ព័ត៌មានអន្ដរជាតិ

ឥណ្ឌូណេស៊ីគ្រោងបន្ធូរបន្ថយការរឹតត្បឹតការនាំចូល ជាផ្នែកមួយនៃការចរចាពាណិជ្ជកម្ម

បានផុស

២០ វិនាទី មុន

នៅ

ថ្ងៃអង្គារ ១ កក្កដា ២០២៥

ដោយ

ឥណ្ឌូណេស៊ីគ្រោងបន្ធូរបន្ថយបទប្បញ្ញត្តិសម្រាប់ការនាំចូលលើទំនិញ និងវត្ថុធាតុដើមមួយចំនួន ក្នុងគោលបំណងដើម្បីបង្កើនភាពប្រកួតប្រជែង និងជំរុញកិច្ចពិភាក្សាពន្ធគយជាមួយសហរដ្ឋអាមេរិក និងការចរចាពាណិជ្ជកម្មផ្សេងទៀត។ នេះបើតាមការចុះផ្សាយរបស់សារព័ត៌មាន Bloomberg និងរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីក្រសួងកិច្ចការសេដ្ឋកិច្ចឥណ្ឌូណេស៊ី លោក Airlangga Hartarto បានឱ្យដឹងនៅថ្ងៃចន្ទថា ការបន្ធូរបន្ថយ ឬលុបបំបាត់ការរឹតបណ្ដឹងសម្រាប់ការនាំចូល នឹងគ្របដណ្ដប់លើទំនិញ និងវត្ថុធាតុដើមចំនួន ១០ មុខ រួមមាន ផលិតផលព្រៃឈើ គុជខ្យង ជីកសិកម្ម ឥន្ធនៈ និងសារធាតុគីមីមួយចំនួន វត្ថុធាតុដើមប្លាស្ទិក ប្លាស្ទិកខ្ចប់អាហារ ស្បែកជើង និងកង់ជាដើម។ កំណែទម្រង់នេះ នឹងចូលជាធរមានក្នុងរយៈពេល ២ ខែទៅមុខ។

អនុរដ្ឋមន្ត្រីក្រសួងឧស្សាហកម្មលោក Faisol Reza បាននិយាយថា ការបន្ធូរបន្ថយលក្ខខណ្ឌសម្រាប់ការនាំចូល និងការរឹតបន្តឹង នឹងជួយសម្រួលដល់ក្រុមហ៊ុនឧស្សាហកម្មក្នុងការនាំចូលវត្ថុធាតុដើម។

មន្រ្តីឥណ្ឌូណេស៊ីមិនបានបញ្ជាក់ឱ្យចំៗថា ការបន្ធូរបន្ថយនេះជាផ្នែកមួយនៃកិច្ចប្រឹងប្រែងចរចាពន្ធជាមួយសហរដ្ឋអាមេរិក ឱ្យបានមុនថ្ងៃ ៩ កក្កដា ដែលជាកាលផុតកំណត់សម្រាប់ការពន្យារពេលអនុវត្តពន្ធបដិការរបស់អាមេរិកនោះទេ។

ប៉ុន្តែកន្លងមក មានការត្អូញត្អែរមិនដាច់រួចហើយថា ការរឹតត្បឹតលើការនាំចូលរបស់ឥណ្ឌូណេស៊ីមានលក្ខណៈតឹងតែង ខណៈបញ្ហាដដែលក៏ត្រូវបានគូសបញ្ជាក់ផងដែរ ក្នុងរបាយការណ៍ថ្មីមួយរបស់តំណាងពាណិជ្ជកម្មសហរដ្ឋអាមេរិក ស្តីពីរបាំងពាណិជ្ជកម្មបរទេស។

ជាក់ស្ដែងទៅ ការទាមទារឱ្យប្រទេសផ្សេងៗទម្លាក់របាំងពន្ធ និងមិនមែនពន្ធគយលើទំនិញរបស់អាមេរិក គឺជាផ្នែកមួយនៃការចរចាពន្ធរវាងប្រទេសទាំងនោះ និងមន្រ្តីរដ្ឋបាលប្រធានាធិបតី ដូណាល់ ត្រាំ។ ការបន្ធូរបន្ថយការរឹតត្បឹតរបស់ឥណ្ឌូណេស៊ី ដែលរងពន្ធបដិការ ៣២ ភាគរយ ពីអាមេរិកនៅពេលនេះ រួមបញ្ចូលទាំងការដកចេញនូវតម្រូវការអាជ្ញាប័ណ្ណនាំចូលលើទំនិញទាំង ១០ មុខនោះ។

ដើម្បីជាការចរចាពន្ធ ឥណ្ឌូណេស៊ីដែលមានអតិរេកពាណិជ្ជកម្ម ១៧,៩ ប៊ីលានដុល្លារ កាលពីឆ្នាំ ២០២៤ បានបង្ហាញនូវចេតនានៃការបង្កើនការនាំចូលទំនិញអាមេរិក ជាពិសេសថាមពល និងទំនិញកសិកម្ម ដើម្បីដោះស្រាយការទាមទាររបស់អាមេរិក លើគម្លាតពាណិជ្ជកម្ម៕