​លោក Anutin គ្រោងដោះស្រាយបញ្ហាកំណើនតម្លៃប្រាក់បាតថៃ ដែលប៉ះពាល់ដល់ការនាំចេញ

នាយករដ្ឋមន្ត្រីថៃ​ លោក អានុទីន ឆានវីរ៉ាកុល (Anutin Charnvirakul) បាន​ថ្លែងនៅថ្ងៃចន្ទនេះថា ការឡើងថ្លៃនៃប្រាក់បាតថៃ ត្រូវតែដោះស្រាយជាបន្ទាន់ ចំពេលមាន​ការព្រួយបារម្ភថា និន្នាការនេះប៉ះពាល់ដល់ការនាំចេញរបស់ប្រទេស ដែលរងគ្រោះដោយហានិភ័យសកលផ្សេងៗរួចស្រាប់ទៅហើយ។

តាមការចុះផ្សាយរបស់ទីភ្នាក់ងារសារព័ត៌មានរ៉យទ័រ លោក អានុទីន​ បាន​​ឱ្យដឹងយ៉ាងដូច្នេះ បន្ទាប់​ពី​លោក​បាន​ប្រជុំ​ជាមួយ​សហព័ន្ធ​ឧស្សាហកម្ម​ថៃ ហើយ​ថា លោក​ក៏នឹង​សុំការអនុម័តពីព្រះមហាក្សត្រ សម្រាប់​គណៈរដ្ឋមន្ត្រីថ្មីរបស់ខ្លួន​នៅចុងសប្តាហ៍នេះ។

ប្រាក់បាតថៃ បានជួញដូរនៅតម្លៃ ៣១,៧៤ បាត/ដុល្លារ នៅម៉ោង ១ រសៀលថ្ងៃចន្ទនេះ ក្រោយ​ពីបាន​កើនឡើងដល់អត្រាខ្ពស់បំផុតក្នុងរយៈពេល ៤ ឆ្នាំកាលពីសប្ដាហ៍មុន ប្រមាណ ៣១,៥៧ បាត/ដុល្លារ។ ​

មែនទែនទៅ ប្រាក់បាតថៃ បានឡើងថ្លៃ ៧,៩ ភាគរយ តាំងពីដើមឆ្នាំមកទល់ពេលនេះ​ ដោយ​បង្កក្ដីបារម្ភពីភាគីពាក់ព័ន្ធរួមទាំងអ្នកនាំចេញ និងប្រតិបត្តិករទេសចរណ៍ ដែលជំរុញឱ្យរដ្ឋាភិបាលចាត់វិធានការបន្ទាន់ ដើម្បីដោះស្រាយបញ្ហានេះ។ ប្រាក់បាតរឹងមាំ មាន​ន័យថា ទំនិញ ឬសេវាកម្មថៃឡើងថ្លៃសម្រាប់អ្នកទិញ ឬអ្នកនាំចូល ដែលប្រើប្រាស់រូបិយប័ណ្ណរបស់ប្រទេសដទៃ។ ​

សហព័ន្ធឧស្សាហកម្មថៃ បាន​និយាយនៅថ្ងៃចន្ទនេះថា ​ប្រាក់បាត ៣៤-៣៥ បាត/ដុល្លារ អាចនឹង​សមស្របសម្រាប់សេដ្ឋកិច្ចថៃ ដែលគេរំពឹងថានឹងកើនឡើងចន្លោះ ១,៨-២,៣ ភាគរយ ឆ្នាំនេះ ដោយនឹង​ទាបជាងប្រទេសជាគូប្រជែងជាច្រើនក្នុងតំបន់។

នៅពេលនេះ ការដោះស្រាយបញ្ហាប្រាក់បាតឡើងថ្លៃ គឺអាស្រ័យលើចំណាត់ការរបស់រដ្ឋាភិបាលថៃថ្មីរបស់លោក អានុទីន ដែល​ប្រឈមមុខ​​សម្ពាធ​​សេដ្ឋកិច្ច ដែលគួប​ផ្សំទៅដោយបំណុលគ្រួសារខ្ពស់ ពន្ធគយអាមេរិក វិបត្តិទេសចរណ៍ និងកម្សោយតម្រូវការក្នុងស្រុកជាដើម។

លោក អានុទីន ដែល​បាន​ឈ្នះការបោះឆ្នោតសភាក្នុងខែនេះ ​មាន​ពេលកាន់អំណាចត្រឹមតែ ៤ ខែប៉ុណ្ណោះ មុនពេល​សម្រេចរៀបចំការបោះឆ្នោតថ្មី តាម​កិច្ចព្រមព្រៀងរវាងលោក​ និង​គណបក្សប្រជាជន ដែលជា​បក្សមានសម្លេងភាគច្រើនក្នុងសភា។

គណៈរដ្ឋមន្ត្រីថ្មីរបស់លោក អានុទីន ​រួមមាន​លោក Ekniti Nitithanprapas ជារដ្ឋមន្ត្រីក្រសួងហិរញ្ញវត្ថុ ​និងជាប្រធានរៀបចំគោលនយោបាយសេដ្ឋកិច្ច។ បើតាមរ៉យទ័រ លោក អានុទីន បាន​ឱ្យដឹងនៅថ្ងៃចន្ទនេះ ថា លោក​ Ekniti នឹងពិភាក្សាអំពី​កំណើនតម្លៃប្រាក់បាត ជាមួយសហព័ន្ធ​ឧស្សាហកម្ម​ថៃនៅរសៀលថ្ងៃចន្ទនេះ៕

​