សេដ្ឋកិច្ច

ការដាំដុះដំណាំកសិកម្មនៅខេត្តឧត្តរមានជ័យ មានការកើនឡើងឆ្នាំនេះ

បានផុស

៧ ខែ មុន

នៅ

ថ្ងៃព្រហស្បតិ៍ ២៥ កញ្ញា ២០២៥

ដោយ

លោក សូត្រ ស៊ីសុខឃាង ប្រធានមន្ទីរកសិកម្មខេត្តឧត្តរមានជ័យ បានឱ្យ«កម្ពុជាថ្មី» ដឹងថា សម្រាប់នៅឧត្តរមានជ័យមកដល់ពេលបច្ចុប្បន្នស្ថានភាពដំណាំដាំដុះជារួម គឺមានការកើនឡើង ជាក់ស្តែង សម្រាប់ឆ្នាំ២០២៥ នេះ ស្រូវវស្សា ផ្ទៃដីដាំដុះបានកើនឡើងដល់ជាង ១៣ ម៉ឺនហិកតា។

ពាក់ព័ន្ធនិងការដាំដុះដំណាំកសិកម្មនៅក្នុងខេត្តនេះដែរ លោក សូត្រ ស៊ីសុខឃាង បានថ្លែងនៅថ្ងៃទី២៥ ខែកញ្ញានេះថា ដំណាំស្រូវកន្លងមកកសិករអាចធ្វើបានប្រមាណជាង ៩ ម៉ឺនហិកតាប៉ុណ្ណោះ ប៉ុន្តែសម្រាប់ឆ្នាំ២០២៥ នេះ ស្រូវវស្សា ផ្ទៃដីដាំដុះបានកើនឡើងដល់ជាង ១៣ ម៉ឺនហិកតា។ ក្នុងនោះ ដំណាំដំឡូងមី ក៏មានការកើនឡើងតិចតួចដូចគ្នាដែរ កន្លងមកកសិករដាំដុះលើផ្ទៃដីប្រមាណ ៧ ម៉ឺន ៦ ពាន់ហិកតា ប៉ុន្តែបច្ចុប្បន្ន គឺបានកើនឡើងដល់ជិត ៨ ម៉ឺនហិតា។

លោកប្រធានមន្ទីរក៏បានសង្កត់ធ្ងន់ថា ឆ្នាំនេះផ្ទៃដីដំណាំដាំដុះ គឺមានការកើនឡើងស្ទើរតែទាំងអស់ បើទោះបីជាមានបញ្ហាសង្គ្រាមកើតមានឡើងក៏ដោយ ព្រោះរយៈពេលនៃការកើតមានសង្គ្រាម កសិករគឺបានព្រួសស្រូវរួចរាល់អស់ហើយនៅកំឡុងខែកក្កដា ហើយនៅពេលដែលស្ថានការណ៍មានភាពស្ងប់ស្ងាត់ ចាប់ពីខែសីហា ដល់ខែកញ្ញា កសិករត្រឡប់មកថែទាំស្រូវឡើងវិញ ដូច្នេះមិនមានបញ្ហាប្រឈមនោះទេ។

«កសិករនៅខេត្តឧត្តរមានជ័យ ពលរដ្ឋរៀនរស់នៅក្នុងស្ថានភាពសង្គ្រាម ដោយមិនប្រលែងចោលនូវដំណាំស្រែចម្ការ។ ការបារម្ភពីសុវត្ថិភាពនៅតែគិត ប៉ុន្តែក៏មិនបោះចោលការងារដាំដុះ»។

លោកក៏បានបញ្ជាក់ដែរថា ជារួមបច្ចុប្បន្នការងារដាំដុះនៅក្នុងខេត្តមិនមានបញ្ហាប្រឈមអ្វីនោះទេ ប៉ុន្តែអ្វីដែលកសិករត្រូវគិតគូរ និងព្រួយបារម្ភគឺនៅរដូវប្រមូលផល ព្រោះនៅពេលដែលបិទព្រំដែនជាមួយប្រទេសជិតខាង ស្រូវដែលប្រមូលផលបានត្រូវនាំត្រង់ទៅកាន់រោងម៉ាស៊ីនទិញស្រូវក្នុងប្រទេស ហើយនាំចេញទៅកាន់ទីផ្សារប្រទេសវៀតណាម។

