ព័ត៌មានអន្ដរជាតិ

ក្រុងហាណូយដាក់ដំណើរការកង់អគ្គិសនី៥០០០គ្រឿងសម្រាប់សាធារណជន

បានផុស

៧ ខែ មុន

នៅ

ថ្ងៃសុក្រ ១៩ ធ្នូ ២០២៥

ដោយ

អាជ្ញាធរក្រុងហាណូយបានដាក់ឱ្យដំណើរការកង់អគ្គិសនីចំនួន ៥០០០គ្រឿងជាសាធារណៈ ដើម្បីកាត់បន្ថយការបំពុលខ្យល់ និងលើកកម្ពស់ឱ្យមានបរិស្ថានបៃតងនៅកណ្តាលទីក្រុង ខណៈដែលទីក្រុងនេះបានរឹតបន្តឹងមិនឱ្យយានយន្តដែលប្រើសាំងនិងម៉ាស៊ូត បើកបរចូលឡើយ។ យោង VN Express។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមប្រឹក្សាក្រុងហាណូយបានឱ្យដឹងកាលពីខែមុនថា គ្រប់យានយន្តដែលប្រើប្រាស់សាំង និងម៉ាស៊ូតមិនអនុញ្ញាតឱ្យបើកបរលើផ្លូវក្រវាត់កណ្តាលទីក្រុងនោះឡើយ។

ចាប់ពីថ្ងៃទី០១ខែកក្កដា ឆ្នាំ ២០២៦ ទីក្រុងហាណូយនឹងអនុវត្តឱ្យមានការបំភាយឧស្ម័នទាបបំផុតដែលអាចធ្វើទៅបាន ដោយផ្អែកលើការសាកល្បងមូលដ្ឋានក្នុងតំបន់ដែលបានជ្រើសរើសនៅខាងក្នុងផ្លូវក្រវាត់ក្រុងទី១ ក្នុងគោលបំណងកាត់បន្ថយការបំភាយឧស្ម័ន និងធ្វើឱ្យមានភាពប្រសើរឡើងនូវគុណភាពខ្យល់។

លើសពីនេះនៅប៉ុន្មានខែមុន ហាណូយបានក្លាយជាក្រុងដែលបំភាយឧស្ម័នច្រើនលំដាប់ពិភពលោក នៅបណ្តាក្រុងទាំងអស់របស់ប្រទេសវៀតណាម។ នៅតំបន់ក្នុងទីក្រុងជាច្រើន សន្ទស្សន៍គុណភាពខ្យល់ (AQI) ជាទូទៅមានកម្រិតចាប់ពី ២០០ ដល់៣០០ ហើយជួនកាលកើនឡើងប្រហែលដល់៣៥០ ដែលត្រូវបានចាត់ថ្នាក់ថា៖«គ្រោះថ្នាក់»។

ក្រុមប្រឹក្សាប្រជាជនកក្រុងហាណូយក៏បានចេញវិធានការ បង្កាកុំឱ្យប្រជាជនចេញក្រៅច្រើន បើមិនមានករណីចាំបាច់ ជាពិសេសនៅពេលដែលក្រសួងប្រកាសពីកម្រិតខ្ពស់នៃការបំពុលខ្យល់។

សាស្ត្រាចារ្យបណ្ឌិត លោក Hoang Anh Le មកពីសាកលវិទ្យាល័យវិទ្យាសាស្ត្រ នៃសាកលវិទ្យាល័យជាតិវៀតណាមទីក្រុងហាណូយ បានកត់សម្គាល់ថាការដឹកជញ្ជូនគឺជាប្រភពបំភាយឧស្ម័នដ៏សំខាន់នៅក្នុងក្រុង។

លោកបានបន្តថា ការដាក់ពង្រាយកង់អគ្គិសនីសាធារណៈទ្រង់ទ្រាយធំនឹងជួយកាត់បន្ថយការបំភាយឧស្ម័នកាបូនិ អាសូតអុកស៊ីត ស្ពាន់ធ័រឌីអុកស៊ីត [CO២, NOx, SO២] និងភាគល្អិតគីមី [PM២.៥]។ ប្រសិនបើ ១០ទៅ១៥ភាគរយ នៃអ្នករស់នៅផ្លូវក្រវាត់ក្រុងទី១ ទទួលយកសេវាកម្មនេះ គុណភាពខ្យល់អាចប្រសើរឡើងគួរឱ្យកត់សម្គាល់ក្នុងប៉ុន្មានឆ្នាំខាងមុខ។

ចំណែកអ្នកជំនាញយល់ឃើញថា ប្រសិនបើរក្សានិងពង្រីក ខណៈពេលដែលត្រូវរួមបញ្ចូលជាមួយនឹងមធ្យោបាយដឹកជញ្ជូនសាធារណៈផ្សេងទៀត កង់អគ្គិសនីសាធារណៈអាចក្លាយជាមូលដ្ឋានគ្រឹះនៃយុទ្ធសាស្ត្រកាត់បន្ថយការបំភាយឧស្ម័នរបស់ទីក្រុងហាណូយដល់ឆ្នាំ២០៣០ ដែលនឹងរួមចំណែកដល់ទីក្រុងកាន់តែមានភាពបៃតង ទាន់សម័យ និងនិរន្តរភាព៕

អត្ថបទ៖ ណឺ មិនា