សេដ្ឋកិច្ច

សុខាភិបាលថៃគ្រោងស្នើសុំរដ្ឋាភិបាលកាត់បន្ថយថ្ងៃធ្វើចត្តាឡីស័ក

បានផុស

៣ years មុន

នៅ

ថ្ងៃអង្គារ ៩ មីនា ២០២១

ដោយ

ក្រសួងសុខាភិបាលថៃគ្រោងស្នើសុំរដ្ឋាភិបាលថៃឲ្យពិចារណាពីការកាត់បន្ថយពេលវេលានៃការធ្វើចត្តាឡីស័សម្រាប់អ្នកធ្វើដំណើរពី១៤ថ្ងៃមកត្រឹម៧ទៅ១០ថ្ងៃប៉ុណ្ណោះ ចាប់ពីខែក្រោយទៅ។

ផែនការនេះត្រូវបានប្រកាសកាលពីថ្ងៃចន្ទ ម្សិលមិញដោយរដ្ឋមន្ត្រីសុខាភិបាលលោក Anutin Charnvirakul ក្នុងនាមលោកជាប្រធានគណកម្មាធិការជាតិប្រយុទ្ធប្រឆាំងនឹងជំងឺឆ្លង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Anutin បាននិយាយថា ក្រសួងនឹងស្នើសុំរដ្ឋាភិបាលឲ្យកាត់បន្ថយពេលវេលានៃការធ្វើចត្តាឡីស័កដើម្បីជួយស្រោចស្រងវិស័យទេសចរណ៍ ក៏ដូចជាជួយជំរុញសេដ្ឋកិច្ចក្នុងប្រទេស។

លោកបាននិយាយ បន្ទាប់ពីកិច្ចប្រជុំគណកម្មាធិការកាលពីថ្ងៃចន្ទថា ៖«យើងត្រៀមខ្លួនដើម្បីបើកចំហរប្រទេសជួយដល់កំណើនសេដ្ឋកិច្ច។ ប្រសិនបើយើងអាចគ្រប់គ្រងវ៉ាក់សាំងដល់៧០%នៃបុគ្គលិកសុខាភិបាលទាំងអស់ត្រឹមខែតុលា យើងប្រហែលជាពិចារណាលុបចោលនូវការដាក់ឲ្យនៅដាច់ដោយឡែកសម្រាប់ក្រុមខ្លះ»។

«យើងមានវ៉ាក់សាំងគ្រប់គ្រាន់ពីក្រុមហ៊ុន AstraZeneca ហើយយើងនឹងរៀបចំផែនការយកចំនួន១០លានដូសពីក្រុមហ៊ុននេះ ប្រសិនបើពួកគេអាចផលិតបន្ថែមឲ្យពួកយើង»។

លោកថា ប្រសិនបើទទួលបានការអនុម័តពីរដ្ឋាភិបាលចំពោះគោលការណ៍នៃការកាត់បន្ថយពេលវេលាធ្វើចត្តាឡីស័កខ្លីជាងបច្ចុប្បន្ន នោះគោលការណ៍នេះនឹងត្រូវអនុវត្តចំពោះអ្នកធ្វើដំណើរមាន៣ប្រភេទដូចខាងក្រោម ដែលចាប់ផ្តើមអនុវត្តពីខែមេសា។

ទី១៖ អ្នកធ្វើដំណើរដែលមិនមែនជាជនជាតិថៃដែលបានចាក់វ៉ាក់សាំងកូវិដ-១៩ចន្លោះពី១៤ថ្ងៃទៅ៣ខែ មុនពេលពួកគេធ្វើដំណើរមកដល់ប្រទេសថៃ និងធ្វើតេស្តអវិជ្ជមានជំងឺឆ្លងនេះ។ អ្នកធ្វើដណើរប្រភេទនេះនឹងតម្រូវឲ្យធ្វើចត្តាឡីស័កតែ៧ថ្ងៃប៉ុណ្ណោះ។

ទី២៖ ជនជាតិថៃវិលត្រឡប់មកក្រៅប្រទេសដែលបានចាក់វ៉ាក់សាំងការពារកូវិដ-១៩ ចន្លោះពី១៤ថ្ងៃទៅ៣ខែមុនពេលមកដល់ប្រទេសថៃ។ ពួកគេនឹងតម្រូវឲ្យធ្វើចត្តាឡីស័ក៧ថ្ងៃដែរ។

ទី៣៖ អ្នកធ្វើដំណើរដែលមិនមែនជាជនជាតិថៃដែលមិនទាន់ចាក់វ៉ាក់សាំងការពារកូវិដ-១៩ ប៉ុន្តែមានលិខិតបញ្ជាក់ពីការធ្វើតេស្តគ្មានវីរុសកូវិដ-១៩។ ពួកគេតម្រូវឲ្យធ្វើចត្តាឡីស័ករយៈពេល១០ថ្ងៃ។

គោលការណ៍ធ្វើចត្តាឡីស័កខ្លីនេះនឹងមិនអនុវត្តចំពោះអ្នកធ្វើដំណើរមកពីតំបន់អាហ្វ្រិកឡើយ។ អ្នកធ្វើដំណើរមកពីតំបន់អាហ្វ្រិកត្រូវតែធ្វើចត្តាឡីស័ក១៤ថ្ងៃដដែល ពីព្រោះក្រសួងសុខាភិបាលនៅតែបារម្ភពីលទ្ធភាពនៃការផ្ទុះកូវិដ-១៩ក្នុងប្រទេសថៃ៕

ប្រែសម្រួល៖ វីរបុត្រ
ប្រភព៖ Bangkokpost

Related Topics:ប្រទេសថៃ