ព័ត៌មានអន្ដរជាតិ

ម៉ាឡេស៊ីកំណត់គោលដៅក្លាយជាមជ្ឈមណ្ឌលផលិតរថយន្តអគ្គិសនីប្រចាំអាស៊ាន

បានផុស

២ years មុន

នៅ

ថ្ងៃពុធ ១៣ វិច្ឆិកា ២០២៤

ដោយ

អនុរដ្ឋមន្ត្រីក្រសួងវិនិយោគ ពាណិជ្ជកម្ម និងឧស្សាហកម្មម៉ាឡេស៊ី លោក Liew Chin Tong បាននិយាយថា ប្រទេសម៉ាឡេស៊ីមានសក្តានុពលដ៏សំខាន់ដើម្បីក្លាយជាមជ្ឈមណ្ឌលប្រចាំតំបន់សម្រាប់ការផលិតរថយន្តអគ្គិសនី (EV) នៅក្នុងអាស៊ាន ជាមួយនឹងបទពិសោធន៍លើការផលិតរថយន្តរយៈពេល ៤០ ឆ្នាំ និងឧស្សាហកម្មបន្ទះឈីបដ៏រឹងមាំរបស់ខ្លួន។ នេះបើតាមការចុះផ្សាយរបស់កាសែត The Star។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបាននិយាយកាលពីថ្ងៃអង្គារថា ម៉ាឡេស៊ីមានគោលបំណងជំរុញការធ្វើសមាហរណកម្មកាន់តែច្រើនរវាងឧស្សាហកម្មរថយន្ត និងបន្ទះឈីប ដោយមានគោលដៅក្លាយជាមជ្ឈមណ្ឌលឈានមុខគេសម្រាប់ការរចនាបន្ទះឈីបជាពិសេសសម្រាប់វិស័យរថយន្ត។

អនុរដ្ឋមន្ត្រីដដែលបន្តយ៉ាងដូច្នេះថា៖ «ម៉ាឡេស៊ីគឺជាកន្លែងដ៏គួរឱ្យចាប់អារម្មណ៍មួយ យើងគឺជាអ្នកនាំចេញផលិតផលបន្ទះឈីបធំជាងគេទី៦នៅក្នុងពិភពលោក។ ទោះបីមិនមានម៉ាកផលិតផលក្នុងស្រុកផ្ទាល់ ប៉ុន្តែយើងដើរតួនាទីយ៉ាងសំខាន់»។ បច្ចុប្បន្ន ម៉ាឡេស៊ីរួមចំណែក ១៣ ភាគរយ នៃការធ្វើតេស្ត និងវេចខ្ចប់បន្ទះឈីបសកល ដោយមានក្រុមហ៊ុនអន្តរជាតិផ្សេងៗដាក់រោងចក្រផលិតកម្ម។

ទន្ទឹមនឹងនោះ លោក Liew បាននិយាយថា គោលដៅមួយទៀត គឺការកាត់បន្ថយការប្រើប្រាស់ប្រេងឥន្ធនៈទូទាំងប្រទេសទាំងមូល តាមរយៈការប្រើប្រាស់យានយន្តអគ្គិសនី។

គួរគូសបញ្ជាក់ថា រដ្ឋាភិបាលម៉ាឡេស៊ីបានកំណត់គោលដៅ ឱ្យរថយន្តអគ្គិសនី រួមចំណែកប្រមាណ ២០ ភាគរយ នៃបរិមាណឧស្សាហកម្មសរុប (TIV) នៅឆ្នាំ ២០៣០, ៥០ ភាគរយ នៅឆ្នាំ ២០៤០ និង ៨០ ភាគរយ នៅឆ្នាំ ២០៥០៕