ព័ត៌មានអន្ដរជាតិ

ក្រសួងហិរញ្ញវត្ថុវៀតណាម ស្នើកាត់បន្ថយពន្ធលើរថយន្តនាំចូលមួយចំនួន

បានផុស

១ year មុន

នៅ

ថ្ងៃពុធ ២ មេសា ២០២៥

ដោយ

ក្រសួងហិរញ្ញវត្ថុវៀតណាម កំពុងស្នើឱ្យមានការកែសម្រួលលើអត្រាពន្ធលើប្រភេទរថយន្តមួយចំនួន ដែលនាំចូលពីប្រទេសទទួលបានការអនុគ្រោះបំផុត (MFN)។ នេះបើតាមការចុះផ្សាយរបស់កាសែត Viet Nam News។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គំនិតផ្តួចផ្តើមនេះ មានគោលបំណងធ្វើពិពិធកម្មការផ្គត់ផ្គង់រថយន្តនាំចូល ជំរុញការប្រកួតប្រជែងក្នុងទីផ្សារក្នុងស្រុក និងកែសម្រួលគោលនយោបាយពន្ធរបស់វៀតណាមឱ្យស្របនឹងនិន្នាការវិវត្តនៃឧស្សាហកម្មរថយន្ត។

នៅក្រោមបទប្បញ្ញត្តិបច្ចុប្បន្ន រថយន្តមួយចំនួន ដែលចាត់ថ្នាក់ក្រោមកូដ 8703.23.63 (រថយន្តដឹកអ្នកដំណើរមានកម្លាំងម៉ាស៊ីនលើសពី ២ ០០០ cc ប៉ុន្តែមិនលើសពី ២ ៥០០), 8703.23.57 (រថយន្តប្រភេទសេដាន់មានកម្លាំងម៉ាស៊ីនដូចគ្នា) និង 8703.24.51 (រថយន្តប្រភេទ 4×4) ត្រូវទទួលរងនូវអត្រាពន្ធនាំចូលសម្រាប់ MFN ខ្ពស់។ ដើម្បីកែលម្អទីផ្សារ និងលើកកម្ពស់ការប្រកួតប្រជែង ក្រសួងហិរញ្ញវត្ថុស្នើឱ្យកាត់បន្ថយអត្រាពន្ធនាំចូលសម្រាប់ MFN ។

ពន្ធសម្រាប់រថយន្ត ក្រោមកូដ HS 8703.23.63 និង 8703.23.57 គួរទទួលបានការកាត់បន្ថយពន្ធពី ៦៤ ភាគរយ នាពេលបច្ចុប្បន្ន មកត្រឹម ៣២ ភាគរយ ដោយស្របតាមការប្តេជ្ញាចិត្តក្នុងកិច្ចព្រមព្រៀងគ្រប់ជ្រុងជ្រោយ និងជឿនលឿនសម្រាប់ភាពជាដៃគូអន្តរប៉ាស៊ីហ្វិក (CPTPP) របស់វៀតណាមសម្រាប់ឆ្នាំ ២០២៥ ។ ពន្ធសម្រាប់រថយន្តក្រោមកូដ HS 8703.24.51 នឹងត្រូវបញ្ចុះពី ៤៥ ភាគរយទៅ ៣២ ភាគរយ ដើម្បីធានាបាននូវភាពស៊ីសង្វាក់គ្នា លើប្រភេទយានយន្តស្រដៀងគ្នា។

គួរគូសបញ្ជាក់ថា វៀតណាមអនុវត្តអត្រាពន្ធអនុគ្រោះសម្រាប់រថយន្តទាំងនេះ ក្រោមកិច្ចព្រមព្រៀងពាណិជ្ជកម្មសេរីផ្សេងៗ (FTA) ដូចជា កិច្ចព្រមព្រៀងស្ដីពីពាណិជ្ជកម្មទំនិញអាស៊ាន (ATIGA) ដែលកំណត់ពន្ធនាំចូលក្នុងអត្រា ០ ភាគរយ ខណៈ FTA ផ្សេងទៀត រួមទាំង CPTPP កំណត់អត្រាពន្ធចាប់ពី ២៥-៣១,៨ ភាគរយ។

គេមើលឃើញថា ទីផ្សាររថយន្តរបស់វៀតណាមនាពេលបច្ចុប្បន្នមានទំហំប្រចាំឆ្នាំប្រហែល ៥១០ ០០០ គ្រឿង ដោយក្នុងនោះ មាន ៣៣៨ ០០០ គ្រឿងត្រូវបានផលិត និងដំឡើងក្នុងស្រុក ខណៈ ១៧៣ ០០០ ត្រូវបាននាំចូល ភាគច្រើនមកពីប្រទេសអាស៊ានមានក្នុង ATIGA៕