ផ្ទៃដីដាំដុះស្វាយចន្ទីរំពឹងកើនឡើង ខណៈកូនចន្ទី ១០ លានកូន លក់ដាច់ស្តុកនៅឆ្នាំ ២០២៥

កូនចន្ទីប្រមាណ ១០ លានកូន ត្រូវបានលក់ដាច់ស្ដុកនៅឆ្នាំ ២០២៥នេះ ខណៈកសិកររំពឹងថា ផ្ទៃដីដាំដុះស្វាយចន្ទីនឹងកើនឡើងបន្ថែមទៀតនៅក្នុងឆ្នាំ ២០២៥។

យោងតាមក្រសួងកសិកម្ម រុក្ខាប្រមាញ់ និងនេសាទ កម្ពុជាមានផ្ទៃដីប្រមូលផលស្វាយចន្ទីសរុបចំនួនជាង ៥៨ ម៉ឺនហិកតា ក្នុងនោះ​ខេត្ត​ចំនួន ១០ របស់កម្ពុជា មានផ្ទៃដី​ដាំដុះ​ស្វាយ​​​​​ចន្ទីច្រើនជាងគេរួមាន ខេត្តកំពង់​ធំចំ​នួន ១៤៧ ៧០៣​ហិកតា ខេត្តក្រចេះ ១០២ ៥២០ ហិកតា ខេត្តរតនគិរីចំនួន ៩៧ ២៥៨ ហិកតា ខេត្តកំពង់ចាម ៤៦ ៥៨២ ហិកតា ស្ទឹងត្រែង ៤៤ ២៥០ ហិកតា ខេត្ត​ត្បូងឃ្មុំ ៣៦ ៤០៣ ហិកតា ខេត្តសៀមរាប ៣៥ ៩១៤ ហិកតា ខេត្តព្រះវិហារ ២៨ ៩៦៥ ហិកតា ឧត្តរមានជ័យ ១៣ ៨១៨ ហិកតា និងមណ្ឌលគិរី ៩ ៨៥៨ ហិកតា។

លោក អួន ស៊ីឡុត ប្រធានសមាគមស្វាយចន្ទីកម្ពុជា មានប្រសាសន៍ថា៖ «ផ្ទៃដីដាំដុះស្វាយ​ចន្ទី​នឹង​កើនឡើង ពីព្រោះនៅឆ្នាំ ២០២៤ ក្រសួងកសិកម្ម បានបញ្ចេញទិន្នន័យផ្លូវការថា ផ្ទៃដីដាំ​ដុះ​ស្វាយចន្ទីដែលផ្ដល់ផលមានចំនួន ៥៨ ម៉ឺន ហិកតា ហើយឆ្នាំ ២០២៥ ស្ថានភាពនៃការដាំស្វាយ​ចន្ទីនឹងកើនឡើង តាមរយៈការលក់កូន យើងសន្និដ្ឋានថា ការលក់កូនប្រមាណ ១០ លានកូន គឺដាច់ស្ដុកទាំងអស់។ យើងអាចប៉ាន់ប្រមាណថា ៤ ទៅ ៥ ម៉ឺនហិកតា ប៉ុន្តែដីហ្នឹងជាដីចាស់ទេ ដីគាត់កាប់ចម្ការចាស់ចោលទៅគាត់ដាំស្វាយចន្ទីថ្មីឡើងវិញ»។

លោក អួន ស៊ីឡុត យល់ឃើញថា​ កម្ពុជាត្រូវមានយន្តការច្បាស់​លាស់ទើបរក្សាតម្លៃគ្រាប់ស្វាយចន្ទីឆៅឱ្យមានស្ថេរភាព​ជូនដល់កសិករ ដោយយន្តការចម្បងគឺគាំ​ទ្រការ​បង្កើត​​​​រោង​ចក្រកែច្នៃក្នុងស្រុកឲ្យបានច្រើន តាម​គោលនយោបាយជាតិស្ដីពីស្វាយ​ចន្ទីដែល​បានកំណត់ ២៥% រវាងឆ្នាំ ២០២២-២០២៧។

លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា រាជ​រដ្ឋាភិបាលកំពុងអភិវឌ្ឍហេដ្ឋារចនាសម្ព័ន្ធ សួនឧស្សាហកម្មស្វាយចន្ទីនៅខេត្តកំពង់ធំ ដើម្បី​ជំរុញ​ការ​អភិវឌ្ឍន៍វិស័យ​ស្វាយចន្ទីកម្ពុជា។

លោក ឃឹម ហ្វីណង់ បន្ថែមថា៖ «បច្ចុប្បន្នអ្វីៗ នៅល្អប្រសើរទាំងអស់ រាល់ទនិន្ន័យ​ដែលយើង​មាន មិនថាទិន្នផល តម្លៃ មិនថាគោលនយោបាយ និងការគាំទ្រពីរដ្ឋាភិបាល ទាំងសហគមន៍​កសិ​កម្មទំនើប ក៏ដូចជាការរៀបចំសួនឧស្សាហកម្មកែច្នៃ ដើម្បីតម្លៃបន្ថែម សុទ្ធតែជារឿងល្អ ខ្ញុំអត់​មាន​ឃើញសញ្ញាបារម្ភពាក់ព័ន្ធបញ្ហាតម្លៃចន្ទីទេ»។

លោក តូច ប៊ុនហួរ រដ្ឋលេខាធិការក្រសួងកសិកម្ម មានប្រសាសន៍ថា នៅឆ្នាំនេះ គ្រាប់ស្វាយ​ចន្ទី​សើម នៅដើមរដូវប្រមូលផល មានតម្លៃរហូត ៦៥០០រៀល ក្នុងមួយគីឡូក្រាម និងមាន​តម្លៃ​ចន្លោះ ៤៨០០-៥២០០ រៀល ក្នុងមួយគីឡូក្រាម ទៅតាមតំបន់ និង​គុណ​​ភាព​គ្រាប់ បើ​ប្រៀប​​​ធៀបរយៈពេល៥ឆ្នាំ ចាប់ឆ្នាំ២០២១-២០២៥ គឺតម្លៃគ្រាប់ស្វាយ​ចន្ទី​ឆ្នាំ​​២០២៥​នេះ មាន​តម្លៃ​ខ្ពស់​​ជាងគេ ដោយសារមានទីផ្សារល្អ។

យោងតាមក្រសួងពាណិជ្ជកម្ម នៅឆមាសទី១ ឆ្នាំ ២០២៥ កម្ពុជារកចំណូលបានជាង ៧៥៣ លានដុល្លារ ពីការនាំ​ចេញ​គ្រាប់​ស្វាយ​ចន្ទីជិត ៦០ ម៉ឺន​តោន កើនឡើង ៥៦,៦៧ ភាគរយ ធៀបនឹង​រយៈ​ពេលដូចគ្នា កាលពីឆ្នាំ ២០២៤ ដែលមានទឹកប្រាក់ ៤៨០ លានដុល្លារ។ ប្រទេសវៀតណាមជាទីផ្សារស្វាយចន្ទីធំជាងគេរបស់កម្ពុជា។

នៅឆ្នាំ ២០២៤ កម្ពុជា​សម្រេច​​បានការ​ប្រមូលទិន្នផលគ្រាប់​ស្វាយ​ចន្ទី​ចំនួន ៨៥ ម៉ឺនតោន ក្នុង​នោះ​នាំចេញ​គ្រាប់ឆៅ​បាន​ចំនួន ៨១ ម៉ឺន ៥ ពាន់តោន កើន​ឡើង ២១% គិត​ជា​ទឹក​ប្រាក់​​ ១ ពាន់ ១៥០ លាន​ដុល្លារ កើន ២៦,១៥%។ ក្នុងនោះ​នាំចេញ​ទៅវៀត​ណាមចំនួន ៧៩ ម៉ឺន ៥ ពាន់​តោន។ នេះបើយោងតាមរបាយការណ៍សមាគមស្វាយចន្ទីកម្ពុជា៕

អត្ថបទ៖ ឡេង ដេត