ព័ត៌មានអន្ដរជាតិ

លោកស្រី ផែនថងថាន៖ ខ្ញុំនឹងប្រើពេល១៥ថ្ងៃពន្យល់តុលាការថាខ្ញុំធ្វើដើម្បីជាតិលើសពី១០០%

បានផុស

១ year មុន

នៅ

ថ្ងៃអង្គារ ១ កក្កដា ២០២៥

ដោយ

Chheang

បន្ទាប់ពីត្រូវតុលាការធម្មនុញ្ញព្យួរតួនាទីជានាយករដ្ឋមន្ត្រីនៅរសៀលថ្ងៃអង្គារទី១ខែកក្កដានេះ លោកស្រី ផែថងថាន ស៊ីណាវ៉ាត្រ បានចេញមកធ្វើសន្និសីទសារព័ត៌មាន សុំទោសប្រជាជនថៃចំពោះវិធីសាស្ត្រធ្វើការកន្លងមករបស់ខ្លួន និងប្រាប់ថា លោកស្រីនឹងព្យាយាមពន្យល់តុលាការអំពីចេតនាពិតប្រាកដ ទាក់ទិននឹងការបែកធ្លាយវីដេអូឃ្លីបនៃការសន្ទនាជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជាកាលថ្ងៃទី១៧ខែមិថុនា។

លោកស្រី ផែថងថាន ស៊ីណាវ៉ាត្រ (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយរបស់ Thai Rath លោកស្រី ផែថងថាន បានលើកឡើងថា សាលក្រមបានចេញមកហើយ ហើយលោកស្រីយល់ព្រមទទួលយកការពិចារណារបស់តុលាការ។ ទាក់ទិននឹងការផ្អាកតួនាទីនេះ លោកស្រីមិនប្រាកដពីរយៈពេលទេ ប៉ុន្តែថា លោកស្រីអាចមានពេលប្រហែល ១៥ថ្ងៃដើម្បីពន្យល់។

លោកស្រី ផែនថងថាន បានសង្កត់ធ្ងន់ថា គោលបំណងពិតរបស់លោកស្រី គឺលើសពី១០០% ធ្វើដើម្បីប្រទេសជាតិ រក្សាអធិបតេយ្យភាព រក្សាអាយុជីវិតរបស់ទាហានគ្រប់រូប និងដើម្បីរក្សាសន្តិភាព។ លោកស្រីបានបន្តថា លោកស្រីមានទំនុកចិត្តយ៉ាងខ្លាំងចំពោះរឿងនេះ ប៉ុន្តែវិធីសាស្ត្រដែលលោកស្រីប្រើ ប្រហែលជាមិនអាចផ្គាប់ចិត្តមនុស្សមួយចំនួនបានឡើយ។

មេដឹកនាំថៃរូបនេះ បានរៀបរាប់ថា «យ៉ាងណាក៏ដោយ ខ្ញុំកំពុងព្យាយាមបញ្ជាក់ថា រឿងនេះមានចេតនា និងការខិតខំជាង ១០០% ធ្វើដើម្បីប្រទេស។ ចេតនាមិនចង់បានអ្វីសម្រាប់ខ្លួនឯងទេ។ ខ្ញុំគិតតែពីវិធីការពារភាពវឹកវរ របៀបជៀសវាងការប្រយុទ្ធ និងវិធីការពារទាហានមិនឲ្យបាត់បង់ជីវិត»។ បន្ថែមពីនេះ លោកស្រីក៏បានធ្វើការសុំទោសប្រជាជនថៃ ដែលមិនពេញចិត្តនឹងវិធីសាស្ត្រធ្វើការរបស់លោកស្រី ហើយបញ្ជាក់ជាថ្មីថា លោកស្រីបានត្រៀមខ្លួនបន្តការងារដើម្បីជាតិ ទោះស្ថិតនៅក្នុងតួនាទីអ្វីក៏ដោយ។

សូមជម្រាបថា ឧបនាយករដ្ឋមន្ត្រី និងជារដ្ឋមន្ត្រីដឹកជញ្ជួន លោក សូរិយា ជុនហ្គ្រុនហ្គ្រីងគីត មកពីគណបក្សភឿថៃនឹងកាន់តំណែងជានាយករដ្ឋមន្ត្រីស្តីទីជំនួសលោកស្រី ផែនថងថាន។ មួយវិញទៀត អំឡុងពេលព្យួរតំណែង លោកស្រី ផែនថងថាន នឹងក្លាយជារដ្ឋមន្ត្រីក្រសួងវប្បធម៌វិញ ដោយត្រៀមស្បថចូលកាន់មុខងារនៅថ្ងៃព្រហស្បតិ៍ខាងមុខ៕

ដោយ៖ ឈាង

ចុចអាន៖ នាយករដ្ឋមន្ត្រី ផែថងថាន ត្រូវបានព្យួរអំណាច ចំពេលស្តេចថៃតែងតាំងគណៈរដ្ឋមន្ត្រីថ្មី