អ្នកជំនាញ៖ ផលិតកម្មថៃអាចនឹងថយចុះយឺតយ៉ាវនៅឆមាសទី២ ឆ្នាំនេះ

សហព័ន្ធឧស្សាហកម្មថៃ (FTI) បាន​ព្រមានថា វិស័យផលិតកម្មរបស់ប្រទេសថៃ អាចនឹងថយចុះយឺតយ៉ាវនៅឆមាសទី២ ឆ្នាំនេះ ដោយសារការនាំចេញទំនងជាធ្លាក់ចុះ ប្រសិនបើរដ្ឋាភិបាល​បរាជ័យក្នុងការចរចាពន្ធជាមួយរដ្ឋបាលអាមេរិក​របស់ប្រធានាធិបតី ដូណាល់ ត្រាំ។ នេះបើតាមការចុះផ្សាយរបស់កាសែតបាងកកប៉ុស្តិ៍ នៅថ្ងៃសៅរ៍នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធាន FTI លោក Kriengkrai Thiennukul បាននិយាយថា អ្នកនាំចេញរបស់ថៃ កំពុងមើលឃើញពីការបញ្ជាទិញច្រើនក្នុងអំឡុងពេលដែលពន្ធគយបដិការផ្អាករយៈពេល ៩០ ថ្ងៃ ប៉ុន្តែតម្រូវការក្នុងពិភពលោក អាចធ្លាក់ចុះបន្ទាប់ពីការពន្យាពេលនេះត្រូវបញ្ចប់ទៅនៅដើមខែកក្កដា។ ថៃរងពន្ធបដិការ ៣៦ ភាគរយ ពីសហរដ្ឋអាមេរិក។

លោកបាននិយាយថា ចាប់ពីខែមករាដល់ខែមេសា ការនាំចេញថៃបានកើនឡើង ១៤ ភាគរយ ធៀប​នឹងរយៈពេលដូចគ្នាកាលពីឆ្នាំមុន ដោយ​ជួយលើកកម្ពស់ផលិតកម្មថៃ ០,៦ ភាគរយ ចំពេលដែលដៃគូពាណិជ្ជកម្មពីខាងក្រៅប្រញាប់ប្រញាល់បញ្ចូលបង្កើន​ទំនិញក្នុងស្ដុក។

លោក Kriengkrai បានបន្តយ៉ាងដូច្នេះថា៖ «ប្រសិនបើការយកពន្ធដ៏ខ្ពស់ ត្រូវបាន​ដាក់លើ​ផលិតផលថៃ វានឹងបង្កឱ្យមានផលប៉ះពាល់យ៉ាងទូលំទូលាយដល់វិស័យនាំចេញ និងផលិតកម្ម ក៏ដូចជាការប្រកួតប្រជែងរបស់សហគ្រិនថៃ»។

ចំពោះបញ្ហានេះ គណៈកម្មាធិការអចិន្រ្តៃយ៍រួមស្តីពីពាណិជ្ជកម្ម ឧស្សាហកម្ម និងធនាគារ កាលពីពេលថ្មីៗ បានបន្ទាបការព្យាករសម្រាប់ការនាំចេញរបស់ខ្លួន ថានឹង​ ធ្លាក់ចុះចន្លោះពី ០,៣-០,៥ ភាគរយ ធៀប​នឹងកំណើនព្យាករណ៍ ០,៣-០,៩ ភាគរយ ក្នុងការព្យាករកាលពីលើកមុន។

FTI រំពឹងថា ក្រុមហ៊ុនផលិតក្នុងស្រុកថៃអាចនឹង​កែសម្រួលផលិតកម្មរបស់ខ្លួន ដោយការកាត់បន្ថយការងារ។ សហគ្រាសធុនតូច និងមធ្យម កំពុងជួបបញ្ហាជាមួយលំហូរសាច់ប្រាក់ ដោយខ្លះត្រូវបញ្ឈប់ការងារ និងខ្លះទៀតបិទអាជីវកម្មរបស់ពួកគេ៕