ចំណូលរបស់រដ្ឋាករទឹកស្វយ័តក្រុងភ្នំពេញថយចុះតិចតូចនៅត្រីមាសទី៣

រដ្ឋាករទឹកស្វយ័តក្រុងភ្នំពេញ (រ.ទ.ស.ភ) ដែលជាក្រុមហ៊ុនបោះផ្សាយមូលបត្រនៅផ្សារ​មូលបត្រកម្ពុជា​ទទួលមានចំណូលសរុបចំនួនជាង ៨៨ ពាន់លានរៀលក្នុងត្រីមាសទី៣ ឆ្នំា២០២៤  ថយចុះជាងត្រីមាសទី២ ឆ្នំា២០២៣​​ ១៥,៤៨%។

«យើងបានឃើញថាមូលហេតុចម្បងនៃការថយចុះចំណូលនេះដោយសារចំណូលពីការលក់ថយចុះជាង១៣ពាន់លានរៀលស្មើនឹង ១៣,១៤% និងចំណូលផ្សេងបានថយចុះជាង៤ពាន់លានរៀលស្មើនឹង ១៦៨,៧៣% ព្រមទាំងអត្រាទឹកគ្មានចំណូលបានកើនឡើងដល់អត្រា ២១,៥៩%ក្នុងរាជធានីភ្នំពេញ និងក្រុងតាខ្មៅ»។​ នេះបើយោងតាមរបាយការណ៍របស់ក្រុមហ៊ុនផ្ញើរទៅកាន់ផ្សារមូលបត្រកម្ពុជាកាលពីពេលថ្មីៗនេះ។

​

លោក ឯក សុនចាន់ ប្រធានក្រុមប្រឹក្សាភិបាលនៃរ.ទ.ស.ភបានគូសបញ្ជាក់ក្នុងរបាយការណ៍នោះថា ក្នុងត្រីមាសទី៣ ឆ្នាំ២០២៤ នេះ រ.ទ.ស.ភ បានដាក់បំពង់មេនាំទឹក និងបណ្តាញចែកចាយទឹកស្អាតសរុប ប្រវែង ១៤៧ ០៩៣,៦៣ម៉ែត្រ, ផលិតទឹកស្អាតបានជាង ៨០​ លានមែត្រគូម និងតបណ្តាញជូនអតិថិជនបានចំនួន ៦ ១៣៤បណ្តាញ ក្នុងនោះអតិថិជនចំណូលទាបមានចំនួន ៤២៤បណ្តាញ ដោយជាលទ្ធផលទទួលបានចំណូលសរុប ចំនួនជាង ៨៨ ពាន់លានរៀល, និងចំណេញពិតចំនួនជាង ២១ ពាន់លានរៀល។ ចំណេញក្នុងមួយភាគហ៊ុន ជាមូលដ្ឋាន (Basic Earmings per Share) គឺ ២៤៧,៧៩រៀល។

លោកថា៖«រ.ទ.ស.ភ វិនិយោគ កសាង ពង្រីក ដំណើរការ និងជួសជុលថែរក្សាមាព្យាបាយសម្រាប់ផលិត និងប្រព័ន្ធចែកចាយ ទឹកស្អាត និងអនាម័យ, ប្រើប្រាស់នូវគ្រប់វិធានការដើម្បីបង្កើនផលិតកម្ម-សេវាកម្ម និងធានាគុណភាពទឹកស្អាត ដើម្បីឆ្លើយតប ទៅនឹងតម្រូវការសម្រាប់ជីវភាពរស់នៅ អាជីវកម្ម សេវាកម្ម និងឧស្សាហកម្ម, ធ្វើអាជីវកម្ម សេវាកម្ម និងការងារផ្សេងៗទៀត ដែលទាក់ទងនឹងវិស័យទឹកស្អាត និងអនាម័យនៅក្នុងឬក្រៅប្រទេស តាមការសម្រេចរបស់ក្រុមប្រឹក្សាភិបាល និងដោយអនុលោមតាមច្បាប់»។

លោកថា សម្រាប់ត្រីមាសទី៤ ឆ្នាំ២០២៤ រ.ទ.ស.ភ គ្រោងផលិតទឹកស្អាត ៨០ ៤៣៥ ៦០០ម” ជាមួយនឹងការពង្រីក បណ្តាញចែកបាយទឹកបន្ថែម ១០៩ ៧៤៩ម៉ែត្រ, គ្រោងចំណូលសរុបចំនួនជិត ១៣១​  ពាន់លានរៀល និង ចំណាយសរុបចំនួនជិត ៧៦ ពាន់លានរៀល៕ ​