ថៃ ម៉ាឡេស៊ី ឥណ្ឌូណេស៊ី​ ជំរុញប្រព័ន្ធប្រតិបត្តិការរូបិយប័ណ្ណក្នុងស្រុករួម

ធនាគារកណ្ដាលនៃប្រទេសថៃ ម៉ាឡេស៊ី និងឥណ្ឌូណេស៊ី ​កាលពីថ្ងៃចន្ទ បានប្រកាសពីការអនុម័តគោលការណ៍ណែនាំប្រតិបត្តិការទូទាត់​រូបិយប័ណ្ណក្នុងស្រុក (LCTF OG) រួម​គ្នា និងការពង្រីកប្រតិបត្តិការទូទាត់ប្រាក់ឆ្លងដែនដែលអាចធ្វើបាន​ក្រោម​​ក្របខណ្ឌនេះ។ ​

ធនាគារកណ្ដាលទាំង ៣ បាន​និយាយក្នុងសេចក្ដីថ្លែងការណ៍រួមថា​៖ «LCTF OG រួមគ្នា​ បង្កើនភាពស៊ីសង្វាក់គ្នា ការពង្រីកវិសាលភាព​ និងប្រសិទ្ធភាពក្នុងការសម្របសម្រួលប្រតិបត្តិការរូបិយប័ណ្ណក្នុងស្រុកនៅទូទាំងប្រទេសទាំង៣។ វាបង្រួបបង្រួមគោលការណ៍ណែនាំទ្វេភាគីដែលបានបង្កើតឡើងពីមុនរវាងប្រទេសភាគី និងអនុញ្ញាតឱ្យដំណើរការ​ប្រកបដោយតម្លាភាពជាងមុនសម្រាប់ស្ថាប័នហិរញ្ញវត្ថុដែលចូលរួម និងអ្នកប្រើប្រាស់របស់ពួកគេ»។

ធនាគារ​ដដែល​បន្ថែម​ថា​ ​ក្របខណ្ឌចុងក្រោយបង្អស់ក៏រួមបញ្ចូលផងដែរនូវការវិនិយោគផលប័ត្រ ដែលជាប្រតិបត្តិការមូលដ្ឋាន​​ បន្ថែមពីលើការធ្វើពាណិជ្ជកម្មលើទំនិញ និងសេវាកម្ម និងការវិនិយោគផ្ទាល់។ ធនាគារបន្ត​ថា ឥឡូវនេះវិនិយោគិនមានឱកាសកាន់តែច្រើនដើម្បីធ្វើប្រតិបត្តិការជារូបិយប័ណ្ណក្នុងស្រុក ខណៈ​កាត់បន្ថយហានិភ័យនៃអត្រាប្តូរប្រាក់។ ​

ជាមួយ​នឹង​ការប្រកាសចុងក្រោយ​ ធនាគារកណ្ដាលថៃ ម៉ាឡេស៊ី និងឥណ្ឌូណេស៊ី​ បាន​ស្វាគម​ធនាគារពាណិជ្ជ​ឱ្យ​ចូលរួម និងគាំទ្រ LCTF ​ដោយ​ពួកគេ​នឹងដើរតួយ៉ាងសំខាន់ក្នុងការសម្របសម្រួលប្រតិបត្តិការរូបិយប័ណ្ណក្នុងស្រុក ការ​ប្រើប្រាស់ជំនាញរបស់ពួកគេ កម្លាំងប្រតិបត្តិការ និងបណ្តាញឆ្លងដែន។

សេចក្ដីថ្លែងការណ៍និយាយទៀតថា ប្រទេស​ថៃ ឥណ្ឌូណេស៊ី និងម៉ាឡេស៊ី បានមើលឃើញពីនិន្នាការកើនឡើងនៃប្រតិបត្តិការរូបិយប័ណ្ណក្នុងស្រុកសម្រាប់ការជួញដូរទ្វេភាគី ចាប់តាំងពីការអនុវត្ត LCTF ។ ក្របខ័ណ្ឌ និងប្រតិបត្តិការរួម​គ្នានេះ នឹងផ្តល់ឱ្យអាជីវកម្មនូវជម្រើសដ៏ប្រសើរ​សម្រាប់ប្រតិបត្តិការឆ្លង​ដែន ខណៈ​បញ្ជាក់ជាថ្មី​នូវការប្តេជ្ញាចិត្តរបស់ប្រទេសទាំង៣ ក្នុងការលើកកម្ពស់ការប្រើប្រាស់រូបិយប័ណ្ណក្នុងស្រុកសម្រាប់​ពាណិជ្ជកម្ម និងការវិនិយោគក្នុងតំបន់៕

​

​