ក្នុងនោះ ជារួមសម្រាប់ផ្ទៃដី ៩ ម៉ឺនហិកតា គឺអាចប្រមូលផលបានប្រមាណ ២០ ម៉ឺនតោន ដូច្នេះប្រសិនបើមានការកើនឡើងនូវផ្ទៃដីដាំដុះ ទិន្នផលស្រូវក៏នឹងមានការកើនឡើងជាងមុនដូចគ្នា តាមរយៈបច្ចេកទេសកសិកម្មកាន់តែទំនើប កសិករយល់ពីការប្រើប្រាស់ជី និងបច្ចេកទេសនៅក្នុងការដាំដុះ ផលស្រូវក៏នឹងមានកើនឡើង ហើយបូកផ្សំនឹងពូជស្រូវថ្មីដែលក្រសួងកសិកម្មទម្លាក់ឱ្យ ដូចជាពូជស្រូវស្រងែថ្មី និងពូជសែនក្រអូប គឺទទួលបានទិន្នផលរហូតដល់ ៥ ទៅ ៦ តោន ដូចនេះហើយកសិករចាប់ផ្តើមផ្លាស់ប្តូរពូជប្រពៃណី ងាកមកដាំដុះពូជស្រូវដែលផ្តល់ទិន្នផលខ្ពស់ និងទទួលបានផលច្រើន។

លោក សូត្រ ស៊ីសុខឃាង បានបញ្ជាក់ថា ហេតុដូចនេះហើយ តទៅមុខទៀតនិន្នាការស្រូវនៅក្នុងខេត្តឧត្តរមានជ័យអាចនឹងមានការនៅសល់ច្រើន ដែលអាចធ្វើឱ្យតម្រូវការនៅក្នុងខេត្តមានការហូបចុកគ្រប់គ្រាន់ និងអាចនាំចេញបន្ថែមទៀត។ កត្តានេះ នឹងធ្វើឱ្យកសិករមានប្រាក់ចំណូលកើនឡើងជាងមុន ព្រោះកាលណាទិន្នផលយើងអាចធ្វើបានច្រើនជាងមុន ហើយផ្ទៃនៅតែដដែល នោះនឹងធ្វើឱ្យកសិករទទួលបានផលចំណេញ បើទោះបីជាបច្ចុប្បន្នតម្លៃស្រូវមានការធ្លាក់ចុះបន្តិចក្តីទីផ្សារអន្តរជាតិ ក៏ប៉ុន្តែមិនមែនធ្លាក់រហូតនោះទេ ដូច្នេះនៅពេលដែលទីផ្សារអន្តរជាតិ មានការកើនឡើង ស្រូវឡើងថ្លៃឡើងវិញ នោះកសិកររបស់យើងនឹងទទួលបានប្រាក់ចំណូលខ្ពស់។

ម្យ៉ាងវិញទៀត ភាគច្រើន កសិករនៅខេត្តឧត្តរមានជ័យគឺជាកសិករម្ចាស់ដី ដែលមិនជួលដីពីក្រុមហ៊ុន ឬក៏វិស័យឯកជនណាទេ ដូច្នេះគាត់នៅតែអាចទទួលបានប្រាក់ចំណេញនៅពេលដែលគាត់អាចធ្វើបានទិន្នផលស្រូវបានខ្ពស់ បូកផ្សំនិងការចំណាយថ្លៃដើមទាប ឬខ្ទង់ ១លានរៀលក្នុងមួយហិកតា ក៏កសិករនៅតែអាចទទួលបានផលចំណេញ៕

ដោយ៖ ឌិន ថារី