ព័ត៌មានអន្ដរជាតិ

ត្រាំ គ្រោងប្រកាសពន្ធសងសឹក លើប្រទេសដាក់ពន្ធលើទំនិញអាមេរិក

បានផុស

១ year មុន

នៅ

ថ្ងៃអង្គារ ១១ កុម្ភៈ ២០២៥

ដោយ

ប្រធានាធិបតីសហរដ្ឋអាមេរិក លោក ដូណាល់ ត្រាំ បានឱ្យដឹងកាលពីថ្ងៃចន្ទថា លោកគ្រោងប្រកាសផែនការដាក់ «ពន្ធសងសឹកឱ្យស្មើភាពគ្នា» លើគ្រប់ប្រទេសទាំងអស់ដែលដាក់ពន្ធលើទំនិញរបស់សហរដ្ឋអាមេរិក។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

លោក ត្រាំ បញ្ជាក់ការណ៍នេះជាថ្មីម្ដងទៀត ទៅកាន់អ្នកកាសែតនៅ បាននិយាយទៅកាន់អ្នកសារព័ត៌មាននៅក្នុងការិយាល័យអូវ៉ល នៃសេតវិមាន ខណៈលោកចុះហត្ថលេខាលើការបញ្ជាទិញចំនួន ២ ដែលបញ្ចប់ការលើកលែងពន្ធដែកថែប និងអាលុយមីញ៉ូមនាំចូល ហើយបង្កើនពន្ធលើលោហៈទាំង២ដល់ ២៥ ភាគរយ ។ លោកឱ្យដឹងផងដែរថា លោកកំពុងពិចារណាដាក់ពន្ធលើរថយន្ត បន្ទះឈីប និងថ្នាំពេទ្យជាដើម។

ពេលសួរអំពីលទ្ធភាពដែលប្រទេសផ្សេងទៀតអាចនឹងសងសឹកប្រឆាំងពន្ធរបស់សហរដ្ឋអាមេរិក លោក ត្រាំ បាននិយាយថា៖ «ខ្ញុំមិនខ្វល់ទេ»។ លោកបន្តថា៖ «វាមិនយុត្តិធម៌ទេដែលប្រទេសផ្សេងទៀតបានទាញយកផលប្រយោជន៍ពីយើងអស់រយៈពេលជាច្រើនឆ្នាំ ហើយឥឡូវនៅសុខៗ បែរជាយើងមិនអាចដាក់ពន្ធលើគេវិញ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ត្រាំ បានប្រាប់បណ្ដាញទូរទស្សន៍ Fox News ក្នុងបទសម្ភាសន៍ថា លោកនឹងប្រកាស «ផែនការដ៏ស្មុគ្រស្មាញ» សម្រាប់ពន្ធគយសងសឹក ប្រហែលជាថ្ងៃចន្ទ ឬថ្ងៃអង្គារ។

គួរគូសបញ្ជាក់ថា ពាក្យពន្ធសងសឹកឱ្យស្មើភាពគ្នា ឬ Reciprocal Tariff របស់ ត្រាំ សំដៅទៅលើគំនិតនៃការដំឡើងពន្ធលើប្រទេសផ្សេងទៀត ដើម្បីឆ្លើយតបទៅនឹងពន្ធដែលពួកគេបានដាក់លើទំនិញរបស់សហរដ្ឋអាមេរិក។

ជារឿយៗ លោក ត្រាំ បានប្រកែកថា សហរដ្ឋអាមេរិករងភាពអយុត្តិធម៌នៅក្នុងពាណិជ្ជកម្ម ដូច្នេះលោកបានប្រើពន្ធគយប្រភេទនេះ ជាមធ្យោបាយមួយដើម្បីបង្កើតភាពស្មើគ្នា ដោយធ្វើឱ្យប្រាកដថា ប្រទេសផ្សេងទៀតបង់ពន្ធស្រដៀងគ្នាលើការនាំចូលរបស់ខ្លួនគេទៅកាន់សហរដ្ឋអាមេរិក ដូចដែលសហរដ្ឋអាមេរិកត្រូវបង់ពន្ធលើការចេញរបស់ខ្លួនទៅកាន់ប្រទេសរបស់ពួកគេដែរ៕