កម្ពុជាស្នើឱ្យភាគីចិន បង្កើនការនាំចូលផលិតផលកសិកម្មដូចជា ដំឡូងមី ស្វាយចន្ទី មៀនប៉ៃលិន

លោក ស៊ាង ថៃ រដ្ឋលេខាធិការក្រសួងពាណិជ្ជកម្ម បានស្នើឱ្យភាគីចិនជួយនាំ ទំនិញពីកម្ពុជា ជាពិសេសផលិតផលកសិផល មានដូចជា ដំឡូងមី ស្វាយចន្ទី មៀនប៉ៃលិន ស្វាយ ចេកអំបូង និងកៅស៊ូ ទៅកាន់ប្រទេសចិនឱ្យបានកាន់តែច្រើន ដើម្បីកាត់បន្ថយគម្លាតតុល្យភាពជញ្ជីង​ពាណិជ្ជកម្ម​នៃប្រទេសទាំងពីរ។

លោក ស៊ាង ថៃ បានស្នើឡើងក្នុងជំនូបពិភាក្សាការងារ​ជាមួយគណៈប្រតិភូមក​ពីសភាពា​ណិជ្ជកម្ម​ឧស្សាហកម្មកសិកម្ម នៃតំបន់ស្វយ័តជនជាតិជាំងក្វាងស៊ី នៃសាធារណរដ្ឋ​ប្រជា​មានិតចិន ដឹកនាំដោយលោក Chen Jizhi អនុប្រធានសហព័ន្ធឧស្សាហកម្ម និងពាណិជ្ជកម្ម និងជាប្រធានសភាពាណិជ្ជកម្ម​ឧស្សា​ហកម្មកសិកម្ម នៃតំបន់ស្វយ័តជនជាតិជាំងក្វាងស៊ី នៃសាធារណរដ្ឋប្រជាមានិតចិន កាលពីថ្ងៃទី ២៨ ខែតុលា ឆ្នាំ ២០២៤។

គណៈប្រតិភូចិនបានបង្ហាញពីចំណាប់អារម្មណ៍ក្នុងការបោះទុនវិនិយោគនៅកម្ពុជា និងបានលើក​ឡើងនូវសំណួរ សំដៅស្វែងយល់អំពីគោលនយោបាយពាណិជ្ជកម្ម ឧស្សាហកម្ម កសិកម្ម តម្រូវការទីផ្សារ បរិយាកាសវិនិយោគ និងធនធានកសិកម្មនៅកម្ពុជា ដើម្បីចាប់ឱកាសភាព​ជាដៃគូកិច្ចសហការវិស័យឯកជនរវាងកម្ពុជា-ចិន (ខេត្តក្វាងស៊ី)។

លោក ស៊ាង ថៃ រដ្ឋលេខាធិការក្រសួងពាណិជ្ជកម្ម បានលើកពីច្បាប់វិនិយោគថ្មីរបស់កម្ពុជា ភាពអនុគ្រោះផ្នែកពន្ធដារ ការប្រើប្រាស់ដីធ្លី វិស័យអាទិភាពសម្រាប់វិនិយោគ និងទំនិញ​សក្ដា​នុពលនៅកម្ពុជា។

លោករដ្ឋលេខាធិការ បានស្នើឱ្យភាគីចិន ពិចារណារៀបចំសមាសភាពប្រតិភូតាមវិស័យមក​ជួបពិភាក្សាផ្ទាល់​ជាមួយដៃគូនៅកម្ពុជា សម្រាប់ដំណើរទស្សនកិច្ចលើកក្រោយ ដែលនោះ​ជាឱកាសដ៏ល្អសម្រាប់ភាគីទាំងពីរអាចពិភាក្សា និងចុះកិច្ចសន្យាធ្វើធុរកិច្ច​ជាក់ស្ដែង​ជាមួយ​គ្នាបានផងដែរ។

យោងតាម​អគ្គនាយកដ្ឋាន​គយ និង​​​រដ្ឋាករ​កម្ពុជា ​(GDCE)​ បានឱ្យដឹងថា នៅក្នុងរយៈពេល ៩ ខែ ឆ្នាំ ២០២៤ ពាណិជ្ជកម្មទ្វេភាគីកម្ពុជា-ចិន សម្រេចបានទំហំទឹកប្រាក់ជាង ១១,១៤ ប៊ីលាន​ដុល្លារ កើនឡើង ២២,៥ ភាគរយ ក្នុង​នោះកម្ពុជានាំទំនិញទៅចិន មានតម្លៃ ១,២៧ ប៊ីលាន​ដុល្លារ និង​ទំនិញចិននាំចូល​មកកម្ពុជា​តម្លៃ ៩,៨៦ ប៊ីលានដុល្លារ កើន ២២,៧ ភាគរយ។ ឱនភាពពាណិជ្ជកម្មរវាងកម្ពុជា-ចិន បានកើនឡើងដល់ ១៣ ភាគរយ ដែលមានទឹកប្រាក់ ៨,៥៨ ប៊ីលានដុល្លារ៕