ព័ត៌មានអន្ដរជាតិ

អ៊ីស្រាអែលយកបានសាកសពចំណាប់ខ្មាំងពីរនាក់មកវិញ ចំពេលជម្លោះហ្គាហ្សាកំពុងបន្ត

បានផុស

៣៤ វិនាទី មុន

នៅ

ថ្ងៃសុក្រ ៦ មិថុនា ២០២៥

ដោយ

អ៊ីស្រាអែលបានប្រកាសពីការយកបានសាកសពចំណាប់ខ្មាំងជនជាតិអាមេរិកដើមកំណើតអ៊ីស្រាអែលពីរនាក់គឺ លោកស្រី Judith Weinstein និង លោក Gad Haggai ជាប្ដីប្រពន្ធនឹងគ្នាដែលត្រូវបានចាប់ពង្រត់ និងសម្លាប់ក្នុងអំឡុងពេលការវាយប្រហាររបស់ក្រុមហាម៉ាសកាលពីថ្ងៃទី ៧ខែតុលា ឆ្នាំ ២០២៣។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី០៦ខែឧសភានេះ។

(ប្រជាជនចូលរួមក្នុងការតវ៉ាទាមទារឲ្យបញ្ចប់សង្គ្រាម និងដោះលែងចំណាប់ខ្មាំង។ រូបភាព៖ AP

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សាកសពទាំងពីរត្រូវបានយកមកវិញនៅក្នុងប្រតិបត្តិការពិសេសមួយនៅទីក្រុង Khan Younis ដោយយោធាអ៊ីស្រាអែល និង ភ្នាក់ងារសន្តិសុខប្រឆាំងចារកម្ម Shin Bet របស់អ៊ីស្រាអែល។ ប្តីប្រពន្ធដែលមានអាយុ៧០ និង ៧២ឆ្នាំនេះគឺជាអ្នករស់នៅក្នុងសហគមន៍ Nir Oz របស់អ៊ីស្រាអែល មានប្រវត្តិការអប់រំល្អ និងសិល្បៈនៃការធ្វើម្ហូប។ ការស្លាប់របស់ពួកគេត្រូវបានបញ្ជាក់កាលពីខែធ្នូឆ្នាំមុន។

ការងើបឡើងវិញនៃជម្លោះនេះកើតឡើងនៅពេលដែលការវាយប្រហារតាមអាកាសរបស់អ៊ីស្រាអែលបន្តនៅទូទាំងតំបន់ហ្គាហ្សា ដោយយ៉ាងហោចណាស់មានជនជាតិប៉ាឡេស្ទីន ២២នាក់ បានស្លាប់នៅក្នុងការវាយប្រហារចុងក្រោយនេះ រួមទាំងអ្នកកាសែតបីនាក់នៅជិតមន្ទីរពេទ្យ al-Ahli ។

អ៊ីស្រាអែល បានអះអាងថា ខ្លួនបានកំណត់គោលដៅលើក្រុមសកម្មប្រយុទ្ធ ប៉ុន្តែការស្លាប់ជនស៊ីវិលនៅតែមានចំនួនស្លាប់ច្រើន។ ប្រជាជនប៉ាឡេស្ទីនជាង ៥៤០០០នាក់ ត្រូវបានសម្លាប់ចាប់តាំងពីសង្រ្គាមបានចាប់ផ្តើម ខណៈ៩០% នៃចំនួនប្រជាជនត្រូវបានផ្លាស់ទីលំនៅ។ នេះបើយោងតាមក្រសួងសុខាភិបាលហ្គាហ្សា។

(រូបភាព៖ AP) Judith Weinstein និង Gad Haggai

កិច្ចខិតខំប្រឹងប្រែងក្នុងការផ្តល់ជំនួយមនុស្សធម៌ក៏បានរងនូវការធ្លាក់ចុះដែរ។ អ្នកបើកបរឡានដឹកជំនួយជនជាតិប៉ាឡេស្ទីនម្នាក់ត្រូវបានសម្លាប់ និងមនុស្សផ្សេងទៀតបានរងរបួស ដោយសារខ្មាន់កាំភ្លើងបានវាយប្រហារលើក្បួនរថយន្តជំនួយរបស់អង្គការសហប្រជាជាតិ ដែលដឹកនាំក្រុមដឹកជញ្ជូនក្នុងតំបន់ឱ្យផ្អាកប្រតិបត្តិការ។

ការចែកចាយជំនួយនៅមានកម្រិតនៅឡើយ ដោយសារតែការរឹតបន្តឹងពីខាងយោធាអ៊ីស្រាអែល និងការលួចប្លន់ ធ្វើឱ្យហានិភ័យទុរ្ភិក្សកាន់តែអាក្រក់នៅក្នុងតំបន់ហ្គាហ្សា។

គួរបញ្ជាក់ថា សង្គ្រាមអ៊ីស្រាអែល-ប៉ាឡេស្ទីន បានចាប់ផ្តើមបន្ទាប់ពីពួកសកម្មប្រយុទ្ធដឹកនាំដោយក្រុមសកម្មប្រយុទ្ធហាម៉ាស បានសម្លាប់មនុស្សប្រហែល ១២០០នាក់ នៅក្នុងប្រទេសអ៊ីស្រាអែល និងបានចាប់ពង្រត់ធ្វើជាចំណាប់ខ្មាំងចំនួន ២៥១នាក់។ ខណៈពេលដែលមនុស្សមួយចំនួនត្រូវបានដោះលែង ឬត្រូវបានជួយសង្គ្រោះ ប៉ុន្តែ ៥៦នាក់ទៀតនៅតែស្ថិតក្នុងការជាប់ឃុំឃាំង ដោយមានតែប្រហែលមួយភាគបីប៉ុណ្ណោះដែលត្រូវបានគេជឿថានៅមានជីវិត៕