កម្ពុជាកំពុងសហការជាមួយដៃគូរអភិវឌ្ឍន៍ដើម្បីជំរុញហិរញ្ញវត្ថុប្រកបដោយចីរភាព

អគ្គនាយកនៃនិយ័តករមូលបត្រកម្ពុជា​ (SERC) លោក ស៊ូ សុជាតិ បានលើកឡើងថា ក្នុងរយៈពេលប៉ុន្មានឆ្នាំចុងក្រោយនេះស្ថាប័នរបស់លោកបានធ្វើការសហការជាមួយ​ ដៃគូអភិវឌ្ឍន៍ និងអ្នកចូលរួមក្នុងទីផ្សារនានដើម្បីជំរុញហិរញ្ញវត្ថុប្រកបដោយចីរភាព តាមរយៈការបោះផ្សាយសញ្ញាបណ្ណបរិស្ថាន សង្គម និងអភិបាលកិច្ច (ESG) និងការដាក់ឱ្យដំណើរការនូវ SLBs ជាឧបករណ៍ហិរញ្ញវត្ថុថ្មី SERC កំពុងតម្រង់ទិសទីផ្សារមូលបត្រឱ្យស្របតាមគោលដៅអភិវឌ្ឍន៍ប្រកបដោយចីរភាព និងអាទិភាពជាតិ។

ថ្លែងក្នុងសិក្ខាសាលាស្តីពី «សញ្ញាបណ្ណផ្សារភ្ជាប់នឹងចីរភាព (SLBs)» កាលពីថ្ងៃទី១៥ ខែកក្កដា លោក ស៊ូ សុជាតិ ​ថា វឌ្ឍនភាពនៃហិរញ្ញវត្ថុប្រកបដោយចីរភាពរបស់កម្ពុជា ឆ្លុះបញ្ចាំងពីកិច្ចខិតខំប្រឹងប្រែងរួមគ្នាដែលបង្កើតឡើងដោយកិច្ចសហប្រតិបត្តិការក្នុងចំណោមនិយ័តករ ដៃគូអភិវឌ្ឍន៍ និងអ្នកចូលរួមក្នុងទីផ្សារ។

លោកថា៖«តាមរយៈការបោះផ្សាយសញ្ញាបណ្ណបរិស្ថាន សង្គម និងអភិបាលកិច្ច (ESG) និងការដាក់ឱ្យដំណើរការនូវ SLBs ជាឧបករណ៍ហិរញ្ញវត្ថុថ្មី SERC កំពុងតម្រង់ទិសទីផ្សារមូលបត្រឱ្យស្របតាមគោលដៅអភិវឌ្ឍន៍ប្រកបដោយចីរភាព និងអាទិភាពជាតិ។ គំនិតផ្តួចផ្តើមទាំងនេះ រួមចំណែកដល់ភាពធន់នៃសេដ្ឋកិច្ច និងបង្ហាញពីការប្តេជ្ញាចិត្តរួមគ្នារបស់យើងចំពោះកំណើនដែលប្រកប​ដោយភាពធន់ និងបរិយាបន្ន។ ជាមួយនឹងការបន្តគាំទ្រ និងកិច្ចសហការជាយុទ្ធសាស្រ្ត យើងកំពុងកសាងប្រព័ន្ធអេកូឡូស៊ីទីផ្សារមូលបត្រ ដែលជំរុញបរិយាកាសធុរកិច្ចប្រកបដោយចីរភាព និងការអភិវឌ្ឍរយៈពេលវែងនៅក្នុងសេដ្ឋកិច្ច» ។

​លោកស្រី Deanna Morris លើកឡើងថា ESCAP មានមោទនភាពចំពោះកិច្ចគាំទ្រដល់ការអភិវឌ្ឍទីផ្សារសញ្ញាបណ្ណចីរភាពរបស់កម្ពុជា តាមរយៈកម្មវិធី ​ការជំរុញការបោះផ្សាយសញ្ញាបណ្ណចីរភាពនៅកម្ពុជា (CSBA)​។

