ព័ត៌មានអន្ដរជាតិ

តៃវ៉ាន់ ស៊ើបអង្កេតប្រឆាំងការលក់បង្ខូចតម្លៃស៊ីម៉ងត៍ និងក្លាំងគែររបស់វៀតណាម

បានផុស

២ years មុន

នៅ

ថ្ងៃចន្ទ ១៩ សីហា ២០២៤

ដោយ

អាជ្ញាធរដោះស្រាយបញ្ហាពាណិជ្ជកម្មវៀតណាម ចំណុះឱ្យក្រសួងឧស្សាហកម្ម និងពាណិជ្ជកម្ម បាននិយាយថា ខ្លួនទទួលបានព័ត៌មានថា កោះតៃវ៉ាន់បានផ្តួចផ្តើមជាផ្លូវការនូវការស៊ើបអង្កេតប្រឆាំងការលក់បង្ខូចតម្លៃលើស៊ីម៉ងត៍ និងក្លាំងគែរ ដែលមានប្រភព ឬនាំចូលពីប្រទេសវៀតណាម។ នេះបើតាមការចុះផ្សាយរបស់សារព័ត៌មាន Viet Nam News កាលពីសប្ដាហ៍មុន។

ការស៊ើបអង្កេត ដែលផ្ដួចផ្ដើមឡើងនៅដើមខែសីហានេះ ធ្វើឡើងតាមសំណើរបស់សមាគមក្រុមហ៊ុនផលិតស៊ីម៉ងត៍តៃវ៉ាន់ ដែលកំណត់ឈ្មោះក្រុមហ៊ុនវៀតណាមចំនួន៧ ថាពាក់ព័ន្ធនឹងការលក់បង្ខូចតម្លៃនូវផលិតផលដដែលរបស់វៀតណាម។ ក្រុមហ៊ុនផ្សេងទៀត ក៏នាំចេញផលិតផលដែលកំពុងស្ថិតនៅក្រោមការស៊ើបអង្កេតទៅតៃវ៉ាន់ផងដែរ។

អាជ្ញាធរដោះស្រាយបញ្ហាពាណិជ្ជកម្ម បានជូនដំណឹងដល់ភ្នាក់ងារស៊ើបអង្កេតរួមមានក្រសួងហិរញ្ញវត្ថុតៃវ៉ាន់ និងក្រសួងកិច្ចការសេដ្ឋកិច្ចតៃវ៉ាន់ (MoEA) ហើយ MoF នឹងជ្រើសរើសគំរូស៊ើបអង្កេតដើម្បីគណនាអត្រានៃការលក់បង្ខូចតម្លៃ ដែលតម្រូវឱ្យក្រុមហ៊ុនវៀតណាមដែលជាប់ឈ្មោះ ត្រូវបានឆ្លើយតប ឬចូលរួមសហការក្នុងការស៊ើបអង្កេត។

គួរគូសបញ្ជាក់ថា ការស៊ើបអង្កេតរបស់តៃវ៉ាន់ ធ្វើឡើងក្រោយអាជ្ញាធរវៀតណាមរាយការណ៍ពីកំណើននៃការស៊ើបអង្កេតការពារពាណិជ្ជកម្ម និងសុវត្ថិភាពផលិតផលរបស់វៀតណាមពីសំណាក់ប្រទេសនាំចូលផ្សេងៗ រាប់តាំងពីផលិតផលចំណីអាហារ រហូតដល់គ្រឿងប្រើប្រាស់ប្រចាំថ្ងៃ និងក្នុងឧស្សាហកម្ម។