តម្លៃមាសបំបែកកំណត់ត្រាថ្មីខ្ពស់បំផុតជាង ៤ ពាន់ដុល្លារ ក្នុងមួយតម្លឹង

តម្លៃហាងឆេងមាសហក់ឡើងវិញដល់ជាង ៤ ពាន់ដុល្លារ ក្នុងមួយតម្លឹង នៅប្រទេសកម្ពុជា ជំរុញ​​ដោយសង្គ្រាមពា​ណិជ្ជកម្មរវាងចិន និងអាមេរិក។

លោក ឡុង សំណាង ​ប្រធានផ្នែកប្រឹក្សាយោបល់ហិរញ្ញវត្ថុក្រុមហ៊ុន ​PP Link securities ប្រាប់កម្ពុជាថ្មីថា នៅ​ពេលដែលតម្លៃហាងឆេងមាស​បានធ្លាក់ចុះនៅតម្លៃទាប វិនិយោគិនធំៗ និងធនាគារឯកជនធំៗចាប់ផ្ដើមទិញវិញ ខណៈ​សន្ទុះនៃការបញ្ជាទិញបានកើនឡើង​ខ្ពស់​នៅ​រយៈ​​​ពេលប៉ុន្មានថ្ងៃនេះ ដែលរុញច្រាន​ដោយសម្ពាធពន្ធឆ្លើយឆ្លងគ្នាទៅវិញ​ទៅមករវាង​ប្រទេស​ចិន និងអាមេរិក ធ្វើឱ្យសម្ពាធ​នៃប្រាក់ដុល្លារធ្លាក់ចុះ ខណៈតម្លៃពន្ធប៉ះពាល់ទៅដល់​ពាណិជ្ជ​កម្ម​ ឬសេដ្ឋកិច្ច ធ្វើឱ្យតម្លៃ​ហាងឆេងមាសហក់ឡើង។

លោក ឡុង សំណាង យល់ថា៖ «ប្រសិនបើសហរដ្ឋអាមេរិក ដាក់សម្ពាធពន្ធទៅវិញទៅ​មកជាមួយបណ្ដាប្រទេសមួយចំនួនដែលមានសេដ្ឋកិច្ចទាប ឬក៏ឱនភាពពាណិជ្ជកម្ម​ជាមួយ​អា​មេ​រិក វានៅតូច មិនសូវមានផលប៉ះពាល់ទៅដល់ ហាង​ឆេងមាស ឬសេដ្ឋកិច្ច​លើពិភ​ព​លោកទេ ប៉ុន្តែបើសិន​ជាសម្ពាធពន្ធ ឬក៏ការឌឺដងសងសឹកគ្នាទៅវិញទៅមករវាងអាមេរិក និង​ប្រទេសចិន អាហ្នឹងជាបញ្ហាធំមួយ ដែលធ្វើឱ្យសេដ្ឋកិច្ចលើពិភពលោកអាចគាំងស្ទះ ឬក៏សេដ្ឋកិច្ច​ថម​ថយ​ខ្លាំង​ ដែល​រុញច្រានឱ្យប្រាក់ដុល្លារថយដែរ ហើយបណ្ដាវិនិយគិនធំៗ ឬធនាគារឯកជន​ធំៗ​​គេ​តែង​​តែមើល​ឃើញប្រទេសពីរហ្នឹង ប្រសិនបើប្រទេសពីរហ្នឹង​មានបញ្ហាមិន​​ល្អនឹងគ្នា​ទំនុ​ក​ចិត្ត​​​និង​ការវិនិយោគគេនឹងដើរទៅតាមហ្នឹងហើយ»។

តម្លៃហាងឆេងមាសបន្តកើនឡើងដល់ ៣៣៥២ ដុល្លារ ក្នុងមួយអោននៅទីផ្សារអន្តរជាតិ ឬស្មើ​នឹង ៤០៣៨ ដុល្លារ ក្នុងមួយតម្លឹងនៅកម្ពុជានៅថ្ងៃទី ១៧ ខែមេសា ឆ្នាំ ២០២៥។ សម្រាប់ហាងនានាក្នុងរាជធានីភ្នំពេញ លក់ចេញក្នុងតម្លៃ ៣ ៩៦ ដុល្លារ ក្នុងមួយជី៕

អត្ថបទ៖ ឡេង ដេត