលលើកឡើងអំពីលទ្ធផលទស្សនកិច្ចរយៈពេល ២ថ្ងៃ របស់រូបលោក និងគណៈប្រតិភូនៅកម្ពុជា កាលពីថ្ងៃទី ២៣ មីនា ដោយបានចុះបំពេញទស្សនកិច្ចស្វែងយល់លម្អិតពី​ខ្សែច្រវាក់​ផលិតកម្មមួយចំនួន រួមមាន៖ ការផលិត​ ការរក្សាទុក ការវេចខ្ចប់ និងការនាំចេញ, ទីតាំង បច្ចេកទេសដាំដុះ និងចម្ការ ចំពោះផលិតផលកសិកម្មមួយចំនួន របស់ក្រុមហ៊ុនធុរកិច្ចកម្ពុជា ក៏ដូចបានជួបប្រជុំចែករំលែកបទពិសោធន៍ និងផ្លាស់ប្តូរព័ត៌មានជាមួយអគ្គនាយកដ្ឋានសេវាពាណិជ្ជកម្មនៃក្រសួងពាណិជ្ជកម្ម លើការស្នើសុំ និងការចេញ​វិញ្ញាបនបត្របញ្ជាក់ដើមកំណើតទំនិញ (C/O) គ្រប់ទម្រង់។

លោ កឹម ស៊ីថន ​បានវាយតម្លៃខ្ពស់ចំពោះការអញ្ជើញមកបំពេញទស្សនកិច្ចការងារ​របស់គណៈប្រតិភូក្រសួង​ឧស្សាហកម្ម និងពាណិជ្ជកម្មវៀតណាម និងបានបង្ហាញនូវក្ដីសង្ឈឹមយ៉ាងមុតមាំថា តាមរយៈទស្សន​កិច្ចនេះនឹងជួយជំរុញឱ្យកិច្ចសហប្រតិបត្តិការរវាងក្រសួងទាំងពីរកាន់តែល្អប្រសើបន្ថែមទៀត ក៏ដូចជាចូលរួម​ចំណែកជំរុញប្រសិទ្ធភាពការធ្វើពាណិជ្ជកម្មរវាងប្រទេសទាំងពីរ ផងដែរ៕