NBC គ្រោងនឹងពិភាក្សាជាមួយក្រសួងអប់រំដើម្បីដាក់បញ្ចូលមុខវិជ្ជាសហគ្រិនភាពក្នុងកម្មវិធីសិក្សា

ធនាគារជាតិនៃកម្ពុជា(NBC) គ្រោងនឹងពិភាក្សាជាមួយក្រសួងអប់រំយុវជននិងកីឡាក៏ដូចជាអង្គការអន្តរជាតិនានាដើម្បីដាក់បញ្ចូលមុខវិជ្ជាសហគ្រិនភាពទៅក្នុងកម្មវិធីសិក្សាចំណេះដឹងទូទៅដើម្បីឱ្យសិស្សានុសិស្សមានចំណេះជំនាញតាំងពីតូចហើយឈប់ការសិក្សាអាចទៅប្រកបរបរចិញ្ចឹមជីវិតបានប្រសើរ។

ថ្លែងក្នុងសិក្ខាសាលា ស្តីពី “ការលើកកម្ពស់ចំណេះដឹងផ្នែកហិរញ្ញវត្ថុ និងសហគ្រិនភាពដល់អ្នកសេដ្ឋកិច្ចក្រៅប្រព័ន្ធ នៅវិទ្យាស្ថានសិក្សាបច្ចេកទេសធនាគារ នៅថ្ងៃទី២៣មេសានេះលោកស្រីបណ្ឌិត ជា សិរី ទេសាភិបាល ធនាគារជាតិនៃកម្ពុជាបានមានប្រសាសន៍ថាធនាគារជាតិគ្រោងនឹងពិភាក្សាជាមួយក្រសួងអប់រំយុវជននិងកីឡានិងអង្គការអន្តរជាតិមួយចំនួនដើម្បីដាក់បញ្ចូលសហគ្រិនភាពទៅក្នុងកម្មវិធីសិក្សាតាំងពីតូចទៅព្រោះថាក្មេងស្រីបើទោះបីជាគាត់មានអាយុ៨ឬ៩ឆ្នាំពេលចេញពីសាលាដល់ពេលមានគ្រួសារត្រូវមានអាជីពមួយចិញ្ចឹមជីវិត។

លោកស្រីបណ្ឌិតបានបន្តថា« បើគាត់(ក្មេងស្រី)មានចំណេះជំនាញតាំងពីតូចទៅគាត់អាចប្រកបមុខរបរអ្វីមួយបាន។អីចឹងការរៀនសូត្ររឿងលុយកាក់នេះសំខាន់មែនទែន»។

លោកស្រីបណ្ឌិតបានបន្តទៀតថាបច្ចុប្បន្នធនាគារជាតិនៃកម្ពុជា ក្រោមកិច្ចសហការជាមួយ ក្រសួង អប់រំ យុវជន និងកីឡា បានបញ្ញាបចំណេះដឹងផ្នែកហិរញ្ញវត្ថុទៅក្នុងកម្មវិធីសិក្សាចំណេះដឹងទូទៅ ពីថ្នាក់ទី១ ដល់ថ្នាក់ទី១២ លើមុខវិជ្ជា គណិតវិទ្យា និងសីលធម៌-ពលរដ្ឋវិជ្ជា។

ជាមួយគ្នានេះ ធនាគារជាតិនៃកម្ពុជាក៏បានរៀបចំសិក្ខាសាលា និងផ្សព្វផ្សាយជាសាធារណៈស្តីពី ការលើកកម្ពស់ ការយល់ដឹង កិច្ចការពារអតិថិជន និងការប្រើប្រាស់សេវាហិរញ្ញវត្ថុប្រកបដោយប្រសិទ្ធភាព ស្ថិរភាព និងតម្លាភាព ព្រមទាំងបានសហការជាមួយដៃគូអភិវឌ្ឍន៍ក្នុងការផ្សព្វផ្សាយចំណេះដឹងផ្នែកហិរញ្ញវត្ថុ និងហិរញ្ញវត្ថុឌីជីថលផងដែរ។

លោកស្រីបណ្ឌិតបានបន្ថែមថា« ការដែលយើងអប់រំក្មេងពីថ្នាក់ទី១ដល់ថ្នាក់ទី១២ឱ្យយល់ដឹងពីហិរញ្ញវត្ថុនេះមានសារសំខាន់ណាស់ព្រោះថាមិនត្រឹមតែឱ្យពួកគាត់បានយល់ពីរឿងការចាយវាយលុយប៉ុណ្ណោះទេពោលគឺឱ្យចេះសន្សំនិងចាយវាយប្រកបដោយការទទួលខុសត្រូវ។»

គួរបញ្ជាក់ថាចំណេះដឹងផ្នែកហិរញ្ញវត្ថុ សំដៅទៅលើចំណេះដឹងនិងសមត្ថភាពក្នុងការយល់ដឹងអំពី ដំណើរការសន្សំនិងការចាយវាយប្រចាំថ្ងៃ។ គោលដៅចម្បងរបស់ចំណេះដឹងផ្នែកហិរញ្ញវត្ថុគឺការ អប់រំឱ្យមនុស្សចេះគ្រប់គ្រងថវិការបស់ខ្លួន និងយល់ពីសារៈសំខាន់អំពីការសន្សំប្រាក់និងការវិនិយោគ ដើម្បីទទួលបានសេរីភាពផ្នែកហិរញ្ញវត្ថុនិងជីវភាពធូរធារនាពេលអនាគត៕

អត្ថបទ៖សំអឿន