រដ្ឋាភិបាលអនុម័ត​គម្រោងវិនិយោគក្នុងវិស័យសំណង់​មានទឹកប្រាក់ចំនួន ១,៨១ ពាន់លានដុល្លារអាមេរិកក្នុងរយៈពេល ៥ ខែ

វិស័យសំណង់របស់កម្ពុជាបានទាក់ទាញការវិនិយោគសរុបចំនួន ១,៨១ ពាន់លានដុល្លារអាមេរិកក្នុងរយៈពេល ៥ ខែដំបូងនៃឆ្នាំ ២០២៤ធ្លាក់ចុះ ២០,២ ភាគរយដោយថយពី២,២៧ ពាន់លានដុល្លារក្នុងរយៈពេលដូចគ្នាកាលពីឆ្នាំមុន ទោះបីជាស្ថានភាពសេដ្ឋកិច្ចសកលនិងក្នុងតំបន់ហាក់មានសភាពមិនប្រាកដប្រជា។

របាយការណ៍ពីក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា រដ្ឋាភិបាលបានផ្តល់អាជ្ញាប័ណ្ណដល់គម្រោងសាងសង់ចំនួន ១៣៣០ ក្នុងអំឡុងពេលខែមករាដល់ខែឧសភាឆ្នាំនេះផងដែរ ដែលធ្លាក់ចុះ ៩ ភាគរយដោយថតពី ១៤៦៣​ គម្រោងក្នុងរយៈពេលដូចគ្នាកាលពីឆ្នាំមុន។

យោងតាមទិន្នន័យ រយៈពេល៥ខែ ឆ្នាំ២០២៤ គម្រោងទទួលបានការអនុញ្ញាតសាងសង់សរុប មានចំនួន ១ ៣៣០ គម្រោង ក្នុងនោះ មានគម្រោងលំនៅដ្ឋាន ១ ០៩៥ គម្រោង (មានបុរីចំនួន ១ ០៦១ គម្រោង និងខុនដូ ៣៤ គម្រោង), សំណង់ឧស្សាហកម្ម ៨៨ គម្រោង, សំណង់ពាណិជ្ជកម្ម ៩០ គម្រោង, សំណង់ទេសចរណ៍ ២១ គម្រោង, សំណង់សាធារណៈ ៣៥ គម្រោង និងសំណង់វិនិយោគ ១ គម្រោង។

“ទោះបីជាការវិនិយោគក្នុងគម្រោងសាងសង់បានថយចុះ ២០,២ ភាគរយក្នុងរយៈពេល ៥ ខែដើមឆ្នាំ២០២៤នេះ ការនាំចូលសម្ភារៈសំណង់បានកើនឡើងជាង២៣ភាគរយ ហើយផលិតកម្មស៊ីម៉ងត៍ក្នុងស្រុកបានកើនឡើង ៤,៧ ភាគរយ ដល់៣,៥លានតោន ដែលនៅតែបង្ហាញពីវឌ្ឍនភាព​នៃវិស័យនេះ»។​ នេះបើយោងតាមរបាយការណ៍នេះ។​​

លោក​ គីម ហ៊ាង ប្រធាន KW Cambodia ​មានប្រសាសន៍មកកាន់កម្ពុជាថ្មីនៅថ្ងៃទី ២០ ខែមិថុនា កន្លងទៅនេះថា ស្ថានភាពវិស័យអចលនទ្រព្យ​បច្ចុប្បន្នមិនទាន់ត្រឡប់​ទៅរកភាព​ប្រសើរ​​ឡើងវិញនោះទេ ដោយសារនៅកម្ពុជា វិស័យមួយនេះ បានធ្លាក់ចុះរយៈ​ពេល ៥ ឆ្នាំ ជាប់គ្នា ចាប់តាំងពីវិបត្តិកូវីដ១៩ សង្គ្រាមរុស្ស៊ី-អ៊ុយក្រែន និងការ​ធ្លាក់ចុះ​នៃសេដ្ឋកិច្ចសកល។

លោកបានបញ្ជាក់ទៀតថា នៅពេលដែលស្ថានភាពល្អ​អ្នកទិញ គឺគាត់មាន​គោល​បំណងច្បាស់លាស់ គាត់ទិញ វិនិយោគផង ប្រើប្រាស់ផង និងទុកលក់យកផល​ចំណេញ​​ផង ហើយទិញទុកផង ប៉ុន្តែនៅឆ្នាំ ២០២៤ នេះ អ្នកដែលទិញទុក និងលក់​ចំ​ណេញ មិនមានទៀតទេ បើទិញគឺដើម្បី​តែប្រើ​ប្រាស់ប៉ុណ្ណោះ។

