ពាណិជ្ជកម្មទ្វេភាគីកម្ពុជា-ចិន សម្រេចបានជាង ៧ ពាន់លានដុល្លារ កើនឡើងខ្ពស់

នៅក្នុងរយៈពេល ៥ ខែ (មករា-ឧសភា) ឆ្នាំ ២០២៥ ការដោះដូរទំនិញរវាងកម្ពុជា-ចិនមាន​ទំហំ​ទឹក​ប្រាក់ ៧,៦៣ ពាន់លានដុល្លារ កើនឡើង ២៧,៥% ធៀបនឹងរយៈពេលដូចគ្នា កាល​ពីឆ្នាំ​មុន ក្នុងនោះកម្ពុ​ជានាំចេញទៅចិនចំនួន ៦៣៤ លានដុល្លារ ធ្លាក់ចុះ ៣,៦% ចំណែក​ឯចិន​នាំ​ចូល​មកវិញជាង ៧ ពាន់លានដុល្លារ កើន ៣១,៤%។ នេះបើយោង​តាមអគ្គនា​យកដ្ឋាន​គយ និង​​រដ្ឋាករ​កម្ពុជា ​(GDCE)។

លោក ឡោ វិចិត្រ អនុប្រធានសមាគមពាណិជ្ជកម្មកម្ពុជា-ចិន ប្រាប់កម្ពុជាថ្មីថានៅថ្ងៃទី ១២ ខែមិថុនា ឆ្នាំ ២០២៥ ថា កម្ពុជាមានឱនភាពពាណិជ្ជកម្មជាមួយចិនច្រើន ដោយសារកម្ពុជានាំចូលវត្ថុធាតុដើមពីប្រទេសចិន។

លោកបានថ្លែងថា៖ «យើងនាំចូលវត្ថុធាតុដើម ដូចជាក្រណាត់ ឡេវ រួត យាយចំទៅយើងត្រូវការប្រើប្រាស់សម្រាប់នាំចេញ ឥវ៉ាន់សម្រាប់នាំចេញទៅអឺរ៉ុប វត្ថុធាតុដើមភាគច្រើនគឺយើងនាំចូលពីចិន»។

បើតាមលោក ឡោ វិចិត្រ កម្ពុជាក៏ត្រូវតែរកវិធីខ្លះដើម្បីបង្រួញអតិរេកពាណិជ្ជកម្មឱ្យតួចជាងនេះ ដោយគួរតែមានរោងចក្រដែលអាចផ្គត់ផ្គង់វត្ថុធាតុដើមដោយខ្លួនឯកខ្លះ។

លោកបណ្ឌិត ហុង វណ្ណៈ អ្នក​ជំនាញ​ផ្នែក​សេដ្ឋកិច្ច​​នៅ​រាជ្យ​បណ្ឌិត្យសភា​កម្ពុជាមានប្រសាសន៍ថា ​ឱន​ភាព​ពាណិជ្ជកម្មរវាងកម្ពុជាចិនមិនមានកំណើនខ្ពស់ទេ ដោយសារចិនមានផលិតកម្មរោងចក្រកាត់ដេរ និងរោងចក្រឧស្សាហកម្មច្រើននៅកម្ពុជា។

បើតាមលោក ហុង វណ្ណៈ ទោះបីកម្ពុជាបានចុះកិច្ចព្រមព្រៀងទីផ្សារ​សេរីជាមួយប្រទេស​ចិនក៏ដោយ ក៏ឱនភាព​ពាណិជ្ជ​កម្ម នៅតែបន្តកើតមាន ដោយសារកម្ពុជាមានតម្រូវការ​ធំពីប្រ​ទេស​ចិន ដែលមានសម្ភារ​បរិក្ខាផ្សេងៗ។

តម្រូវការ វត្ថុធាតុដើម សម្ភារៈ ពីប្រទេសចិនធូរថ្លៃជាងគេ បើប្រៀបធៀបជាមួយអាស៊ាន ហើយ​សម្ភារៈវត្ថុធាតុដើមសម្លៀកបំពាក់ក៏មានច្រើន៕

អត្ថបទ៖ ឡេង ដេត