ត្រាំ​ ដកស្មាតហ្វូន កុំព្យូព័រ គ្រឿងអេឡិចត្រូនិកផ្សេងទៀត ពីបញ្ជីពន្ធបដិការ

ប្រធានាធិបតីអាមេរិក​ លោក ដូណាល់ ត្រាំ បាន​ដកស្មាតហ្វូន កុំព្យូទ័រ និងឧបករណ៍បច្ចេកវិទ្យាអេឡិចត្រូនិក​ និងសមាសធាតុផ្សេងទៀត ចេញពីបញ្ជីពន្ធគយបដិការរបស់​លោក ជាពិសេសលើចិន​។ នេះបើតាម​ការចុះផ្សាយរបស់​បណ្ដាញទូរទស្សន៍ CNBC ដោយ​ផ្អែកលើ​ការណែនាំថ្មីពីភ្នាក់ងារ​គយ និងការពារព្រំដែនសហរដ្ឋអាមេរិក​ (CBP)។

ការណែនាំ ដែលបានចេញផ្សាយកាលពីល្ងាចថ្ងៃសុក្រ ត្រូវបាន​ដាក់ចេញឡើង បន្ទាប់ពីលោក ត្រាំ នៅខែនេះ បាន​ដាក់ពន្ធលើទំនិញចិនគ្រប់មុខជាបន្តបន្ទាប់រហូតដល់ ១៤៥ ភាគរយ ដែល​គំរាម​កំហែង​ដល់​អាជីវកម្មក្រុមហ៊ុនបច្ចេកវិទ្យាអាមេរិក​ផ្សេងៗ ដូចជា Apple ដែលពឹង​ផ្អែក​ខ្លាំងលើការនាំចូលផលិតផលរបស់​ខ្លួន​ពីប្រទេស​ផលិតកម្មចិន​ និង​ប្រទេសផ្សេងៗទៀត។

ការណែនាំដដែល ក៏រួមបញ្ចូលផងដែរនូវការលើកលែងពន្ធចំពោះឧបករណ៍ និងសមាសធាតុអេឡិចត្រូនិកផ្សេងទៀត រួមទាំងបន្ទះឈីប​ បន្ទះថាមពលពន្លឺព្រះអាទិត្យ អេក្រង់ទូរទស្សន៍រាបស្មើ ដ្រាយវ៍ពន្លឺ និងកាតអង្គចងចាំ ជាដើម។

កាលពីថ្ងៃសៅរ៍ សេតវិមានបាននិយាយថា ការលើកលែងត្រូវបានធ្វើឡើងដោយសារតែលោក ត្រាំ ចង់ធានាថា ក្រុមហ៊ុនទាំងនោះ មានពេលវេលាដើម្បីផ្លាស់ទីផលិតកម្មទៅសហរដ្ឋអាមេរិក។

ទំនិញ​ចំនួន ២០ មុខ​ ដែលបានរាយក្នុងគោលការណ៍ណែនាំរបស់ CBP ជាក់ស្តែង ត្រូវបានលើកលែងពីពន្ធ ១២៥ ភាគរយ ដែលដាក់ដោយ​លោក ត្រាំ លើការនាំចូលពីចិន និង ១០ ភាគរយ លើការនាំចូលពីប្រទេសផ្សេងៗទៀត។ ពន្ធ ២០ ភាគរយ លើចិន​ ពាក់ព័ន្ធនឹង​បញ្ហាថ្នាំញៀនហ្វេនតានីល នៅតែបន្តជាធរមាន។

អ្នកវិភាគនៅក្រុមហ៊ុនសេវាកម្មហិរញ្ញវត្ថុ Wedbush បាន​និយាយថា ការលើកលែងពន្ធចុង​ក្រោយនេះ គឺ «ព័ត៌មានល្អបំផុតសម្រាប់អ្នកវិនិយោគបច្ចេកវិទ្យា។ Wedbush បាននិយាយនៅក្នុងសេចក្តីថ្លែងការណ៍ថា៖ «ក្រុមហ៊ុនបច្ចេកវិទ្យាធំ ៗ ដូចជា Apple, Nvidia, Microsoft និងឧស្សាហកម្មបច្ចេកវិទ្យាផ្សេងទៀត អាចដកដង្ហើមបានធូរស្រាលហើយ»៕