ធនាគារ​ថៃ​ត្រៀម​ខ្លួន​សម្រាប់​កំណើនហានិភ័យ​​ឥណទាន​ ​ពេល​​សេដ្ឋកិច្ចសកល​មិន​ប្រាកដ​ប្រជា​

ធនាគារក្នុងស្រុកធំៗរបស់​ប្រទេស​ថៃ​ មើលឃើញថា អតិថិជនសាជីវកម្មរបស់​ខ្លួន​នឹង​​ប្រឈម​ជាមួយ​បញ្ហា​សំខាន់ៗនៅក្នុងឆមាសទី២​នៃឆ្នាំនេះ ដោយសារភាពមិនប្រាកដប្រជា​នៃ​សេដ្ឋកិច្ច​សកល និងការព្រួយបារម្ភអំពីលទ្ធភាព​នៃ​វិបត្តិសេដ្ឋកិច្ច​របស់សហរដ្ឋអាមេរិក​។ នេះ​បើ​តាម​ការ​ចុះ​ផ្សាយ​របស់​កាសែត​បាងកកប៉ុស្តិ៍​។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពេល​នេះ​ ធនាគារថៃ​នានា​ កំពុង​ត្រៀម​ខ្លួន​ដោយ​កំណត់​គោលដៅ​គ្រប់គ្រងគុណភាពទ្រព្យសកម្ម ដើម្បីកាត់បន្ថយ​កំណើន​ហានិភ័យ​ឥណទាន​ក្នុងចំណោម​អតិថិជនមួយចំនួន។

នាយកប្រតិបត្តិនៃធនាគារ Siam Commercial Bank (SCB) លោក Kris Chantanotoke បានគូសបញ្ជាក់ថា អតិថិជនសាជីវកម្មមួយចំនួននឹង​ជួប​នូវ​កំណើន​នៃ​ការលំបាកក្នុងប្រតិបត្តិការ​នា​ចុងឆ្នាំនេះ ​ដោយសារ​តែ​កត្តាហានិភ័យទាំងខាងក្នុង និងខាងក្រៅប្រទេស​។ ឧស្សាហកម្មជាច្រើនរបស់​ថៃ​ ​កំពុងជួបប្រទះនឹងការ​ធ្លាក់ចុះ​នៃ​តម្រូវការ ដែល​ដើរ​ទន្ទឹម​គ្នា​នឹង​កំណើនសេដ្ឋកិច្ចយឺតយ៉ាវ​។

នៅទូទាំងពិភពលោក វិស័យអាជីវកម្មផ្សេងៗ​រំពឹងថានឹងរងផលប៉ះពាល់ដោយភាពមិនច្បាស់លាស់នៃសេដ្ឋកិច្ច ហានិភ័យភូមិសាស្ត្រនយោបាយ និងការបារម្ភអំពីការធ្លាក់ចុះសេដ្ឋកិច្ចរបស់សហរដ្ឋអាមេរិក ដែល​អាច​កើន​មាន​ តាម​ការ​ព្រមាន​របស់​សេដ្ឋវិទូ​។ ការណ៍​នេះ​ បង្កើត​ជាកំណើន​នៃ​​ហានិភ័យកម្ចី​ឥណទានសម្រាប់អតិថិជនសាជីវកម្មមួយចំនួន​។ នេះបើយោងតាមលោក Kris ។

ប្រធានធនាគារបាងកក (BBL) លោក Chartsiri Sophonpanich បានមានប្រសាសន៍ថា ធនាគារនឹងផ្តោតលើការគាំទ្រអតិថិជនរបស់ខ្លួន ចំពេលមានការកើនឡើងនូវភាពមិនច្បាស់លាស់នៅក្នុងសេដ្ឋកិច្ចក្នុងស្រុក និងពិភព លោក។

ដើម្បីឆ្លើយតបទៅនឹងបញ្ហាប្រឈមដែលកើនឡើងទាក់ទងនឹងគុណភាពទ្រព្យសកម្ម ធនាគារគ្រោងនឹងជំរុញការផ្តល់ផ្សេង​ៗ​ ត្រៀម​សម្រាប់​លទ្ធភាព​នៃ​ការ​ខាត​បង់​ឥណទាន​ នៅ​ឆមាសទី២​ឆ្នាំនេះ ខណៈ​គ្រប់គ្រងការចំណាយយ៉ាងល្អិតល្អន់ និងកែសម្រួលអត្រាការប្រាក់ឱ្យសមរម្យសម្រាប់អតិថិជន។

នាយិកាប្រតិបត្តិនៃធនាគារ Kasikornbank (KBank) លោក​ស្រី​ Kattiya Indaravijaya បានបង្ហាញថា ធនាគាររបស់​ខ្លួន​នឹងបន្តពង្រីកយ៉ាងប្រុងប្រយ័ត្ននូវផលប័ត្រកម្ចីសាជីវកម្មរបស់ខ្លួន​ក្នុងឆមាសទី២នៃឆ្នាំនេះ ដោយសារតែភាពមិនប្រាកដប្រជាជាសកល និងក្នុងតំបន់។ ខណៈសាជីវកម្មធំ ៗ នៅតែជាចំណុចផ្តោតសំខាន់សម្រាប់កំណើនប្រាក់កម្ចីរបស់ធនាគារនៅឆ្នាំនេះ KBank នឹងនៅតែប្រយ័ត្ន​ក្នុងការអនុម័តប្រាក់កម្ចី​ ដោយ​នឹងផ្តល់អាទិភាពដល់ក្រុមហ៊ុនលំដាប់កំពូល​ក្នុងឧស្សាហកម្មដែលបង្ហាញពីលក្ខខណ្ឌហិរញ្ញវត្ថុរឹងមាំ ដើម្បីគ្រប់គ្រងគុណភាពទ្រព្យសកម្ម ចំពេលមានការកើនឡើងនៃបញ្ហាប្រឈមអាជីវកម្ម៕