ព័ត៌មានអន្ដរជាតិ

កំណើនសន្ទស្សន៍ផលិតកម្មចិនខែមករា ថយចុះដោយការនាំចេញធ្លាក់ចុះ

បានផុស

១ year មុន

នៅ

ថ្ងៃចន្ទ ៣ កុម្ភៈ ២០២៥

ដោយ

លទ្ធផលស្ទង់មតិឯកជនមួយចេញផ្សាយនៅថ្ងៃចន្ទនេះ បានបង្ហាញថា កំណើនសន្ទស្សន៍ផលិតកម្មចិនប្រចាំខែមករា បានថយចុះ និងខកការរំពឹងទុក ដោយសារតែការនាំចេញធ្លាក់ចុះមុនពេលគោលនយោបាយពន្ធគយរបស់អាមេរិកចូលជាធរមាននាថ្ងៃអង្គារនេះ។ នេះបើតាមការចុះផ្សាយរបស់បណ្ដាញទូរទស្សន៍ CNBC។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការស្ទង់មតិរបស់ដែលធ្វើឡើងដោយក្រុមហ៊ុនប្រព័ន្ធផ្សព្វផ្សាយចិន Caixin និងក្រុមហ៊ុនទីផ្សារអាមេរិក S&P Global បានបង្ហាញថា កំណើនសន្ទស្សន៍អ្នកគ្រប់គ្រងការបញ្ជាទិញ（PMI）នៃឧស្សាហកម្មផលិតកម្មប្រទេសចិននៅខែមករា បានថយចុះមកត្រឹម ៥០,១ ពិន្ទុ ដោយខកការរំពឹងទុក ៥០,៥ ពិន្ទុ របស់ទីភ្នាក់ងារសារព័ត៌មានរ៉យទ័រ។

កាលណា PMI មានលើសពី ៥០ ពិន្ទុ នោះវាបង្ហាញពីកំណើន។ ទោះបីជាយ៉ាងណាក៏ដោយ កំណើនប្រចាំខែមករា បានធ្លាក់ចុះពី ៥០,៥ ពិន្ទុ នៅខែធ្នូ ៥១,៥ ពិន្ទុ នៅខែវិច្ឆិកា និង ៥០,៣ ពិន្ទុ នៅខែតុលា។

តួលេខរបស់ Caixin/S&P Global គឺខុសគ្នា ១ ពិន្ទុ ធៀបនឹងតួលេខផ្លូវការរបស់ការិយាល័យស្ថិតិជាតិចិន ដែលចេញផ្សាយកាលពីថ្ងៃចន្ទសប្ដាហ៍មុន និងបង្ហាញថា PMI នៅខែមករារបស់ចិន បានធ្លាក់ចុះត្រឹម ៤៩,១ ពិន្ទុ ដោយសារតែកម្សោយមុនរដូវចូលឆ្នាំចិន។

យោងតាមការស្ទង់មតិដដែល តម្រូវការក្នុងស្រុកមានភាពប្រសើរឡើងក្នុងខែមករា ខណៈការបញ្ជាទិញនាំចេញថ្មី បានធ្លាក់ចុះក្នុងរយៈពេល២ខែជាប់ៗគ្នា ដោយសារតែតម្រូវការទំនិញប្រើប្រាស់នៅក្រៅប្រទេសបានធ្លាក់ចុះ។

លោក Lynn Song ប្រធានសេដ្ឋវិទូប្រចាំតំបន់ចិននៅក្រុមហ៊ុនសេវាកម្មហិរញ្ញវត្ថុ LNG បានប្រាប់ CNBC ថា ការបញ្ជាទិញពីក្រៅប្រទេសបានចាប់ផ្តើមធ្លាក់ចុះ បន្ទាប់ពីអ្នកនាំចេញបានប្រញាប់ប្រញាល់នាំចេញទំនិញនៅចុងឆ្នាំមុន។ ពួកគេទំនងនៅតែបន្តស្ថិតក្រោមសម្ពាធក្នុងប៉ុន្មានខែខាងមុខនេះ ជាពិសេសប្រសិនបើពន្ធរបស់សហរដ្ឋអាមេរិកពិតជាចូលជាធរមាននៅថ្ងៃទី ៤ ខែកុម្ភៈ»។ លោកបានបន្ថែមថា ការបញ្ជាទិញក្នុងស្រុកនឹងត្រូវដើរតួនាទីកាន់តែធំ ក្នុងការជំរុញវិស័យផលិតកម្មនៅឆ្នាំ ២០២៥។

គួរគូសបញ្ជាក់ថា ប្រធានាធិបតីអាមេរិក លោក ដូណាល់ ត្រាំ កាលពីថ្ងៃសៅរ៍ បានប្រកាសដាក់ពន្ធ ២៥ ភាគរយ លើម៉ិកស៊ិក និងកាណាដា និង ១០ ភាគរយ លើទំនិញចិន។

សេដ្ឋវិទូជាន់ខ្ពស់នៅក្រុមហ៊ុន Caixin Insight Group លោក Wang Zhe បាននិយាយថា៖ «ការកើនឡើងនូវភាពមិនច្បាស់លាស់ក្នុងគោលនយោបាយអន្តរជាតិ អាចធ្វើឱ្យបរិយាកាសនាំចេញរបស់ប្រទេសចិនកាន់តែអាក្រក់ទៅៗ ដែលបង្កឱ្យមានបញ្ហាប្រឈមសំខាន់ៗសម្រាប់សេដ្ឋកិច្ច»។

គួរគូសបញ្ជាក់ថា ពន្ធរបស់ ត្រាំ ត្រូវបានប្រកាសឡើង ចំពេលសេដ្ឋកិច្ចចិនស្ថិតនៅក្នុងភាពស្រពិចស្រពិល។ ខណៈប្រទេសនេះសម្រេចបាននូវគោលដៅកំណើនសេដ្ឋកិច្ច ៥ ភាគរយ នៅឆ្នាំ ២០២៤ រដ្ឋាភិបាលប្រទេសនេះបាន និងកំពុងត្រដាបត្រដួសដើម្បីជំរុញកំណើន ចំពេលដែលតម្រូវការក្នុងស្រុកបន្តខ្សោយ ហើយវិបត្តិអចលនទ្រព្យបន្តជាប់គាំង ដែលធ្វើឱ្យការនាំចេញជាកត្តាជំរុញកំណើនសេដ្ឋកិច្ច៕