ក្រសួងពាណិជ្ជកម្មដឹកនាំប្រជុំពីវឌ្ឍនភាពការនាំចេញកង់

លោកស្រី ចម និម្មល រដ្ឋមន្ត្រីក្រសួងពាណិជ្ចកម្ម នៅរសៀលថ្ងៃទី ២១ ខែសីហា ឆ្នាំ ២០២៤ នេះ បានដឹកនាំកិច្ចប្រជុំវឌ្ឍនភាពការងារស្ដីពីការនាំចេញកង់ (ទោចក្រយាន) នៅកម្ពុជា ដែលមានវត្តមានចូលរួមដោយបណ្តាក្រុមហ៊ុនដែលជាអ្នកផលិត និងនាំចេញទោចក្រយាន​នៅប្រទេសកម្ពុជា។

កិច្ចប្រជុំនេះ មានគោលបំណងដើម្បីពិនិត្យដោះស្រាយបញ្ហាប្រឈម និងគិតគូរ​សម្រប​សម្រួលលើនីតិវិធីនៃការនាំចេញ ក្នុងន័យលើកកម្ពស់ភាពប្រកួតប្រជែង និងជំរុញ​កំណើន​នៃការនាំចេញទោចក្រយានពីប្រទេសកម្ពុជា។

កម្ពុជា​រកចំណូល​បានជាង​ ​២០៥​​ ​លាន​ដុល្លារ​ពី​ការនាំចេញ​កង់​ ​និង​កង់​អគ្គិសនី​ទៅកាន់​ទី​ផ្សារ​បរទេស​ក្នុងឆមាស​ទី​១​កន្លងមកនេះដោយ​ថយ​ចុះជាង​ ​៣៨​ ​ភាគរយ​ ​ពី​៣៣២ លាន​ដុល្លារ​ ​ធៀប​នឹង​រយៈពេល​ដូចគ្នា​កាលពីឆ្នាំមុន​។

ផលិតផលកង់​បាន​ក្លាយ​ជា​ផលិតផល​ផលិត​ដ៏​សំខាន់​មួយ​របស់​កម្ពុជា​ជាមួយនឹង​ផលិតផល​ស​ម្លៀ​ក​បំពាក់​ ​ស្បែកជើង​ ​ផលិតផល​ធ្វើដំណើរ​ ​គ្រឿង​អេ​ឡិច​ត្រូនិ​ក​ ​និង​ផលិតផល​ កសិកម្ម​។​

លើសពីនោះទៅទៀត កង់​ត្រូវ​បាន​នាំចេញ​ក្រោម​កិច្ចព្រមព្រៀង​ពាណិជ្ជកម្ម​សេរី​ ​កិច្ចព្រមព្រៀង​ពាណិជ្ជកម្ម​ផ្សេងទៀត​ ​ដូចជា​ប្រព័ន្ធ​អនុគ្រោះ​ពន្ធ​ទូទៅ​ ​និង​ប្រព័ន្ធ​ប្រទេស​ដែល​ទទួល​បាន​ឋានះ​អនុគ្រោះ​បំផុត​ផ្នែក​ពាណិជ្ជកម្ម​ជាដើម៕ ​

អត្ថបទ៖ ឡេង ដេត