​កម្មវិធីហិរញ្ញវត្ថុគាំទ្រការវិនិយោគដាក់ឱ្យដំណើរការជាផ្លូវការដើម្បីគាំទ្រដល់សហគ្រាសកែច្នៃជលផល​

កម្មវិធីហិរញ្ញវត្ថុគាំទ្រការវិនិយោគ (ISF) ត្រូវបានដាក់ឱ្យដំណើរការនៅថ្ងៃទី ២៩ ខែឧសភា ឆ្នាំ ២០២៤ នេះ ដោយអង្គការ UNIDO រដ្ឋបាលជលផល និងសាជីវកម្មធានាឥណទានកម្ពុជា ដើម្បីជំរុញកំណើនក្នុងវិស័យជលផលក្រោយប្រមូលផលនៅកម្ពុជា។

​លោក ពុំ សុថា ប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានរដ្ឋបាលជលផល មានប្រ​សាសន៍ថា គម្រោងអភិវឌ្ឍជលផលក្រោយប្រមូលផល នៃកម្មវិធី CAPFISH-Capture បានដាក់ឱ្យ​ដំណើរ​ការនូវយន្ត​ការគាំទ្រសហគ្រាស​ផលិតផល​ជំហានទី២ គឺកម្មវិធីហិរញ្ញវត្ថុ​គាំទ្រ​ការវិនិយោគ (ISF) ដែលនឹងផ្ដល់ហិរញ្ញវត្ថុបដិភាគតាម​រូបមន្ត​គម្រោង​ផ្ដល់មូលនិធិ ៤០% ប្រាក់កម្ចីពីសហគ្រាស​ហិរញ្ញវត្ថុ ៥០% និងទុនរបស់សហគ្រាសផ្ទាល់ ១០% នៃទុនវិនិយោគសរុប។

​លោក​សុខ ណារិន ​តំណាងប្រចាំប្រទេសកម្ពុជា​របស់អង្គការ UNIDO បានឱ្យដឹងថា ​ការដាក់ឱ្យ​ដំណើរ​ការកម្មវិធី​ហិរញ្ញវត្ថុគាំទ្រការវិនិយោគគឺជាគំនិតផ្ដួចផ្ដើមដែលសមស្រប​សម្រាប់​សហគ្រាស​ក្នុងការស្វែងរកទុនវិនិយោគបន្ថែម ក្នុងការលើកកម្ពស់គុណភាពម្ហូបអាហារ បង្កើតភាពប្រកួត​ប្រជែង​របស់ SME លើការអភិវឌ្ឍវិស័យឧស្សាហកម្ម។

​លោក ម៉ី វ៉ាន់ ​រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ មានប្រសាសន៍ថា ​កម្មវិធីហិរញ្ញវត្ថុ​គាំទ្រ​ការវិនិយោគពិតជាមានសារប្រយោជន៍ចំពោះវិស័យជលផលនៅកម្ពុជា។​

តាមរយៈគម្រោងនេះ សហគ្រាសនៅក្នុងវិស័យសង្វាក់ផលិតកម្មជលផលក្រោយ​ប្រមូលផលនឹង​មានលទ្ធភាពទទួល​បាននូវ​ការគាំទ្របច្ចេកទេស ការកសាងសមត្ថភាព និងការគាំទ្រផ្នែក​ហិរញ្ញប្ប​ទាន​ដែលរួម​មាន​ជំនួយ​ហិរញ្ញវត្ថុ និងឥណទានដែលមានការធានារក្នុង​លក្ខខណ្ឌអនុគ្រោះ​ជា​ច្រើន។

លោក ឌិត​ ទីណា រដ្ឋមន្ត្រី ក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា៖ «កម្មវិធីហិរញ្ញវត្ថុគាំទ្រការវិនិយោគ គឺជាគំនិតផ្ដួចផ្ដើមមួយដ៏ល្អ សម្រាប់គាំទ្រដល់កិច្ចសហ​ការរវាងរដ្ឋបាល​ជលផលនៃក្រសួងកសិកម្ម រុក្ខាប្រមាញ់ និងនេសាទ ព្រមទាំងអង្គការ UNIDO និងវិស័យឯកជន ដើម្បីជំរុញកំណើនក្នុងវិស័យជលផលក្រោយប្រមូលផលនៅកម្ពុជា»។

លោក ឌិត​ ទីណា បានឱ្យដឹងថា៖ «៥០% ជាប្រាក់កម្ចីពោលគឺ ៥ ដងនៃអ្វីដែលខ្លួនមាន ឧបមាថា យើងមានទុន ៥ ០០០ ដុល្លារ គុណនឹង ៥ ដង ២៥០០០ ដុល្លារដែលគាត់អាចខ្ចីបាន ហើយគម្រោង​នឹងជួយបន្ថែមទៀត ៤០ ភាគរយ »។

​លោក ឌិត​ ទីណា មានប្រសាសន៍ថា៖ «ខ្ញុំសង្ឃឹមថា កម្មវិធីនេះនឹងជួយលើកកម្ពស់ការកែច្នៃ​ផលិត​ផលជល​ផលក្រោយប្រមូលផល ឱ្យកាន់តែមានស្តង់ដារ​ និងគុណភាពខ្ពស់ តាមរយៈគម្រោង​អភិវឌ្ឍន៍​ជល​ផលក្រោយប្រមូលផល ព្រមទាំងផ្ដល់ផលចំណេញ​ផ្នែកសេដ្ឋកិច្ច​ដល់ប្រ​ជានេសាទ និងសហគ្រាសកែច្នៃផងដែរ»៕​

អត្ថបទ៖ ឡេង ដេត

​​

​