សេដ្ឋកិច្ច

ពាណិជ្ជទ្វេភាគីកម្ពុជា-អាមេរិក សម្រេចបានជាង ៧ ពាន់លានដុល្លារ នៅក្នុងរយៈពេល ៧ ខែ

បានផុស

៩ ខែ មុន

នៅ

ថ្ងៃអង្គារ ១២ សីហា ២០២៥

ដោយ

គិតចាប់ពីខែមករា ដល់ខែកក្កដា ឆ្នាំ ២០២៥ ពាណិជ្ជកម្មទ្វេភាគីកម្ពុជា-អាមេរិក សម្រេចបានជាង ៧,១ ពាន់លានដុល្លារ កើនឡើង ២៥,៨% ធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា (GDCE)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិន្នន័យរបស់ GDCE បានបង្ហាញថា ចាប់ពីខែមករា ដល់ខែកក្កដា ឆ្នាំ ២០២៥ ការដោះដូរទំនិញរវាងកម្ពុជា និងអាមេរិក សម្រេចបាន ៧,១ ពាន់លានដុល្លារ កើនឡើង ២៥,៨% ក្នុងនោះកម្ពុជានាំទំនិញចេញទៅអាមេរិកមានទំហំទឹកប្រាក់ជាង ៦,៩២ ពាន់លានដុល្លារ កើន ២៥,៧% ចំណែកអាមេរិកនាំចូលមកវិញ មានទឹកប្រាក់ ២០១ លានដុល្លារ កើនឡើង ៣០,៨%។

លោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១ក្រុមប្រឹក្សាអភិវឌ្ឍន៍កម្ពុជា មានប្រសាសន៍ថា សហរដ្ឋអាមេរិកទើបតែសម្រេចយកពន្ធលើទំនិញរបស់កម្ពុជានាំទៅអាមេរិក ក្នុងអត្រា ១៩% កាលពីថ្ងៃទី ០១ ខែសីហា ដែលអត្រានេះ នឹងធ្វើឱ្យកម្ពុជាមានលទ្ធភាពប្រកួតប្រជែងជាមួយប្រទេសជិតខាង និងថែរក្សារោងចក្រដែលមានស្រាប់ព្រមទាំងទាក់ទាញការវិនិយោគកាន់តែច្រើនបន្ថែមទៀត។

លោកឧបនាយករដ្ឋមន្ត្រី ស៊ុន ចាន់ថុល បន្ថែមថា៖ «កម្ពុជានឹងខិតខំចរចាបន្ថែមទៀតជាមួយអាមេរិក លើវិស័យអាទិភាពដូចជាវិស័យកាត់ដេរ សម្លៀកបំពាក់ ស្បែកជើង យើងនឹងខិតខំបន្តចរចាបន្ថែមទៀត ដោយសារ ប្រភេទទំនិញនេះ មិនមានផលិតនៅអាមេរិកទេ ដូច្នេះគ្មានអ្វីប្រកួតប្រជែងជាមួយក្រុមហ៊ុននៅអាមេរិកទេ ធ្វើនៅកម្ពុជាយើង ដូច្នេះ យើងខ្ញុំនឹងខិតខំចរចាធ្វើយ៉ាងឱ្យទាបជាង ១៩%»។

លោកស្រី ចម និម្មល រដ្ឋមន្រ្តីក្រសួងពាណិជ្ជកម្មមានប្រសាសន៍ថា៖ «កាលណារំហូរពាណិជ្ជកម្មកាន់តែល្អ ចរន្តនៃការផ្លាស់ប្ដូរទំនិញកាន់តែល្អ ការវិនិយោគក៏ល្អ ការផ្លាស់ប្ដូរសេវាកម្មកាន់តែល្អ ភាពរីកចម្រើននៃការធ្វើពាណិជ្ជកម្ម កាន់តែនាំមកនូវការអភិវឌ្ឍ និងវិនិយោគ»។

យោងតាមក្រសួងពាណិជ្ជកម្ម កាលពីឆ្នាំ ២០២៤ ពាណិជ្ជកម្មទ្វេភាគីកម្ពុជា-អាមេរិកសម្រេចបានទឹកប្រាក់ជាង ១០ ពាន់លានដុល្លារកើនឡើង ១១% ធៀបនឹងឆ្នាំ ២០២៣ ក្នុងនោះ កម្ពុជានាំចេញទំនិញទៅអាមេរិកមានតម្លៃ ៩,៩១ ពាន់លានដុល្លារ កើនឡើង ១១,៤% និងទំនិញអាមេរិកនាំចូលមកកម្ពុជាតម្លៃជាង ២៦៤ លានដុល្លារ កើន ២%។

ទំនិញដែលកម្ពុជានាំចេញទៅអាមេរិកមានដូចជា សម្លៀកបំពាក់ សម្ភារធ្វើដំណើរ កង់ និងសម្ភារប្រើប្រាស់មួយចំនួនទៀត។ ចំណែកអាមេរិកនាំចូលមកវិញ មានដូចជារថយន្ត គ្រឿងយន្ត គ្រឿងអលង្ការ គ្រឿងសំអាង សម្ភារអគ្គិសនី អេឡិចត្រូនិក និងសម្ភារប្រើប្រាស់មួយចំនួនទៀត៕

អត្ថបទ៖ ឡេង ដេត