រដ្ឋមន្ត្រីកសិកម្ម ណែនាំឱ្យមន្ត្រីថ្នាក់ក្រោម សិក្សាតម្រូវការ និងការផ្គត់ផ្គង់ផលិតកម្មសត្វ

លោក​ ឌិត​ ទីណា រដ្ឋមន្រ្តីក្រសួងកសិកម្ម​ រុក្ខាប្រមាញ់​ និងនេសាទ​ បានលេីកទឹកចិត្តដល់អគ្គនាយកដ្ឋាន​ សហការជាមួយវិស័យឯកជន​គ្រប់ភាគីពាក់ព័ន្ធ និងអ្នកវិនិយោគទាំងអស់​ ចូលរួមបេីកទីផ្សារផលិតផលសាច់គ្រប់ប្រភេទទៅកាន់ទីផ្សារអន្តរជាតិ​ និងដោះស្រាយបញ្ហាប្រឈមជាមួយគ្នា​ ដោយគិតគូរពីស្តង់ដាអនាម័យ​ ភូតគាមអនាម័យ​ គុណភាព​ រសជាតិ​ ស្របតាមនីតិវិធីត្រឹមត្រូវ​ និងបច្ចេកទេសនៃកិច្ចចរចាពាណិជ្ជកម្ម​ ដោយទទួលបានតម្លៃបន្ថែមខ្ពស់​ និងផ្តល់ផលចំនេញដល់សេដ្ឋកិច្ចជាតិ។

លោក​ ឌិត​ ទីណា បានលើកឡើងនៅក្នុងពិធីបិទកិច្ចប្រជុំបូកសរុបការងារសុខភាពសត្វ​ និងផលិតកម្មសត្វប្រចាំឆ្នាំ២០២៤​ និងទិសដៅអនុវត្តឆ្នាំ២០២៥ នៅអគ្គនាយកដ្ឋានសុខភាពសត្វ​ និងផលិតកម្មសត្វនៅថ្ងៃទី ១៨ ខែធ្នូ ឆ្នាំ ២០២៤។

លោករដ្ឋមន្រ្តី បានបញ្ជាក់ថា អគ្គនាយកដ្ឋានសុខភាពសត្វ​ និងផលិតកម្មសត្វ ត្រូវបន្តប្រសិទ្ធភាពការងារឱ្យកាន់តែប្រ​សើរ​ឡើងបន្ថែមទៀត ក្នុងស្មារតីទទួលខុសត្រូវខ្ពស់ បន្តសហការជាមួយអគ្គនាយកដ្ឋានជំនាញពាក់ព័ន្ធនានា អាជ្ញាធរខេត្ត និងមន្ទីរកសិកម្មរាជធានី-ខេត្ត ដើម្បីជួយដល់ប្រជាកសិករដល់មូលដ្ឋាន និងទទួលបានប្រសិទ្ធភាពសេដ្ឋកិច្ច។

បើតាមលោករដ្ឋមន្ត្រី កម្ពុជាបានឆ្លងផុតនូវដំណាក់កាល ខ្វះខាតការហូបចុក រហូតដល់មានការហូបគ្រប់គ្រាន់។ យ៉ាងណាក៏ដោយ ដើម្បីមានបាន គឺជាការលំបាកមួយកម្រិតទៀត ដែលអគ្គនាយកដ្ឋាន និងមន្រ្តីក្រោមឱវាទត្រូវគិតគូរពិចារណាឱ្យបានសុីជម្រៅដោយផ្តោតទៅលេីភាពចំនេញសេដ្ឋកិច្ច​ តុល្យភាពតម្រូវការ​ និងការផ្គត់ផ្គង់​ ផែនការផលិតកម្ម​ដល់ប្រជាកសិករអ្នកចិញ្វឹមសត្វ​ ជាជាងការបង្កេីនបរិមាណផលិតកម្មសត្វ​ ដែលនាំឱ្យតម្លៃធ្លាក់ចុះ​ និងខាតបង់ផលប្រយោជន៍ទាំងអស់គ្នា។

លោក ឌិត ទីណាបានថ្លែងថា ការងារសុខភាពសាធារណៈគឺជាការងារចាំបាច់​ដែលអគ្គនាយកដ្ឋាន​ ត្រូវយកចិត្តទុកដាក់ខ្ពស់ក្នុងការចាក់វ៉ាក់សាំងដល់សត្វទូទាំងប្រទេស​ និងការផ្តល់សេវាកម្មថែទាំប្រកបដោយគុណភាព​ ប្រសិទ្ធភាព​ និងសុវត្ថិភាព។

លោករដ្ឋមន្រ្តី​បន្តថា ការងារសុខភាពតែមួយ (One Health) ត្រូវបន្តអនុវត្តឱ្យបានខ្ជាប់ខ្ជួនជាប្រចាំជាមួយក្រសួងសុខាភិបាល​ និងក្រសួងបរិស្ថាន​ ដែលជាដៃគូក្នុងការផ្តល់ផលប្រយោជន៍សុខភាព​ និងអនាម័យដល់ប្រជាពលរដ្ឋ។

ពាក់ព័ន្ធនឹងការងារវិនិយោគ លោករដ្ឋមន្រ្តី​ បានលេីកទឹកចិត្តដល់អគ្គនាយកដ្ឋាន​ សហការជាមួយវិស័យឯកជន​គ្រប់ភាគីពាក់ព័ន្ធ និងអ្នកវិនិយោគទាំងអស់​ ចូលរួមបេីកទីផ្សារផលិតផលសាច់គ្រប់ប្រភេទទៅកាន់ទីផ្សារអន្តរជាតិ​ និងដោះស្រាយបញ្ហាប្រឈមជាមួយគ្នា​ ដោយគិតគូរពីស្តង់ដាអនាម័យ​ ភូតគាមអនាម័យ​ គុណភាព​ រសជាតិ​ ស្របតាមនីតិវិធីត្រឹមត្រូវ​ និងបច្ចេកទេសនៃកិច្ចចរចាពាណិជ្ជកម្ម​ ដោយទទួលបានតម្លៃបន្ថែមខ្ពស់​ និងផ្តល់ផលចំនេញដល់សេដ្ឋកិច្ចជាតិ៕