​កម្ពុជា​ជំរុញ​ឱ្យ​វៀតណាមសិក្សាលទ្ធភាពមក​បណ្ដាក់ទុន​

​លោក ​ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជាជា និងលោក NGUYEN Minh Vu ឯក​អគ្គរដ្ឋទូតវៀតណាមប្រចាំកម្ពុជា​ នៅថ្ងៃទី ០២ ខែតុលា ឆ្នាំ ២០២៥ បាន​ពិភាក្សាលើការពិនិត្យលទ្ធភាព ក្នុងការបង្កើតឱ្យមានយន្តការកិច្ចសន្ទនារវាងរដ្ឋ និងវិស័យឯកជន កម្ពុជា-វៀតណាម ដើម្បីរួមចំណែកក្នុងការកែលម្អបរិស្ថាន​ធុរកិច្ច សំដៅពង្រឹង ​និងពង្រីកវត្តមាន​របស់​សហគ្រាសវិនិយោគវៀតណាមឱ្យមកបណ្តាក់ទុនវិនិយោគនៅលើទឹកដីកម្ពុជា​​បន្ថែមទៀត។​

​លោក​ឧបនាយករដ្ឋមន្ត្រី ស៊ុន ចាន់ថុល​ នៅរសៀលថ្ងៃទី ០២ ​ខែកញ្ញា ​បានជួបពិភាក្សា​ការងារ​ជាមួយលោក ​NGUYEN Minh Vu ឯកអគ្គរដ្ឋទូតវៀតណាមប្រចាំកម្ពុជា។

ជាជំនួប​ពិភាក្សាលើកិច្ចសហប្រតិបត្តិការទ្វេរភាគី កម្ពុជា-វៀតណាម ពាក់ព័ន្ធនឹងវិស័យសេដ្ឋកិច្ច, ការវិនិយោគ, ការធ្វើពាណិជ្ជកម្ម, ការដឹកជញ្ជូនឆ្លងកាត់ព្រំដែន ព្រមទាំងពិភាក្សាផង​ដែរអំពី​បច្ចុប្បន្នភាព​នៃស្ថានភាពសកលលោកកំពុងស្ថិតក្នុងបរិការណ៍ដែលមានការប្រែប្រួល ហើយ​ទាម​ទារឱ្យមានការត្រៀមលក្ខណៈឱ្យបានគ្រប់ជ្រុងជ្រោយ និងមានភាពបត់​បែនខ្ពស់។

​ឯកអគ្គរដ្ឋទូត បានស្ញើចសសើរចំពោះក្រុមប្រឹក្សាអភិវឌ្ឍន៍កម្ពុជា ជុំវិញការបំបែកកំណត់ត្រាការអនុម័តចំនួនគម្រោង​វិនិយោគក្នុងឆ្នាំ២០២៤ និងការឈានទៅបំបែកកំណត់ត្រាសារជាថ្មីម្តងទៀតក្នុងឆ្នាំ២០២៥ ដែលលទ្ធផលនេះបានបង្ហាញឱ្យឃើញពីការយកចិត្តទុកដាក់ខ្ពស់ ក្នុងការលើកកម្ពស់បរិយាកាសវិនិយោគនៅកម្ពុជា ឱ្យកាន់តែមានភាពអំណោយផល និងជាទីទុកចិត្តសម្រាប់ការវិនិយោគដោយផ្ទាល់ពីបរទេស។

លោកឧបនាយករដ្ឋមន្ត្រីរំពឹងថា ឯកអគ្គរដ្ឋទូត នឹងរួមចំណែកយ៉ាងសកម្មក្នុង​ការជំរុញ​បន្ថែម​ទៀត​នូវទំនាក់ទំនងដ៏ស្អិតរមួត ភូមិផងរបងតែមួយ ឱ្យកាន់តែមានភាពល្អប្រសើរឡើង និង​ហុច​ផល​ប្រយោជន៍​ទៅវិញទៅមក។ ​

​លោកឧបនាយករដ្ឋមន្ត្រី បានបន្ថែមថា ក្រុមប្រឹក្សាអភិវឌ្ឍន៍កម្ពុជា ដែលជាសេនាធិការ​ច្រកចេញ​ចូលតែមួយរបស់រាជរដ្ឋាភិបាល បានត្រៀមលក្ខណៈរួចរាល់ជានិច្ច ក្នុងការសម្របសម្រួល​រាល់គ្រប់​កិច្ចការងារវិនិយោគរបស់វិស័យឯកជនពីគ្រប់បណ្តាប្រទេសជាមិត្ត សំដៅធានាបាននូវបរិយាកាស​វិនិយោគ ប្រកបដោយភាពបត់បែន អំណោយផល និងអនុ​គ្រោះ​បំផុតជូនដល់វិនិយោគិន៕