កម្ពុជារកចំណូលបានជាង ៦,៧៤ ពាន់លានដុល្លារពីការនាំចេញទៅអាមេរិកក្នុងរយៈពេល ៨ ខែ

គិតចាប់ពីខែមករា ដល់ខែសីហា ឆ្នាំ ២០២៤ ពាណិជ្ជកម្មទ្វេភាគកម្ពុជា-អាមេរិកសម្រេច​បានទឹក​ប្រាក់ ៦,៩២ ពាន់​លាន​ដុល្លារ កើនឡើងពី ៦,២៧ ពាន់លានដុល្លារក្នុងរយៈពេលដូចគ្នាក្នុងឆ្នាំ ២០២៣ ស្មើនឹង ១០,៤ ភាគរយ។ នេះ​បើ​យោងតាម​អគ្គនាយកដ្ឋាន​គយ និង​​​រដ្ឋាករ​កម្ពុជា ​(GDCE)​។​

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិន្នន័យរបស់ GDCE បានបង្ហាញថា ចាប់ពីខែមករា-សីហា ឆ្នាំ ២០២៤ ការនាំចេញ-នាំចូល​ទំនិញ​​រវាង​ប្រទេស​​​​​ទាំងពីរមានទឹកប្រាក់សរុប ៦,៩២ ពាន់លានដុល្លារ កើនឡើង១០,៤ ភាគរយ ក្នុង​នោះ​កម្ពុជា​នាំចេញទំនិញទៅអាមេរិកមានតម្លៃ ៦,៧៤ ពាន់លានដុល្លារ កើន ១០,៤ ភាគរយ និងទំនិញ​អាមេរិកនាំចូល​មក​​​កម្ពុជាតម្លៃ ១៧៣,៧៨ លានដុល្លារ កើន ៨,៣ ភាគរយ។

លោកបណ្ឌិត ឆេង គឹមឡុង ប្រធានវិទ្យាស្ថានចក្ខុវិស័យអាស៊ី (AVI) ប្រាប់កម្ពុជាថ្មីថា ការ​ងើប​ឡើង​វិញនៃកំណើន​សេដ្ឋ​កិច្ចអាមេរិក និងបណ្ដាប្រទេសធំៗនៅតំបន់អឺរ៉ុប បានធ្វើឱ្យ​ការ​នាំ​​ចេញ​របស់​​កម្ពុជា​កើន​ឡើង។

លោកស្រី ចម និម្មល រដ្ឋមន្ត្រីក្រសួងពាណិជ្ជកម្ម មានប្រសាសន៍ថា រាជរដ្ឋាភិបាល​កំពុង​ បន្ត​ធ្វើពិពិធកម្មទីផ្សារ តាម​រយៈការ​ចរ​ចារ​​​បង្កើត​កិច្ចព្រមព្រៀងពាណិជ្ជ​កម្ម​សេរី និងការធ្វើ​ពិពិធ​កម្ម​មុខ​ទំនិញនាំចេញ​ឱ្យរក្សា​អាទិ​ភាព​ដូចជា សម្លៀក​បំពាក់ ស្បែកជើង កាបូប ទោចក្រ​យាន​យន្ត គ្រឿងបន្លាស់ គ្រឿងបង្គុំ និងទំនិញកសិផលកែច្នៃជាច្រើនទៀត ដើម្បី​បង្កើន​នូវផលិត​ភាពនៃ​ផលិត​​កម្ម។

ទំនិញដែលកម្ពុជានាំចេញទៅអាមេរិកមានដូចជា សម្លៀកបំពាក់ សម្ភារធ្វើដំណើរ កង់ និង​សម្ភារ​ប្រើប្រាស់មួយចំនួនទៀត។ ចំណែកអាមេរិកនាំចូលមកវិញ មានដូចជារថយន្ត គ្រឿង​យន្ត គ្រឿង​អលង្ការ គ្រឿងសំអាង សម្ភារ​អគ្គិសនី អេឡិចត្រូនិក និងសម្ភារ​ប្រើប្រាស់​មួយ​ចំនួន​ទៀត៕

អត្ថបទ៖ ឡេង ដេត