​លោក គីម ហ៊ាងស្នើឡើងថា នៅពេលដែលស្ថានភាពមិនសូវល្អ គឺជាពេលវេលា​មួយដែល​ធនាគារ ត្រូវតែ​បញ្ចេញ​លុយជួយ នៅក្នុងប្រទេសជាច្រើនលើពិភពលោក នៅ​ពេលដែល​ធនា​គារដំណើរការល្អគឺមានន័យថាសេដ្ឋកិច្ចដំណើរការហើយ។

លោក គីម ហ៊ាង គាំទ្រ​ឱ្យ​ធនាគារផ្ដល់ឥណទានដល់អ្នកនៅក្នុងវិស័យនេះ ដោយមិន​ត្រូវរឹត​​បន្តឹង​នោះទេ ស្របពេល​ដែលអ្នកវិនិយោគភាគច្រើនកំពុងមានតម្រូវការ។

លោក មាស សុខ សេនសាន រដ្ឋលេខាធិការ និងជាអ្នកនាំពាក្យក្រសួងសេដ្ឋកិច្ច និងហិរញ្ញវត្ថុ ​មានប្រសាសន៍កាលពីពេលថ្មីៗនេះថា សេដ្ឋកិច្ចកម្ពុជានៅដើមឆ្នាំ ២០២៤ មានកំណើន ដោយសារវិស័យកសិកម្ម ឧស្សាហកម្ម និងសេវាកម្ម ខណៈវិស័យអចលទ្រព្យ និងសំណង់មិនទាន់ងើបឡើងវិញនោះទេ ហើយបន្តជះឥទ្ធិពលនៅពេលខាងមុខទៀត។

លោកស្រី ជា សិរី ទេសាភិបាលធនាគារជាតិនៃកម្ពុជា មានប្រសាសន៍ថា កម្ពុជាត្រូវបន្តប្រុងប្រយ័ត្នចំពោះភាពទន់ខ្សោយនៃវិស័យអចលនទ្រព្យ ដែលមានការផ្គត់ផ្គង់លើសតម្រូវការ ខណៈសន្ទស្សន៍ថ្លៃលំនៅឋាននៅឆ្នាំ ២០២៣ បានថយចុះ ទន្ទឹមនឹងការថមថយលំហូរនៃវិនិយោគផ្ទាល់ពីបរទេសក្នុងវិស័យអចលនទ្រព្យនេះ។

ធនាគារជាតិនៃកម្ពុជា បានព្យាករថា វិស័យសំណង់នៅកម្ពុជានឹងសម្រេចបានកំណើនក្នុងកម្រិតទាប១,១% នៅឆ្នាំក្នុង២០២៤ នេះ ដែលគាំទ្រដោយកំណើនលំហូរទុនវិនិយោគពីបរទេស និងគម្រោងសំណង់ហេដ្ឋារចនាសម្ព័ន្ធ​សាធារណៈ។

តែយ៉ាងណា វិស័យនេះអាចបន្តប្រឈមនឹងភាពមិនច្បាស់លាស់នៃសេដ្ឋកិច្ចសកល បញ្ហាសង្គ្រាម និងភាពតានតឹងផ្នែកភូមិសាស្ត្រនយោបាយសកល ជាពិសេសជម្លោះពាណិជ្ជកម្មរវាងប្រទេសចិន និងសហរដ្ឋអាមេរិក ក៏ដូចជាការធ្លាក់ចុះនៃទីផ្សារអចលនទ្រព្យនៅក្នុងប្រទេសចិន។

បើយោងតាមរបាយការណ៍របស់ក្រសួងពាណិជ្ជកម្ម ការនាំចូលសម្ភារសំណង់នៅរយៈពេល ៥ ខែ ឆ្នាំ ២០២៤ មានទំហំជាង ៦២២ លានដុល្លារ កើនឡើង ២១% បើធៀនឹងរយៈពេលដូចគ្នាកាលពីឆ្នាំមុន ដែលមានទំហំជាង ៥១៣ លានដុល្លារ៕

​