ថៃ ទំនងជាងបាត់ចំណូលជាង ៨ ពាន់លានដុល្លារពីគោលដៅទេសចរណ៍

ថៃ​ទំនងជាបាត់បង់ចំណូលជាង ៨.៤ ពាន់លានដុល្លារពី​ចំណូលគោលដៅវិស័យទេសចរណ៍របស់ខ្លួនសរុបចំនួន​ ២.០៧​ ពាន់ពាន់លានបាត ឬប្រហែលនឹង ៥៨.៧ ពាន់លានដុល្លារនៅក្នុងឆ្នាំ ២០២៣ នេះ ។

ប្រធានអាជ្ញាធរទេសចរណ៍ថៃ លោកស្រី Thapanee Kiatphaibool បាននិយាយថា ចំនួនភ្ញៀវបរទេសនៅឆ្នាំនេះ មានលើសពី ២៥ លាននាក់ គិតត្រឹមដើមខែធ្នូ ប៉ុន្តែប្រាក់ចំណូល​ពីការមកដល់របស់ភ្ញៀវបរទេសមានត្រឹមតែ ៣០ ពាន់លានដុល្លារប៉ុណ្ណោះ ពោលគឺទាបជាងគោលដៅរបស់រដ្ឋដែលមានចំនួនជាង ៤៥ ពាន់លានដុល្លារសម្រាប់ពេញមួយឆ្នាំ ។

សម្រាប់បំណាច់ខែធ្នូនេះ ទីភ្នាក់ងារទេសចរណ៍ប៉ាន់ប្រមាណថា នឹងមានភ្ញៀវទេសចរបរទេសចំនួន ២ លាននាក់ ជាមួយនឹងការចំណាយសរុបក្នុងអំឡុងពេលពិធីបុណ្យ រំពឹងនឹងទទួលបានចំណូលចន្លោះពី ៣៣ ទៅជិត ៣៦ ពាន់លានដុល្លារ ។

ទន្ទឹមនឹងនេះ លោកស្រី Thapanee បាននិយាយថា ការចំណាយក្នុងចំណោមភ្ញៀវបរទេសគឺមានជាង ១ ពាន់ដុល្លារ ក្នុងការធ្វើដំណើរម្តង គឺខ្ពស់ជាងកម្រិតដែលបានកត់ត្រាមុនការរាតត្បាតនៃកូវីដ ប៉ុន្តែទាបជាងការព្យាករណ៍ដែលចំនួន ១,៤០០ ដុល្លារ ។

ដោយឡែកសម្រាប់ទេសចរណ៍ក្នុងស្រុកវិញ មានការធ្វើដំណើរ​ចំនួន ២២៨ លានដងក្នុងឆ្នាំនេះ គឺលើសពីគោលដៅរបស់រដ្ឋដែលមានចំនួន ២២០ លានដង ខណៈត្រឹមដំណាច់ឆ្នាំនេះ អ្នកដំណើរជនជាតិថៃត្រូវបានគេរំពឹងថា នឹងធ្វើដំណើរបានចំនួន ២៤០ លានដង បង្កើតចំណូលបានជាង​ ២២ ពាន់លានដុល្លារ ។

គួរបញ្ជាក់ថា ប្រាក់ចំណូលពីវិស័យទេសចរណ៍របស់ប្រទេសថៃនៅឆ្នាំនេះ ត្រូវបានគេទម្លាក់ការព្យាករណ៍មកត្រឹម ៥៨.៧ ពាន់លានដុល្លារពីគោលដៅជាង ៦៧ ពាន់លានដុល្លារ ៕

ប្រែសម្រួល៖ នាង រតនៈ

ប្រភព៖ Bangkok Post