ក្រុមហ៊ុនចិន សិក្សាលទ្ធភាព វិនិយោគរោងចក្រកែច្នៃដំឡូងមីនៅកម្ពុជា

ក្រុមហ៊ុនចិនសិក្សាលទ្ធភាពវិនិយោគ​លេីការកែច្នៃដំឡូងមីដោយផ្ទាល់នៅកម្ពុជា​ និងស្នេីការគាំទ្រពីក្រសួងកសិកម្មក្នុងការចូលរួមសហការជាមួយសហគមន៍កសិកម្ម​ ដេីម្បីធានាបាននូវនិរន្តរភាពនៃការផ្គត់ផ្គង់ដំឡូងមី។

បំណងវិនិយោគលើការកែច្នៃដំឡូងមី នេះ បានធ្វើឡើងក្នុងពេលលោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានទទួលជួបសម្តែងការគួរសម និងពិភាក្សាការងារជាមួយតំណាងក្រុមហ៊ុន Sublime China Co.,Ltd នៅព្រឹកថ្ងៃទី ២០ ខែធ្នូ ឆ្នាំ ២០២៤។

លោករដ្ឋមន្ដ្រី បានគូសបញ្ជាក់ថា ពាក់ព័ន្ធនឹងដំណាំដំឡូងមី​ ក្រសួងកសិកម្មត្រូវការដៃគូសហការល្អក្នុងការកែច្នៃនាំចេញ​នូវផលិតផលសម្រេចទៅកាន់ទីផ្សារក្រៅប្រទេស​ ដោយទទួលទិញពីប្រជាកសិករ​ក្នុងតម្លៃសមរម្យ​ មានកិច្ចសន្យាផលិតកម្មត្រឹមត្រូវ​រក្សាស្ថិរភាពថ្លៃដល់កសិករ​ និងអនុវត្តការងារមានលក្ខណៈយូរអង្វែង។

លោករដ្ឋមន្ត្រីបានបញ្ជាក់បន្ថែមថា ការងារនេះទាមទារឱ្យ​មានការសិក្សាឱ្យបានសុីជម្រៅ មានផែនការវិនិយោគច្បាស់លាស់​ មានស្តង់ដាការងារត្រឹមត្រូវ​ និងអាចតភ្ជាប់ខ្សែច្រវ៉ាក់តម្លៃ​ ដោយមានអ្នកទទួលទិញពីកសិករ​ អ្នកកែច្នៃផលិតផល​ និងក្រុមហ៊ុនភស្តុភារកម្ម​ ដោយក្រសួងនឹងជួយគាំទ្រផ្នែកបច្ចេកទេស​ និងច្បាប់បទដ្ឋាននានា ដេីម្បីជួយសម្របសម្រួល​ឱ្យការវិនិយោគនេះ​មានលទ្ធផលល្អ​ រលូន​ និងជួយដល់ប្រជាកសិករបានយ៉ាងពិតប្រាកដ។

លោករដ្ឋមន្ដ្រី​ បានផ្តល់អនុសាសន៍តម្រង់ទិសដល់ក្រុមហ៊ុនចិន​ បន្តសហការធ្វេីការជាមួយក្រសួងកសិកម្ម​ក្នុងការងារនេះ​ និងបានលេីកទឹកចិត្តក្នុងការវិនិយោគនៅប៉ែកឦសានរួមមានខេត្តមណ្ឌលគីរី​ ខេត្តរតនៈគីរី​ ខេត្តស្ទឹងត្រែង​ និងខេត្តក្រចេះ៕