ក្រុមហ៊ុននាំចេញ បន្តទិញផ្លែមៀនប៉ៃលិន ក្នុងតម្លៃ ៣០០០ រៀល ក្នុងមួយគីឡូក្រាម

លោក សាយ សុផាត ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តប៉ៃលិនប្រាប់កម្ពុជាថ្មីនៅថ្ងៃទី ០៣ ខែធ្នូ ឆ្នាំ ២០២៤នេះថា ក្រុមហ៊ុននាំចេញផ្លែមៀន​ប៉ៃលិនបន្តទិញផ្លែមៀនពីកសិករក្នុងតម្លៃ ៣០០០ រៀល ក្នុងមួយ​គីឡូ​ក្រាម​ ខណៈការនាំចេញទៅចិនមានកំណើន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សាយ សុផាត បានបញ្ជាក់ថា តម្លៃផ្លែមៀនប៉ៃលិននឹងឡើងដល់ ៣ ៥០០ រៀល ក្នុងមួយ​គីឡូក្រាម ​​នៅខែ​មករា ឆ្នាំ ២០២៥ ខាងមុខនេះ ខណៈស្ថានភាពទិន្នផល និងការនាំ​ចេញ​ទៅ​ប្រទេស​ចិនមានភាពល្អប្រសើរនៅរដូវប្រមូលផលឆ្នាំនេះ។

លោក​ សួន ជុំ អនុប្រធានសមាគមមៀនប៉ៃលិនបានលើកឡើងថា តម្លៃ ៣០០០ រៀល ក្នុងមួយ​គីឡូ​ក្រាម អាចទទួលយកបាន ប្រសិនបើកសិករចេះថែទាំមៀនត្រូវតាមក្បួនខ្នាត​បច្ចេកទេសនោះ​គឺ​កសិករ​នឹងអាចចំណេញ។

ខេត្តប៉ៃលិន មានផ្ទៃដីដាំដុះមៀន សរុប៤៩២០ហិកតា ក្នុងនោះមានកសិករដាំដុះមៀន​ប៉ៃលិន​​ចំនួន៦៨៩គ្រួសារ ដោយមានផ្ទៃដីប្រមូលផលចំនួន៤១២០ហិកតា ដែលមានបរិមាណ​ប្រមូល​ផល បានចំនួន៦១៨០០តោន។

យោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ គិតត្រឹមឆមាសទី១ ឆ្នាំ ២០២៤ ការនាំចេញផ្លែមៀនស្រស់របស់កម្ពុជាទៅទីផ្សារអន្តរជាតិ សម្រេចបានជាង ១ ម៉ឺន ៤ ពាន់តោន កើនឡើងជាង ១២០ ភាគរយ គិតជាទឹកប្រាក់ប្រមាណ ២២ លានដុល្លារ បើធៀបនឹង​រយៈ​​ពេលដូច​គ្នា​កាល​​ពីឆ្នាំមុន។

នៅក្នុងឆ្នាំ២០២៣ កម្ពុជាបាននាំចេញផ្លែមៀន​ស្រស់​មានបរិមាណសរុបជាង ១៧ ៤៩៧ តោន គិតជាទឹកប្រាក់សរុបជាង ២៤ ​លានដុល្លារ៕

អត្ថបទ៖ ឡេង ដេត