CDC អនុម័តគម្រោងវិនិយោគមានទឹកប្រាក់ជាង​២៣០លានដុល្លារ រយៈពេល ៣ខែដើមឆ្នាំនេះ

នៅក្នុងរយៈពេល៣ខែ ដើមឆ្នាំ ២០២៣ ក្រុមប្រឹក្សាអភិវឌ្ឍន៍កម្ពុជា ដែលហៅកាត់ថា(CDC)បានអនុម័តគម្រោង​វិនិយោគ​ចំនួន៣៤ មានទុនវិនិយោគចំនួន ២៣២,៩ លានដុល្លារអាមេរិក ដោយបានបង្កើតការការជូនប្រជាពលរដ្ឋចំនួន ៤៦៥៨២កន្លែង។

ចំនួននេះបើធៀបទៅនឹងរយៈពេល៣ខែដូចគ្នា កាលពីឆ្នាំ២០២២កន្លងទៅ មានការថយចុះខណៈ៣ខែឆ្នាំ២០២២ CDC អនុម័តគម្រោងវិនិយោគ រហូតដល់ទៅ ៤០ក្រុមហ៊ុនមានទុនវិនិយោគជាង ២៣៨០លានដុល្លារអាមេរិក និងផ្តល់ការងារ​ជូនប្រជាពលរដ្ឋចំនួន៣៤៤៥៨កន្លែង។

យោងតាមរបាយការណ៍ប្រចាំថ្ងៃរបស់ក្រុមប្រឹក្សាអភិវឌ្ឍន៍កម្ពុជាបានឱ្យដឹងថា ក្នុងចំណោមគម្រោងវិនិយោគ ៣៤ក្នុងនោះ ក្នុងខែមករាឆ្នាំ២០២៣ មានគម្រោងវិនិយោគចំនួន១០ មានទុនវិនិយោគចំនួន ៩៩,៤លានដុល្លារអាមេរិក ខណៈខែមករាឆ្នាំ២០២២មានគម្រោងវិនិយោគចំនួន២៤មានទុន២២៧៧លានដុល្លារអាមេរិក។

ចំណែកខែកម្ភៈឆ្នាំ២០២៣ មានគម្រោងវិនិយោគចំនួន ១៧ មានទុន ៩៨,៨លានដុល្លារអាមេរិក និងផ្តល់ឱកាសការ​ងារជូន​ប្រជា​ពលរដ្ឋបានចំនួន ២២៧៨៤កន្លែង ខណៈខែកម្ភៈ ឆ្នាំ២០២២ មានគម្រោងវិនិយោគចំនួន ១២មានទុនចំនួន៩០លានដុល្លារអាមេរិក និងផ្តល់ឱកាសការងារជូនប្រជាពលរដ្ឋចំនួន១១៥៥៣កន្លែង។

រីឯខែមីនាឆ្នាំ២០២៣វិញមានគម្រោងវិនិយោគចំនួន ៧មានទុនចំនួន ៣៣,៧លានដុល្លារអាមេរិក និងផ្តល់ឱកាសការងារ​ជូនប្រជាពលរដ្ឋចំនួន៦៦៦៩កន្លែងខណៈខែ មីនាឆ្នាំ២០២២មានគម្រិងវិនិយោគចំនួន៤មានទុនចំនួន១៣​លានដុល្លារ​អាមេរិកនិងផ្តល់ឱកាសការងារជូនប្រជាពលរដ្ឋប្រមាណជិត៣០០០កន្លែង។

សូមបញ្ជាក់ថា គម្រោងវិនិយោគទាំងអស់នេះ ភាគច្រើនវិនិយោគលើវិស័យរោងចក្រកាត់ដេរសម្លៀកបំពាក់ ស្បែកជើង និងសម្ភារៈធ្វើដំណើរជាដើម។ សម្រាប់ទីតាំងដែលទទួលបានគម្រោងវិនិយោគច្រើនជាងគេ គឺនៅភាគខាងលិចរាជ​ធានីភ្នំពេញ ជាពិសេសនៅខេត្តកំពង់ស្ពឺ។

អ្នកជំនាញសេដ្ឋកិច្ច បានលើកឡើងថា តាមរយៈការវិនិយោគលើវិស័យរោងចក្រនេះ បានផ្តល់ប្រយោជន៍ច្រើនសម្រាប់​សេដ្ឋកិច្ចកម្ពុជា និងផ្តល់ឱកាសការងារជូនពលរដ្ឋដោយផ្ទាល់ និងប្រយោលផងដែរ៕

អត្ថបទ៖ សំអឿន