​ថៃអនុម័ត​ផែនការនាំយកពលករស្រីលង្កា ១០ ០០០ នាក់ ដើម្បីទប់ទល់កង្វះកម្លាំងពលកម្ម

គណៈរដ្ឋមន្ត្រីថៃ​កាលពីថ្ងៃអង្គារ បានអនុម័ត​លើផែនការនាំយក​ពលករចំនួន ១០ ០០០ នាក់ ពីប្រទេសស្រីលង្កា ដើម្បីដោះស្រាយកង្វះខាតកម្លាំងពលកម្ម ក្រោយ​ពីពលករកម្ពុជាធ្វើមាតុភូមិនិវត្តន៍ទ្រង់ទ្រាយធំ ដោយសារតែ​កង្វល់សុវត្ថិភាព​ ជុំវិញជម្លោះព្រំដែនរវាងប្រទេសទាំង២។ ​

រដ្ឋមន្ត្រីក្រសួងការងារថៃ លោក Phongkawin Jangrungreongkit បាន​ឱ្យដឹង​ថា ក្រសួងរបស់លោកបានចុះហត្ថលេខាលើអនុស្សរណៈនៃការយោគយល់គ្នាជាមួយប្រទេសស្រីលង្កា ដើម្បីនាំយក​កម្មករ​ចំនួន ១០ ០០០ ក្នុងជំហានដំបូង ខណៈឥឡូវនេះមាន​មនុស្ស ៣០ ០០០ នាក់រួចហើយ ដែល​បាន​ចុះឈ្មោះ។

គួរគូសបញ្ជាក់ថា គិតត្រឹម​ខែសីហានេះ ពលករកម្ពុជានៅថៃប្រមាណជិត ១ លាន​នាក់ បាន​វិល​ត្រឡប់​មកស្រុកវិញ ដោយសារតែកង្វល់សុវត្ថិភាព ក្រោយមាន​សេចក្ដីរាយការណ៍ជាបន្តបន្ទាប់ពីការធ្វើបាបរូបរាងកាយពីពួកជ្រុលនិយមថៃ និងការរើសអើងនានាក្នុងប្រទេសថៃចំពោះពួកគេ។ នេះបើតាមក្រសួងការងារកម្ពុជា។

ការធ្វើមាតុភូមិនិវត្តន៍ទ្រង់ទ្រាយធំបែបនេះ បង្កជាកង្វះពលកម្មភ្លាមៗនៅក្នុងប្រទេសថៃ ដែលគ្របដណ្ដប់លើវិស័យផ្សេងៗ រាប់តាំងពីកសិកម្ម និងសំណង់ រហូតដល់រោងចក្រផលិតកម្ម។ ដើម្បីដោះស្រាយបញ្ហានេះ រដ្ឋាភិបាល​ថៃបាន​ប្ដេជ្ញានាំ​យក​ពលករពីប្រទេសដទៃ រួមទាំងស្រីលង្កា ហ្វីលីពីន ឥណ្ឌូណេស៊ី បង់ក្លាដែស ​នេប៉ាល់ ក៏ដូចបង្កើនពលករពីមីយ៉ាន់ម៉ា និងឡាវជាដើម។

យ៉ាងណាមិញ កន្លងមក អ្នកជំនាញក្នុងវិស័យការងារថៃបាន​លើកឡើងថា ការនាំយកពលករពីប្រទេសដទៃ ជាពិសេសពីស្រីលង្កានោះ អាច​នឹង​បង្កផលវិបាកផ្សេងៗ ​ដោយសារតែរបាំង​វប្បធម៌ ប្រពៃណី សាសនា ដែលពិបាកឱ្យ​ពួកគេសម្របខ្លួនទៅនឹង​សង្គមថៃ មិនដូចជាពលករកម្ពុជា ឡាវ ឬមីយ៉ាន់ម៉ា ដែល​មាន​ប្រពៃណី និងជំនាញស្រដៀងៗគ្នាជាពិសេសក្នុងវិស័យកសិកម្ម​ ដែលអាច​ឱ្យពួកគេ​សម្របខ្លួន​បាន​លឿន៕

​