សេដ្ឋកិច្ច

អាមេរិកនៅតែជាទីផ្សារនាំចេញធំជាងគេរបស់កម្ពុជា ដែលមានទំហំទឹកប្រាក់ជាង $៨ ពាន់លាន នៅរយៈពេល ៨ ខែ ឆ្នាំ ២០២៥

បានផុស

១០ ខែ មុន

នៅ

ថ្ងៃព្រហស្បតិ៍ ១១ កញ្ញា ២០២៥

ដោយ

សហរដ្ឋអាមេរិកនៅតែជាទីផ្សារនាំចេញទំនិញធំជាងគេរបស់កម្ពុជា ដែលសម្រេចបាននូវទំហំទឹកប្រាក់ប្រមាណជាង ៨ ពាន់លានដុល្លារ នៅក្នុងរយៈពេល ៨ ខែ ឆ្នាំ ២០២៥ កើនឡើង ២៣,២% ប្រៀបធៀបនឹងរយៈពេលដូចគ្នានៅឆ្នាំ ២០២៤ មានទំហំទឹកប្រាក់ជាង ៦,៧ ពាន់លានដុល្លារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា (GDCE) បង្ហាញថា គិតចាប់ពីខែមករា ដល់ខែសីហា ឆ្នាំ ២០២៥ ការដោះដូរទំនិញរវាងកម្ពុជា និងអាមេរិក សម្រេចបាន ៨,៥ ពាន់លានដុល្លារ កើនឡើង ២៣,៦% ក្នុងនោះ កម្ពុជានាំទំនិញចេញទៅអាមេរិកមានទំហំទឹកប្រាក់ជាង ៨ ពាន់លានដុល្លារ កើនឡើង ២៣,២% ចំណែកអាមេរិកនាំចូលមកវិញ មានទឹកប្រាក់ ២៤៣ លានដុល្លារ កើន ៣៩,៨%។

ទំនិញដែលកម្ពុជានាំចេញទៅអាមេរិកមានដូចជា សម្លៀកបំពាក់ សម្ភារធ្វើដំណើរ កង់ និងសម្ភារប្រើប្រាស់មួយចំនួនទៀត។

ចំណែកអាមេរិកនាំចូលមកវិញ មានដូចជារថយន្ត គ្រឿងយន្ត គ្រឿងអលង្ការ គ្រឿងសំអាង សម្ភារអគ្គិសនី អេឡិចត្រូនិក និងសម្ភារប្រើប្រាស់មួយចំនួនទៀត។

លោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១ក្រុមប្រឹក្សាអភិវឌ្ឍន៍កម្ពុជា មានប្រសាសន៍ថា សហរដ្ឋអាមេរិកទើបតែសម្រេចយកពន្ធលើទំនិញរបស់កម្ពុជានាំទៅអាមេរិក ក្នុងអត្រា ១៩% កាលពីថ្ងៃទី ០១ ខែសីហា ឆ្នាំ ២០២៥ដែលអត្រានេះ នឹងធ្វើឱ្យកម្ពុជាមានលទ្ធភាពប្រកួតប្រជែងជាមួយប្រទេសជិតខាង និងថែរក្សារោងចក្រដែលមានស្រាប់ព្រមទាំងទាក់ទាញការវិនិយោគកាន់តែច្រើនបន្ថែមទៀត។

លោកឧបនាយករដ្ឋមន្ត្រី ស៊ុន ចាន់ថុល បន្ថែមថា៖ «កម្ពុជានឹងខិតខំចរចាបន្ថែមទៀតជាមួយអាមេរិក លើវិស័យអាទិភាពដូចជាវិស័យកាត់ដេរ សម្លៀកបំពាក់ ស្បែកជើង យើងនឹងខិតខំបន្តចរចាបន្ថែមទៀត ដោយសារ ប្រភេទទំនិញនេះ មិនមានផលិតនៅអាមេរិកទេ ដូច្នេះគ្មានអ្វីប្រកួតប្រជែងជាមួយក្រុមហ៊ុននៅអាមេរិកទេ ធ្វើនៅកម្ពុជាយើង ដូច្នេះ យើងខ្ញុំនឹងខិតខំចរចាធ្វើយ៉ាងឱ្យទាបជាង ១៩%»។

លោកស្រី ចម និម្មល រដ្ឋមន្រ្តីក្រសួងពាណិជ្ជកម្មមានប្រសាសន៍ថា៖ «កាលណារំហូរពាណិជ្ជកម្មកាន់តែល្អ ចរន្តនៃការផ្លាស់ប្ដូរទំនិញកាន់តែល្អ ការវិនិយោគក៏ល្អ ការផ្លាស់ប្ដូរសេវាកម្មកាន់តែល្អ ភាពរីកចម្រើននៃការធ្វើពាណិជ្ជកម្ម កាន់តែនាំមកនូវការអភិវឌ្ឍ និងវិនិយោគ»។

នៅក្នុងឆ្នាំ ២០២៤ ពាណិជ្ជកម្មទ្វេភាគីកម្ពុជា-អាមេរិកសម្រេចបានទឹកប្រាក់ជាង ១០ ពាន់លានដុល្លារកើនឡើង ១១% ធៀបនឹងឆ្នាំ ២០២៣ ក្នុងនោះ កម្ពុជានាំចេញទំនិញទៅអាមេរិកមានតម្លៃ ៩,៩១ ពាន់លានដុល្លារ កើនឡើង ១១,៤% និងទំនិញអាមេរិកនាំចូលមកកម្ពុជាតម្លៃជាង ២៦៤ លានដុល្លារ កើន ២%៕

អត្ថបទ៖ ឡេង ដេត