ព័ត៌មានជាតិ

កម្ពុជា ស្នើពង្រីកកិច្ចសហប្រតិបត្តិការក្នុងតំបន់លើវិស័យសហគ្រាសធុនមីក្រូ តូច និងមធ្យម ក្នុងពិព័រណ៍ CISMEF របស់ចិន

បានផុស

១ year មុន

នៅ

ថ្ងៃពុធ ២ កក្កដា ២០២៥

ដោយ

នៅក្នុងពិព័រណ៍សហគ្រាសធុនមីក្រូ តូច និងមធ្យមអន្តរជាតិរបស់ប្រទេសចិន (CISMEF) នៅថ្ងៃទី២៧ ខែមិថុនា ឆ្នាំ២០២៥ កម្ពុជា បានស្នើបង្កើនកិច្ចសហប្រតិបត្តិការក្នុងតំបន់ឱ្យកាន់តែស៊ីជម្រៅ ដើម្បីគាំទ្រសហគ្រាសធុនមីក្រូ តូច និងមធ្យមនៅទូទាំងតំបន់អាស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តំណាងគណៈប្រតិភូកម្ពុជា លោក ញឹម ខេមរា រដ្ឋលេខាធិការប្រចាំការ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងពីសក្ដានុពលសេដ្ឋកិច្ចរបស់កម្ពុជាដែលកំពុងរីកចម្រើន និងបានស្នើគំនិតផ្ដួចផ្ដើមរួមថ្នាក់តំបន់មួយចំនួនផងដែរ។

លោកបានលើកឡើងថា សហគ្រាសធុនមីក្រូ តូច និងមធ្យម គឺជាតួអង្គសំខាន់ក្នុងការជំរុញគោលដៅអភិវឌ្ឍន៍ប្រកបដោយចីរភាព ជាពិសេសលើកកម្ពស់ការងារសមរម្យ កំណើនសេដ្ឋកិច្ច នវានុវត្តន៍ឧស្សាហកម្ម និងការអភិវឌ្ឍហេដ្ឋារចនាសម្ព័ន្ធ។

លោកក៏បានគូសបញ្ជាក់ពីការប្តេជ្ញាចិត្តរបស់រាជរដ្ឋាភិបាលកម្ពុជា ចំពោះកិច្ចសហប្រតិបត្តិការពហុភាគី និងការអភិវឌ្ឍប្រកបដោយចីរភាព ដោយបន្ថែមថា យើងជឿជាក់យ៉ាងមុតមាំថា កម្ពុជាបានត្រៀមលក្ខណៈល្អប្រសើរ ក្នុងការរួមចំណែកសំខាន់សម្រាប់ដំណាក់កាលថ្មីនៃការធ្វើពាណិជ្ជកម្ម និងការវិនិយោគក្នុងតំបន់។

ក្នុងឱកាសដដែលលោក លោក ញឹម ខេមរា ក៏បានស្នើគំនិតផ្តួចផ្តើមដូចជា “កម្មវិធីផ្លាស់ប្តូរនវានុវត្តន៍សហគ្រាសធុនមីក្រូ តូច និងមធ្យមក្នុងតំបន់” និង “កម្មវិធីពង្រឹងខ្សែច្រវាក់តម្លៃសហគ្រាសធុនមីក្រូ តូច និងមធ្យម កម្ពុជា-ចិន” ដើម្បីជំរុញការផ្ទេរបច្ចេកវិទ្យា ការកសាងសមត្ថភាព និងការឈានចូលទីផ្សារអន្តរជាតិ។

ជាក់ស្តែង សំណើទាំងនេះធ្វើឡើងស្របពេលដែលកម្ពុជាប្រារព្ធទិវាជាតិសហគ្រាសធុនមីក្រូ តូច និងមធ្យម លើកទី ២ និងកំពុងអនុវត្តកិច្ចព្រមព្រៀងទ្វេភាគីជាមួយចិនចំនួន ៣៧ ដែលត្រូវបានចុះហត្ថលេខាក្នុងអំឡុងដំណើរទស្សនកិច្ចរបស់ប្រធានាធិបតី ស៊ី ជីនពីង មកកាន់ប្រទេសកម្ពុជាកាលពីខែមេសា ឆ្នាំ២០២៥៕