ទំហំពាណិជ្ជកម្មទ្វេភាគីកម្ពុជា-ចិន កើនជាង ១៨% សរុបទឹកប្រាក់ជាង $៧,៣ ពាន់លាន

កម្ពុជារកបានប្រាក់ចំណូលជាង ៨១៤ លានដុល្លារ ពីការនាំទំនិញទៅប្រទេសចិននៅក្នុង​ឆមាស​ទី១ ឆ្នាំ ២០២៤ កើនឡើង ១៤.២ ភាគរយបើធៀបរយៈពេលដូចគ្នាកាលពីឆ្នាំមុន ខណៈ​ពាណិជ្ជ​​កម្ម​ទ្វេ​​ភាគីមានជាង ៧,៣១ ពាន់លានដុល្លារ។ នេះ​បើ​យោងតាម​អគ្គនាយកដ្ឋាន​គយ និង​​​រដ្ឋាករ​កម្ពុជា ​(GDCE)​។​

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពដដែលបង្ហាញថា នៅក្នុងឆមាសទី១ ឆ្នាំ ២០២៤ ការនាំចេញ-នាំចូលរវាងកម្ពុជាចិន មាន​ទឹក​ប្រាក់សរុប ៧,៣១ ពាន់លានដុល្លារ កើនឡើង ១៨,៨ ភាគរយ បើធៀបនឹងឆមាសទី១ ឆ្នាំ ២០២៣ ដែលមាន ៦,១៥ ពាន់លានដុល្លារ។

អគ្គនាយកដ្ឋាន​គយ និង​រដ្ឋាករ​កម្ពុជាបានឱ្យដឹងថា តុល្យភាពជញ្ជីងពាណិជ្ជកម្មនៅឆមាសទី១ ឆ្នាំ ២០២៤ គឺកម្ពុជាមានឱនភាព ៥,៦៨ ពាន់លានដុល្លារ។

លោក ឃឹម ហ្វីណង់ រដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ផលិត​ផល​កសិផលជាច្រើនត្រូវបាននាំទៅកាន់ទីផ្សារប្រទេសចិន ដូចជាអង្ករ ដំឡូងមី ម្រេច មៀន​ប៉ៃលិន ស្វាយ ចេកជាដើម។ លោក ឃឹម ហ្វីណង់ បញ្ជាក់ថា ការនាំចេញទៅទីផ្សារបរទេសកើនឡើង ដោយ​សារ​កម្ពុជាបើកទីផ្សារថ្មីដូចជាប្រទេសចិនជាដើម។

លោក បណ្ឌិត ហុង វណ្ណៈ អ្នកជំនាញសេដ្ឋកិច្ចនៅរាជ្យបណ្ឌិតសភាកម្ពុជាប្រាប់កម្ពុជាថ្មីនៅថ្ងៃទី ១០ ខែកក្កដា ឆ្នាំ ២០២៤ថា ចាប់​តាំង​​​ពីដំណាច់ឆ្នាំ ២០២៣ ទីផ្សារនៅក្នុងតំបន់អាស៊ាន និងប្រទេសចិនមានការបញ្ជាទិញច្រើន ដែលនាំឱ្យមានកំណើននាំចេញនៅរយៈពេល ៦ ខែកន្លងមកនេះ៕

អត្ថបទ៖ ឡេង ដេត