ថៃបន្តព្រួយបារម្ភពីបញ្ហាសេដ្ឋកិច្ច ដោយសារតែព្យុះនយោបាយក្នុងស្រុក

​បណ្ដាសេដ្ឋវិទូកំពូលៗរបស់ថៃ បាន​ព្រមានថា អស្ថិរភាពនយោបាយ​ក្នុងស្រុក​នាពេលបច្ចុប្បន្ន​ អាចរំខានដល់ការចំណាយរបស់រដ្ឋាភិបាល និងផែនការជំរុញសេដ្ឋកិច្ច ដែលរងនូវភាពលំបាកជាច្រើនរួច​ស្រាប់ហើយ។ នេះបើតាមការចុះផ្សាយរបស់កាសែត The Nation។

ការព្រមាននេះ ធ្វើឡើងក្រោយ​តុលាការធម្មនុញ្ញថៃសម្រេចដកតំណែងជានាយករដ្ឋមន្រ្តីថៃរបស់លោកស្រី ផែថងថាន ស៊ីណាវ៉ាត្រ ពាក់ព័ន្ធនឹង​ការបែកធ្លាយសារសម្លេងសន្ទនាជាមួយប្រធានព្រឹទ្ធសភា សម្ដេច ហ៊ុន សែន ជុំវិញភាពតានតឹងព្រំដែនរវាងប្រទេសទាំង២ ដែលធ្វើឱ្យ​​ថៃធ្លាក់ចូលទៅក្នុងវិបត្តិគ្មានមេដឹកនាំជាថ្មី។

​ក្រុមសេដ្ឋវិទូជឿជាក់ថា រដ្ឋាភិបាលថ្មី​ដែលបង្កើតឡើងនាពេលខាងមុខ ហើយអាច​​នឹង​មាន​រយៈពេលខ្លីផងនោះ នឹងមិនអាចអនុវត្តគោលនយោបាយសំខាន់ៗរបស់រដ្ឋាភិបាលប្រកបដោយប្រសិទ្ធភាពនោះទេ ដែល​ការណ៍នេះ នឹង​នាំទៅរកដំណាក់កាល «​ខ្វិននៃគោលនយោបាយ»។

ពួកគេបន្តថា ការប្រញាប់ប្រញាល់រំលាយសភា មុនពេល​សេដ្ឋកិច្ច​ងើបឡើងវិញស្រួលបួល អាចបង្កើនភាពស្រពិចស្រពិល ហើយ​បំផ្លាញទំនុកចិត្តរបស់វិនិយោគិន និងដាក់សម្ពាធលើទីផ្សារមូលធន។ យ៉ាងណាមិញ ក៏មាន​​សេដ្ឋ​វិទូមួយចំនួនជឿថា ផលប៉ះពាល់អវិជ្ជមានណាមួយនឹងមានកម្រិត ដោយសារថវិកាជាតិសម្រាប់ឆ្នាំ ២០២៦ ត្រូវបានអនុម័តដោយសភារួចហើយ។

ម្នាក់ក្នុងចំណោមសេដ្ឋវិទូទាំងនោះ គឺអនុប្រធានប្រតិបត្តិ និងជាប្រធានផ្នែកស្រាវជ្រាវនៅធនាគារ CIMB Thai លោក Amornthep Chawla ​បានកត់សម្គាល់ថា រដ្ឋាភិបាលបន្ទាប់ប្រឈមមុខនឹងកិច្ចការ «លំបាកខ្លាំង» ដោយទិន្នន័យសេដ្ឋកិច្ចថ្មីៗនេះ បង្ហាញពីការថយចុះនៃការប្រើប្រាស់ ការវិនិយោគ ទេសចរណ៍ និងពាណិជ្ជកម្មបរទេសបរទេសរួចស្រាប់ហើយ។ លោកបាន​​បញ្ជាក់​ថា វិស័យ​ឯកជន​ត្រូវ​ការ​គោល​នយោបាយ​ជាក់​លាក់​ដែល​អាច​កសាង​ទំនុក​ចិត្ត​បាន​យ៉ាង​ឆាប់​រហ័ស និង​ផ្តល់​លទ្ធផល​សេដ្ឋកិច្ច៕