ឱក សុគន្ធកញ្ញា មោទនភាពបានចូលរួមក្នុងកម្មវិធីប្រកួតក្រុមភ្លេងកាយរឹទ្ធិថ្នាក់ជាតិ លើកទី២​

កំពូលតារាចម្រៀង ឱក សុគន្ធកញ្ញា ក្នុងនាមទូតសុច្ឆន្ទៈនៃកាយរឹទិ្ធជាតិកម្ពុជា បានបង្ហាញអារម្មណ៍រំភើបនិងមោទនភាពជាខ្លាំង បន្ទាប់ពីមានឱកាសចូលរួមក្នុងកម្មវិធីប្រកួតក្រុមភ្លេងកាយរឹទ្ធិថ្នាក់ជាតិ លើកទី២ ​តាមរយ:ការច្រៀងនិងសម្តែងចែកជូនបងប្អូនទស្សនា។

អ្នកនាង ឱក សុគន្ធកញ្ញា បានរៀបរាប់ថា ក្នុងនាមខ្លួនជាទូតសុច្ឆន្ទៈនៃកាយរឹទិ្ធជាតិកម្ពុជា ពិតជាមានសេចក្តីសោមនស្សរីករាយដែលបានចូលរួមនៅក្នុងកម្មវិធីការប្រកួតក្រុមភ្លេងកាយរឹទ្ធិថ្នាក់ជាតិលើកទី២​ ក្រោមប្រធានបទ​ “ភ្លេងកាយរឹទ្ធិ​ ដើម្បីមហាបវរវិបុលភាព។

តារាចម្រៀងល្បីឈ្មោះរូបនេះបន្តថា “នេះលើកទីមួយ សម្រាប់នាងខ្ញុំជាមួយកម្មវិធីថ្នាក់ជាតិកាយរឹទ្ធិហើយក៏ទទួលបាននូវមហាកិត្តិយស និង ការស្រឡាញ់រាប់អានស្វាគមន៍យ៉ាងកក់ក្តៅពីសំណាក់ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំយុវជន និងកីឡា កាយរឹទ្ធរៀមច្បង កាយរឹទ្ធប្អូន ព្រមទាំងក្រុមការងារគ្រប់ជាន់ថ្នាក់ មកលើរូបនាងខ្ញុំ ដែលជាទូតសុឆន្ទៈកាយរឹទ្ធិជាតិកម្ពុជា”។

តារាចម្រៀងរូបនេះ បន្ថែមថា ទាំងនេះគឺជាសក្ខីភាពនៃក្តីស្រឡាញ់ប្រកបដោយគុណតម្លៃយ៉ាងជ្រាលជ្រៅ រួមទាំងស្នាមញញឹម កម្លាំងចិត្តដ៏មហិមា មិនថាក្រុមការងារនិងក្រុមភ្លេងកាយរឹទ្ធិមកពីគ្រប់រាជធានីខេត្ត និងជាពិសេសសំឡេងហ៊ោកញ្ជ្រៀវយ៉ាង​កងរំពង​របស់អ្នកដែលមានវត្តមាននៅទីនោះ បានផ្តល់នូវអនុស្សាវរីយ៍ដ៏គួរឱ្យចងចាំ។ អ្នកនាង ឱក សុគន្ធកញ្ញា ថា ខ្លួនចងចាំដិតជាប់​ក្នុងចិត្តមិនអាចបំភ្លេចបាន​នូវ​ភាព​អស្ចារ្យ​ប្រកបដោយគុណតម្លៃដ៏មហាសាលមួយនេះ។

គួរជម្រាបដែរថា តារាចម្រៀង ឱក សុគន្ធកញ្ញា ទើបតែត្រូវបានក្រសួងអប់រំ ប្រកាសជាទូតសុច្ឆន្ទៈកាយរឹទ្ធិជាតិកម្ពុជា កាលពីថ្មីៗកន្លងទៅនេះ។ ក្នុងនាមជាទូតសុឆន្ទៈ អ្នកនាងបានបេ្តជ្ញាចិត្តបំពេញតួនាទីឱ្យបានល្អបំផុត ដើម្បីលើកកម្ពស់ការអប់រំយុវជននៅក្នុងប្រទេសកម្ពុជា និងបានចូលរួមក្នុងកម្មវិធីប្រកួតក្រុមភ្លេងកាយរឹទ្ធិថ្នាក់ជាតិ លើកទី២ កាលពីថ្ងៃទី៤ ខែមិថុនានេះផងដែរ។ 

ក្នុងកម្មវិធីប្រកួតក្រុមភ្លេងកាយរឹទ្ធិថ្នាក់ជាតិ លើកទី២ នេះ ម្ចាស់ជ័យលាភីលេខ ១ បានទៅលើក្រុមភ្លេងព្យុហយាត្រាកាយរឹទ្ធិ ខេត្តឧត្តរមានជ័យ; ជ័យលាភីលេខ ២ បានទៅលើខេត្តកោះកុង និងជ័យលាភីលេខ ៣ បានទៅលើក្រុមភ្លេងកាយរឹទ្ធិ ខេត្តកណ្តាល៕ ចាន់រ៉ា