ការបិទអាជីវកម្មនៅថៃ កើនឡើងក្នុងរយៈពេល ៤ ខែដើមឆ្នាំ

នាយកដ្ឋានអភិវឌ្ឍន៍ពាណិជ្ជកម្មថៃ បានឱ្យដឹងថា ការបិទអាជីវកម្មនៅក្នុងប្រទេសថៃបាន​កើនឡើង ដោយសារតែបំណុលគ្រួសារខ្ពស់ ចំពេលដែលភាពមិនប្រាកដប្រជនពន្ធគយរបស់អាមេរិក​កំពុងបន្ថែមសម្ពាធ។ នេះបើតាមការចុះផ្សាយរបស់កាសែតបាងកកប៉ុស្តិ៍កាលពីថ្ងៃព្រហស្បតិ៍។

ក្នុងរយៈពេល ៤ ខែ ដើមឆ្នាំ ២០២៥ អាជីវកម្មសរុបចំនួន ៣ ៩២១ កន្លែង​នៅក្នុងប្រទេសថៃ ​បាន​បិទប្រតិបត្តិការរបស់ខ្លួន​​ ដោយ​កើនឡើង ៨,៣ ភាគរយ​ បើធៀបនឹងរយៈពេលដូចគ្នាកាលពីឆ្នាំមុន។

វិស័យ ៣ ដែលមានការបិទអាជីវកម្មច្រើនជាងគេបំផុតគឺ សំណង់ទូទៅ (៣៧២ អាជីវកម្ម) អចលនទ្រព្យ (១៨៤) ភោជនីយដ្ឋាន/អាហារដ្ឋាន (១៥៩)។ នាយកដ្ឋានអភិវឌ្ឍន៍ពាណិជ្ជកម្មថៃ បាន​ឱ្យដឹងថា ​ដើមទុនចុះបញ្ជីសរុបនៃអាជីវកម្មបិទប្រតិបត្តិការទាំងជាង ៣ ៩០០ មាន​រហូតដល់ ១៥,៩៩ ប៊ីលាន​បាត (៤៨៩ លាន​ដុល្លារ)។ ​

នាយកដ្ឋានដដែល ​បាន​លើកឡើងថា កត្តាសំខាន់ៗនៅពីក្រោយការបិទអាជីវកម្ម​រួមមាន កំណើន​នៃបំណុលគ្រួសារ ដែល​ធ្វើឱ្យ​ការចំណាយរបស់អ្នកប្រើប្រាស់ថយចុះ​ ការប្រែប្រួលនៃសេដ្ឋកិច្ចពិភពលោក​ និងភាពមិនច្បាស់លាស់ជុំវិញ​គោលនយោបាយពាណិជ្ជកម្មរបស់សហរដ្ឋអាមេរិកជាដើម​។

ទន្ទឹមនឹង​កំណើននៃការបិទអាជីវកម្ម ការបង្កើនអាជីវកម្មថ្មីៗក្នុងរយៈពេល ៤ ខែដើមឆ្នាំដូចគ្នា មាន​ត្រឹម ៣០ ១៤៨ កន្លែង ធ្លាក់ចុះ ១ ៣៨៥ ឬ ៤,៤ ភាគរយ​ ធៀប​នឹង​រយៈពេលដូចគ្នាកាលពីឆ្នាំមុន។

មជ្ឈមណ្ឌលស្រាវជ្រាវ Kasikorn (K-Research) ឯណោះវិញ បានព្យាករ​ថា ការទ្វារោងចក្រនៅថៃនៅឆ្នាំនេះនឹង​មាន​ច្រើនជាងឆ្នាំមុន ​ដោយ​សារតែការធ្លាក់ចុះនៃវិស័យផលិតកម្ម និងបញ្ហាប្រឈមសេដ្ឋកិច្ចដែលកំពុងបន្ត៕