លោកស្រីថា៖«តាមរយៈភាពជាដៃគូនេះ យើងបានគាំទ្រដល់ការបោះផ្សាយសញ្ញាបណ្ណប្រកបដោយភាពជោគជ័យចំនួនពីរ ហើយគម្រោងនៃការបោះផ្សាយសញ្ញាប្រកបដោយចីរភាពប្រមាណ ៩០ លានដុល្លារអាម៉េរិក នឹងដាក់ចេញនាពេលខាងមុខ។ នៅចុងខែនេះ យើងនឹងដាក់ឱ្យដំណើរការនូវដំណាក់កាលបន្ទាប់នៃ CSBA ដែលនឹងបន្តផ្តល់ជំនួយបច្ចេកទេស ការលើកកម្ពស់ឥណទាន និងការភ្ជាប់ទៅវិនិយោគិនដល់បុគ្គលបោះផ្សាយ។ ខណៈពេលដែលយើងស្វាគមន៍សញ្ញាបណ្ណប្រកបដោយចីរភាពគ្រប់ទម្រង់ និងដោយដោយ​ទទួលស្គាល់ពីសក្តានុពលរបស់ SLBs នៅក្នុងការជំរុញការផ្លាស់ប្តូរផ្នែកបរិស្ថាន និងសង្គមទាំងកម្រិតក្រុមហ៊ុន និងវិស័យយើងពិតជាចាប់អារម្មណ៍ចូលរួមគាំទ្រដល់ការបោះផ្សាយ SLBs នៅក្នុងជុំបន្ទាប់នៃ CSBA នេះ»។

​លោកស្រី Shomi Kim ក៏បានលើកឡើងផងដែរថា ទិដ្ឋភាពហិរញ្ញវត្ថុប្រកបដោយចីរភាពរបស់កម្ពុជា​កំពុងវិវត្តយ៉ាងឆាប់រហ័ស ដោយទឹកប្រាក់ទំហំជាង ៦០ លានដុល្លារអាម៉េរិក ត្រូវបានកៀរគរ តាមរយៈសញ្ញាបណ្ណ បៃតង និងចីរភាព ក្រោមកម្មវិធី ”ការជំរុញការបោះផ្សាយសញ្ញាបណ្ណចីរភាពនៅកម្ពុជា (CSBA)។ លោកស្រីថា កម្មវិធីនេះ ត្រូវបានដាក់ឱ្យដំណើរការក្រោមភាពជាដៃគូរវាង ន.ម.ក., GGGI, ESCAP, មូលនិធិធានាឥណទាន និងជំរុញការវិ-និយោគ(CGIF) និងក្រុមហ៊ុន GuarantCo នៅក្នុងឆ្នាំ២០២៣ បានកសាងសន្ទុះទីផ្សារដ៏រឹងមាំ និងការត្រៀមខ្លួនរួចរាល់របស់បុគ្គលបោះផ្សាយ។

«ខណៈពេលដែលយើងរៀបចំដាក់ឱ្យដំណើរការជំហានបន្ទាប់នៃកម្មវិធី CSBA GGGI នៅតែប្តេជ្ញាចិត្តក្នុងការគាំទ្រដល់ការបោះផ្សាយសញ្ញាបណ្ណ Thematic ដែលអាចទុកចិត្តបាន បង្កើនទំនុកចិត្តរបស់វិនិយោគិនលើហិរញ្ញវត្ថុចីរភាព និងការដាក់ឱ្យដំណើរការនូវឧបករណ៍ចីរភាពថ្មី ដូចជា SLBs ដើម្បីឱ្យទីផ្សារ​មូលបត្រស្របជាមួយនឹងគោលដៅអាកាសធាតុ និងការអភិវឌ្ឍរបស់កម្ពុជា»។ នេះយោងតាមការលើកឡើងរបស់លោកស្រី Kim៕

​