ទីផ្សារស្រូវ-អង្ករ កម្ពុជាបានធ្លាក់ចុះ

ទីផ្សារអង្ករនៅលើពិភពលោកបានធ្លាក់ចុះយ៉ាងគំហុក ប្រមាណ ៤០% ដែលបានទម្លាក់​សម្ពាធដល់តម្លៃស្រូវនៅកម្ពុជាផងដែរ។

លោក លន់ យ៉េង អគ្គលេខាធិការ​សហព័ន្ធ​ស្រូវអង្ករ​កម្ពុជា បានបញ្ជាក់ឱ្យដឹងនៅថ្ងៃទី ២៦ ខែ​សីហា ឆ្នាំ ២០២៥ថា តម្លៃ​ស្រូវ-អង្ករ​នៅកម្ពុជា និងពិភពលោកបានធ្លាក់ចុះ ដោយសារកំ​ណើន​នៃ​ផលិតកម្មប្រទេសមួយចំនួន ដែលជាប្រទេសនាំចូល ដូចជា ហ្វីលីពីន ឥណ្ឌូនេស៊ីជាដើម ដោយ​​​សារអាកាសធាតុអំណោយផល ធ្វើឱ្យទិន្នផលនៃការដាំដុះរបស់ប្រទេសទាំងនោះកើនឡើង ខណៈប្រទេសហ្វីលីពីនផ្អាកការនាំចូលអង្ករចំនួន ៦០ ថ្ងៃ។

ហ្វីលីពីន ជាប្រទេសនាំចូលអង្ករធំមួយនៅលើពិភពលោក ដែលនាំចូលប្រមាណ ៤ លានតោន ដែលភាគច្រើនចេញពីប្រទេសអាស៊ីដូចជា វៀតណាម ថៃ កម្ពុជា និងភូមា។

លោក លន់ យ៉េង យល់ឃើញថា៖ «ការផ្អាកនាំចូលរបស់ហ្វីលីពីន ៦០ ថ្ងៃនេះ ធ្វើឱ្យ​អង្ករ​ប្រមាណ ១ លានតោន ចាល់នៅលើទីផ្សារ ដែលស្តុកប្រទេសអាស៊ីទាំង​អស់នេះ​ត្រូវ​ចាល់​ទាំងអស់​ ធ្វើឱ្យសម្ពាធនេះ ធ្លាក់ទៅដល់ការប្រមូលផលស្រូវ ដែលអង្ករអត់ទីផ្សារ ធ្វើឱ្យតម្លៃ​ស្រូវ​ក៏ធ្លាក់ចុះដែរ»។

លោក លន់ យ៉េង បញ្ជាក់ថា៖ «អង្ករប្រភេទដូចៗ គ្នាយើងធ្លាប់លក់បាន ៥៥០ ដុល្លារ ក្នុងមួយតោន ឥឡូវលក់បានតម្លៃ ធ្លាក់នៅ ៤០០ ឬ ៣៨៥ ដុល្លារ ក្នុងមួយតោន ដែល​ធ្លាក់ប្រមាណ ៤០%»។

ទោះយ៉ាងណា ទោះតម្លៃស្រូវធ្លាក់ចុះ ក៏រោងម៉ាស៊ីនកិនស្រូវក្នុងស្រុក នៅតែបន្តទិញតាមលទ្ធភាព ដើម្បីជួយកសិករ។

លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា តម្លៃស្រូវបានធ្លាក់​ចុះ ចាប់តាំងពីពាក់កណ្តាលខែកក្កដា ឆ្នាំ២០២៥ ដោយសារប្រទេសបញ្ជាទិញពីប្រទេសនាំចូលអង្ករស ស្របពេលដែលមានការប្រជែងទម្លាក់​ថ្លៃអង្ករ​យ៉ាងគំហុកពីសំណាក់ប្រទេសនាំចេញ ដែលបង្កឱ្យមានបញ្ហាជា​សកល​នៅលើទីផ្សារអង្ករអន្តរជាតិ។

លោក ឃឹម ហ្វីណង់ បញ្ជាក់ថា៖ «ដើម្បីជួយកាត់បន្ថយសម្ពាធលើថ្លៃស្រូវនៅតាមវាលស្រែ ក្រសួងកសិកម្មបានសហការជាមួយនឹងក្រសួងសេដ្ឋកិច្ច និងហិរញ្ញវត្ថុ ក្រសួងពាណិជ្ជកម្ម ធនាគារ ARDB អាជ្ញាធរថ្នាក់ក្រោមជាតិ និងសហព័ន្ធស្រូវអង្ករកម្ពុជា តាមរយៈការផ្ដល់​ប្រាក់កម្ចីពិសេសឱ្យរោងម៉ាស៊ីនដៃគូជួយទិញស្រូវសើមដល់វាល ព្រមទាំងបានដាក់ពង្រាយ​មន្ត្រីទាំងថ្នាក់ជាតិ និងថ្នាក់ក្រោមជាតិឱ្យជួយសម្របសម្រួលរកម្ចាស់រោងម៉ាស៊ីនទិញស្រូវ និងរករថយន្តដឹកឱ្យទាន់ពេលវេលា។

គោលដៅចម្បងនៃការអន្តរាគមន៍ទាំងនេះ គឺដើម្បីជួយស្តារថ្លៃស្រូវឱ្យបាន​កើនឡើងវិញមួយ​កម្រិត និងបញ្ចៀសការកក​ស្ទះការប្រមូលផលរបស់ប្រជាកសិករនៅតាមទីវាល។

នៅរដូវកាលក្រោយៗ ក្រសួងកំពុងជំរុញលើកទឹកចិត្តឱ្យប្រជាកសិករ​ងាកមកចូលរួមជា​មួយ​សហគមន៍កសិកម្មទំនើប ដើម្បីរាជរដ្ឋាភិបាលអាចមានលទ្ធភាពអាចជួយទ្រទ្រង់​ជាដើម​ទុន​ស្តារសមត្ថភាពផលិតកម្មឡើងវិញ តាម​រយៈ​ការផ្តល់កម្ចីការប្រាក់ទាប ការជួយកាត់​បន្ថយថ្លៃដើម និងការងាកមកចាប់យកការធ្វើកសិកម្មតាមកិច្ចសន្យា ដែលជាមធ្យោបាយ​ដ៏មានប្រសិទ្ធ​ភាពក្នុងការការពារកសិករពីបញ្ហាវិបត្តិថ្លៃដូចពេលបច្ចុប្បន្ន។

យោងតាមសហព័ន្ធស្រូវអង្ករកម្ពុជា​ (CRF) នៅក្នុងរយៈពេល៧ខែ នៃឆ្នាំ២០២៥ កម្ពុជាបាន​នាំចេញ​អង្ករបានចំនួន ៤២០ ៥៧២តោន​ ទៅកាន់គោលដៅ ៦៥ ប្រទេស គិតជាទឹកប្រាក់​បានចំនួន ៣០៩.៣២ លានដុល្លារសហរដ្ឋអាមេរិក។

កម្ពុជាក៏បាននាំចេញស្រូវចំនួន ៣ ៨៧៣ ០៧៨ តោនស្រូវសើម ដែលគិតជាទឹក​ប្រាក់​បានប្រមាណ ៩១៤.២១ លានដុល្លារ៕

អត្ថបទ៖ ឡេង ដេត