សេដ្ឋកិច្ច

អាកាសយានដ្ឋានតារាសាគរ បើកឱ្យដំណើរការជើងហោះហើរថ្ងៃនេះ

បានផុស

៣ ខែ មុន

នៅ

ថ្ងៃព្រហស្បតិ៍ ២៦ ធ្នូ ២០២៤

ដោយ

អាកាសយានដ្ឋានអន្តរជាតិតារាសាគរ ស្ថិតនៅស្រុកបុទុមសាគរ ខេត្តកោះកុង ត្រូវបានដាក់ឱ្យដំណើរការសាកល្បងនៅថ្ងៃទី ២៦ ខែធ្នូ ឆ្នាំ ២០២៤ ជាមួយនឹងជើងហោះហើរដំបូងជាលក្ខណៈជួល ( Charter Flight) របស់ក្រុមហ៊ុនអាកាសចរណ៍ Cambodia Angkor Airlines ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងពិធីដាក់ឱ្យប្រើប្រាស់ជាផ្លូវការនៅថ្ងៃ២៦ ខែធ្នូនេះ លោក ម៉ៅ ហាវណ្ណាល់ រដ្ឋមន្ត្រីបន្ទុករដ្ឋលេខាធិការដ្ឋានអាកាសចរណ៍ស៊ីវិលមានប្រសាសន៍ថា វិស័យអាកាសចរណ៍ស៊ីវិលនៅកម្ពុជាមានការរីកចម្រើនយ៉ាងឆាប់រហ័ស រួមមានការអភិវឌ្ឍហេដ្ឋារចនាសម្ព័ន្ធ ធនធានមនុស្ស និងបច្ចេកវិទ្យាជាបន្តបន្ទាប់ ដើម្បីឆ្លើយតបទៅនឹងកំណើននៃចរាចរដឹកជញ្ជូនតាមផ្លូវអាកាស ប្រកបដដោយសុវត្ថិភាព និងប្រសិទ្ធភាពសេដ្ឋកិច្ច។

លោក ម៉ៅ កែវពេជ្រច័ន្ទមុន្នី នាយកអាកាសយានដ្ឋានអន្តរជាតិតារាសាគរ បានប្រាប់កម្ពុជាថ្មីថា អាកាសយានដ្ឋានអន្តរជាតិតារាសាគរបានបើកស្វាគមន៍ការហោះហើរក្នុងស្រុកដំបូងជាលក្ខណៈជួល ហើយនៅព្រឹកនេះ យន្តហោះ Cambodia Angkor Airlines ប្រភេទ យន្តហោះ ATR-72 ដឹកភ្ញៀវចំនួន៦៣នាក់ បានចុះចតនៅអាកាសយានដ្ឋានអន្តរជាតិតារាសាគរ។

លោក ម៉ៅ កែវពេជ្រច័ន្ទមុន្នី មានប្រសាសន៍ថា៖ «ប្រសិនបើដំណើរការជើងហោះហើរតារាសាគរនឹងជួយសម្រួលការធ្វើដំណើរក្នុងស្រុក ចំណេញពេលវេលា បើធៀបនឹងការធ្វើដំណើរតាមផ្លូវគោក និងជួយលើកមុខមាត់ខេត្តកោះកុងថែមមួយកំរិតទៀត ហើយក៏ជាទិសដៅសម្រាប់អ្នកវិនិយោគជាតិ និងអន្តរជាតិ ធ្វើឱ្យខេត្តកោះកុង កាន់តែរីកចម្រើនបន្ថែមទៀត»។

សូមជំរាបថា ក្រុមហ៊ុន Union Development Group (UDG) បានទទួលបានដីសម្បទានពីរដ្ឋាភិបាលវិនិយោគអាកាសយានដ្ឋានតារាសាគរតម្លៃ ២០០ លានដុល្លារ នៅស្រុកបុទុមសាគរ ក្នុងខេត្តកោះកុង។

អាកាសយានដ្ឋានថ្មីនេះ មានផ្លូវយន្តហោះចុះប្រវែង ៣២០០ ម៉ែត្រ ទទឹង ៦០ ម៉ែត្រ ដែលមានសមត្ថភាពអាចទទួលយន្តហោះប្រភេទ A-350-900 និង Boeing 777 ៕