ព័ត៌មានជាតិ

កម្ពុជា-ចិន គ្រោងធ្វើការរួមគ្នាក្នុងការលើកកម្ពស់ការអភិវឌ្ឍវិស័យហេដ្ឋារចនាសម្ព័ន្ធដឹកជញ្ជូន

បានផុស

១ year មុន

នៅ

ថ្ងៃអង្គារ ១៥ កក្កដា ២០២៥

ដោយ

កម្ពុជា-ចិន គ្រោងធ្វើការងាររួមគ្នាក្នុងការបង្កើតឱកាសកិច្ចសហប្រតិបត្តិការពាក់ព័ន្ធនឹងការលើកកម្ពស់ការអភិវឌ្ឍវិស័យហេដ្ឋារចនាសម្ព័ន្ធដឹកជញ្ជូន ផ្លូវថ្នល់ ភស្តុភារកម្ម ផ្លូវទឹក ផ្លូវដែក ការអប់រំបណ្ដុះបណ្ដាលនៅវិទ្យាស្ថានតេជោសែន សាធារណការ និងដឹកជញ្ជូន និងចូលរួមគាំទ្រគម្រោងអាទិភាពសំខាន់ៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងឱកាសចូលជួបសម្តែងការគួរសម និងពិភាក្សាការងារ ជាមួយលោកស្រី កុយ សុដានី រដ្ឋលេខាធិការប្រចាំការ នៅថ្ងៃទី១៤ ខែកក្កដា ឆ្នាំ២០២៥ លោក Zeng Jinghua អគ្គនាយកនៃគណៈកម្មការគ្រប់គ្រងទ្រព្យសម្បត្តិរដ្ឋក្រុងឆុងឈីង ប្រទេសចិន បានលើកឡើងពីគោលដៅរបស់ខ្លួនក្នុងការចូលរួមពង្រឹងកិច្ចសហប្រតិបត្តិការស្របតាមចក្ខុវិស័យរួមរបស់ប្រមុខដឹកនាំនៃប្រទេសទាំងពីរ។

លោក Zeng Jinghua បានគូសបញ្ជាក់ពីគម្រោងនានារបស់ខ្លួន ដែលបាននិងកំពុងអនុវត្ត ក្នុងនោះមានគម្រោងកិច្ចសហប្រតិបត្តិការអភិវឌ្ឍភាគនិរតីឆុងឈីង តាមរយៈការប្រើប្រាស់ខ្សែផ្លូវសមុទ្រតភ្ជាប់ជាមួយបណ្តាប្រទេសអាស៊ីអាគ្នេយ៍ ដែលជួយជំរុញការអភិវឌ្ឍសេដ្ឋកិច្ច ពាណិជ្ជកម្ម ទេសចរណ៍ និងការផ្លាស់ប្តូរទំនិញរវាងគ្នា ទៅវិញទៅមក នៅក្នុងតំបន់ឱ្យកាន់តែល្អប្រសើរ។

លោកស្រីរដ្ឋលេខាធិការប្រចាំការ បានបញ្ជាក់ពីចក្ខុវិស័យ និងទិសដៅរបស់ក្រសួងក្នុងការអភិវឌ្ឍវិស័យសាធារណ និងដឹកជញ្ជូន ដែលចាំបាច់ត្រូវធានាដល់ការតភ្ជាប់ប្រទាក់ក្រឡារវាងការដឹកញ្ជូនផ្លូវគោក ផ្លូវទឹក ផ្លូវដែក និងការតភ្ជាប់ជាមួយប្រទេសជិតខាង និងក្នុងតំបន់ ដើម្បីសម្រួលដល់ការធ្វើដំណើរ-ដឹកជញ្ជូនឱ្យរលូន មានតម្លៃថោក និងអាចប្រកួតប្រជែងជាមួយប្រទេសដ៏ទៃ។

លោកស្រីក៏បានលើកឡើងអំពីសមិទ្ធផល និងគម្រោងនានាដែលក្រសួងសាធារណការ បានសម្រេចបាន និងកំពុងអនុវត្ដ រួមមានការចូលរួមអនុវត្តទិសដៅគោលនយោបាយជាតិ ជាពិសេសការចូលរួមអនុវត្តយុទ្ធសាស្រ្តបញ្ចកោណដំណាក់កាលទី១ ការរៀបចំកសាងផែនការមេ ការរៀបចំឯកសារក្របខណ្ឌច្បាប់ពាក់ព័ន្ធនានា និងការអភិវឌ្ឍហេដ្ឋារចនាសម្ព័ន្ធដឹកជញ្ជូនឱ្យភាពប្រទាក់ក្រឡានៅទូទាំងប្រទេស។

ជាមួយគ្នានោះដែរ លោកស្រីរដ្ឋលេខាធិការប្រចាំការ បានកោតសរសើរ និងថ្លែងអំណរគុណដល់វិទ្យាស្ថានអប់រំនៃក្រុងឆុងឈីង តាមរយៈប្រតិភូនាពេលនេះ ដែលបានជួយគាំទ្រដល់វិទ្យាស្ថានតេជោសែនសាធារណការ និងដឹកជញ្ជូន នាពេលកន្លងមក និងការសម្រេចចុះអនុស្សរណៈនៃការយោគយល់គ្នា និងអនុស្សរណៈនៃកិច្ចព្រមព្រៀងជាមួយគ្នានាពេលនេះ។

លោកស្រី បានស្នើដល់លោកប្រធានគណៈប្រតិភូ ពិនិត្យលទ្ធភាពពង្រីកកិច្ចសហប្រតិបត្តិការ និងសិក្សាចូលរួមអនុវត្តគម្រោងអាទិភាពនានារបស់ក្រសួង និងពិចារណាជួយគាំទ្រផ្ដល់នូវការបណ្តុះបណ្តាល និងអាហារូបករណ៍ថ្នាក់បរិញ្ញាបត្រ បរិញ្ញាបត្រជាន់ខ្ពស់ ដល់មន្រ្តីរាជការក្រសួង និងនិស្សិតដែលកំពុងសិក្សានៅនៅវិទ្យាស្ថានតេជោសែនសាធារណការ និងដឹកជញ្ជូន លើមុខជំនាញពាក់ព័ន្ធដើម្បីពង្រឹងសមត្ថភាព និងកិច្ចសហប្រតិបត្តិការឱ្យកាន់តែជិតស្និតជាមួយគណៈកម្មការគ្រប់គ្រងទ្រព្យសម្បត្តិរដ្ឋក្រុងឆុងឈីង ប្រទេសចិន៕