ចានកាកអំពៅផលិតក្នុងស្រុក ហាក់មិនសូវមានតម្រូវការ ខណៈផលិតផលនាំចូលតម្លៃធូរថ្លៃជាង

លោក តាំង សុជាតិ ម្ចាស់សិប្បកម្មផលិតចានកាកអំពៅ បានឱ្យដឹងថា បច្ចុប្បន្នចានកាកអំពៅដែលផលិតដោយសិប្បកម្មរបស់លោក ហាក់ពុំសូវមានតម្រូវការ ខណៈផលិតផលនាំចូលពីប្រទេសជិតខាងមានតម្លៃធូរថ្លៃជាង។

ថ្លែងប្រាប់ កម្ពុជាថ្មី លោក តាំង សុជាតិ ស្ថាបនិកក្រុមហ៊ុន អិមជី ផេស៊ីហ្វិក បានលើកឡើងថា បច្ចុប្បន្នផលិតផលចានកាកអំពៅរបស់សិប្បកម្មរបស់លោកពុំសូវមានតម្រូវការច្រើននោះទេ ខណៈប្រជាជនខ្មែរមួយចំនួនចូលចិត្តប្រើប្រាស់របស់នាំចូលពីក្រៅប្រទេស នេះក៏ព្រោះតែតម្លៃក៏រៀងធូរថ្លៃជាងរបស់ដែលផលិតបានក្នុងស្រុកនោះដែរ។

លោកបានឱ្យដឹងទៀតថា ក្រៅពីតម្លៃ ផលិតផលចានកាកអំពៅក្នុងស្រុក ហាក់ពិបាកប្រកួតប្រជែងជាមួយរបស់នាំចូលត្រង់ថាផលិតផលនាំចូលពីប្រទេសជិតខាង ភាគច្រើនសុទ្ធតែការផលិតដោយម៉ាស៊ីនស្វ័យប្រវត្តិ និងជាផលិតផលដែលផលិតឡើងដោយឧស្សាហកម្មធំៗរបស់គេ ជាងនេះទៀតទាំងបរិមាណ និងស្ដង់ដា ការផលិតក្នុងស្រុកនៅមានកម្រិតទាប​ នៅឡើយ។

លោក តាំង សុជាតិ បញ្ជាក់ថា៖ «សម្រាប់សិប្បកម្មរ​បស់លោកមួយរយៈពេលដែលប្រជាជនខ្មែរពហិការទំនិញថៃ គឺភាគច្រើនមានតម្រូវការខាងក្រដាសអនាម័យបន្ទប់ទឹកច្រើនជាង ផលិតផលចានកាកអំពៅ ប្រហែលចន្លោះពី ៣០ភាគរយ ទៅ៤០ភាគរយ ក្នុងចុងឆ្នាំ២០២៥នេះ»។

យ៉ាងណាមិញ ម្ចាស់សិប្បកម្មរូបនេះ នៅតែស្នើសុំចិត្តប្រជាជនខ្មែរ សូមបន្តការគាំទ្រផលិតផលដែលផលិតបានក្នុងស្រុកឱ្យបានច្រើន ដើម្បីឱ្យសិប្បកម្មក្នុងស្រុកអាចវិវត្តខ្លួនទៅជាឧស្សាហកម្ម និងរោងចក្រធំៗ ដូចទៅនឹងបណ្ដាប្រទេសនៅលើសកលលោកបាន ផងដែរ។

ជាចក្ខុវិស័យទៅថ្ងៃអនាគត លោក តាំង សុជាតិ ក៏មានបំណងចង់បង្កើតសហគ្រាសធំមួយ ក្នុងការផលិតក្រដាសហុង និងក្រដាសអនាម័យ សម្រាប់ផ្គត់ផ្គង់តម្រូវការក្នុងស្រុក ពិសេសគឺកាត់បន្ថយការនាំចូល និងការចំណាយទៅលើវត្ថុធាតុដើម ដូចកាលពីមុនតទៀត ផងដែរ។

គួរឱ្យដឹងថា សិប្បកម្មផលិតចានកាកអំពៅ និងក្រដាសអនាម័យ របស់លោក តាំង សុជាតិ បានបើកដំណើរការតាំងពីឆ្នាំ២០១៥មកម្ល៉េះ។ បច្ចុប្បន្នសិប្បកម្មរបស់កូនខ្មែរមួយនេះ មានទីតាំងស្ថិតនៅ ខណ្ឌច្បារអំពៅ រាជធានីភ្នំពេញ៕

អត្ថបទ ៖​ សួស សិត