រយៈពេល ៩ ខែ ឡាវ មានទេសចរបរទេសមកកម្សាន្តជាង ២.៤ លាននាក់ កើន ២៨៥ ភាគរយ

រដ្ឋមន្ត្រីក្រសួងព័ត៌មាន វប្បធម៍ និងទេសចរណ៍ឡាវលោកស្រី សួនសុវណ្ណ វិយាកេត បាននិយាយថា ក្នុងរយៈពេល ៩ ខែដំបូងនៃឆ្នាំ ២០២៣ នេះ ប្រទេសឡាវទទួលបានលំហូរភ្ញៀវទេសចរបរទេសជាង ២.៤ លាននាក់ ពោលគឺកើនឡើងប្រមាណ ២៨៥ ភាគរយ បើប្រៀបធៀបនឹងរយៈពេលដូចគ្នាកាលពីឆ្នាំមុន ។

លោកស្រីបានឲ្យដឹងទៀតថា ក្នុងចំណោមភ្ញៀវទេសចរជាង ២.៤ លាននាក់នេះ បណ្តាប្រទេសអាស៊ានបានចូលរួមចំណែកជាង ១.៦ លាននាក់ ខណៈផ្សេងទៀតមកពីតំបន់អាស៊ីប៉ាស៊ីហ្វិក អឺរ៉ុប និងសហរដ្ឋអាមេរិក ។

កំណើនទេសចរនេះ ត្រូវ​បាន​គេ​សន្មត់ថា ដោយសារតែ​ហេដ្ឋារចនាសម្ព័ន្ធដឹកជញ្ជូនល្អប្រសើរ​ ជាពិសេស​ផ្លូវដែក​ ឡាវ-ចិន ដែល​បាន​ក្លាយ​ជា​មធ្យោបាយ​ធ្វើ​ដំណើរ​ដ៏​ពេញ​និយម ខណៈនៅបំណាច់ឆ្នាំ ២០២៣ នេះ ឡាវរំពឹងនឹងមានភ្ញៀវទេសចរបរទេសកើនឡើងពីជាង ២ លាននាក់ ដល់ជាង ៣ លាននាក់ ។

ដោយឡែកសម្រាប់ឆ្នាំ ២០២៤ ឡាវ​កំណត់គោលដៅទេសចរប្រមាណ ៤.៦ លាននាក់ដើម្បីបង្កើនប្រាក់ចំណូល ៧១២ លានដុល្លារពីវិស័យទេសចរណ៍ ។

ជាចុងក្រោយលោកស្រីបញ្ចាក់ថា ដើម្បីឆ្លើយតបនឹងការកើនឡើងនៃចំនួនភ្ញៀវទេសចរបរទេសនេះ រដ្ឋាភិបាលបានលើកទឹកចិត្តដល់ភ្នាក់ងារបម្រើសេវាកម្មទេសចរណ៍ និងលើកកម្ពស់វិស័យទេសចរណ៍ក្នុងប្រទេសឡាវ ដោយគិតគូរពីទេសចរណ៍ធម្មជាតិ វប្បធម៌ ប្រវត្តិសាស្ត្រ និងកសិកម្ម ឲ្យមានការរីកចម្រើនកាន់តែខ្លាំងឡើងជាបន្តបន្ទាប់ ជាពិសេសធ្វើយ៉ាងណាឲ្យមាននិរន្តរភាពតាមរយៈការចូលរួមពីប្រជាជនទាំងអស់គ្នា និងសង្គមទាំងមូល ដោយផ្តោតលើការស្តារវិស័យទេសចរណ៍ឡើងវិញ ៕

ប្រែសម្រួល៖ នាង រតនៈ

ប្រភព៖​ Laotian Times