បទអត្ថាធិប្បាយ៖ ហេតុអ្វីបានជាគេមើលឃើញថា ការគន់គូរ​ហាក់ដូចជាត្រឹមត្រូវ?

ជាធម្មតា ​ការទាយ ឬការគន់គូរ គឺជាការស្មាន ដែលពេលខ្លះ ក៏អាចមានភាពត្រឹមត្រូវតិចតួចក្នុងករណីមួយចំនួនដោយចៃដន្យដែរ។ ប៉ុន្តែ មូលហេតុដែល​សំខាន់នោះ គឺដោយសារតែអ្នកដែលទៅរកគ្រូទាយ ឬទៅឱ្យហោរគន់គូរអំពីវាសនា​របស់ខ្លួនស្ទើរតែទាំងអស់ គឺជាអ្នកដែល​ជឿលើការទាយ ឬហោរាសាស្ត្រ ឬជឿលើហោរដោយឥសង្ស័យ។ ដូច្នេះហើយ បើទោះបីជាហោរនោះទាយថាដូចម្ដេចចំពោះពួកគេក៏ដោយ ក៏ពួកគេនៅតែយល់ថា ការទាយនោះ ត្រឹម​ត្រូវដែរ។

លើសពីនេះទៀត  មនុស្សម្នាក់ៗ មានរឿងរ៉ាវនៃដំណើរជីវិតច្រើនណាស់​ដែលបានកើតឡើង​ក្នុងអតីតកាល ពេលខ្លះ សូម្បីតែ​សាមីខ្លូន ក៏មិនចាំអស់ដែរ។ ហេតុនេះ បើពួកគេជឿការទាយ ឬហោរាសាស្ត្រ បើទោះបីជាហោរនោះ ទាយថាយ៉ាងម៉េចអំពីដំណើរជីវិតក្នុងអតីតកាលរបស់ពួកគេក៏ដោយ ក៏ពួកគេមើលឃើញថា ជាការត្រឹមត្រូវដែរ។

នៅក្នុងអនាគតរបស់មនុស្ស​ម្នាក់ៗវិញ ក៏នឹងមានរឿងរ៉ាវជាច្រើននៃដំណើរ​ជីវិតនឹងកើតឡើងដែរ ទាំងល្អ ទាំងមិនល្អ ដូច្នោះហើយ ទោះបីជាហោរនោះ ទាយថាយ៉ាងណាក៏ដោយ ក៏គេមើល​ឃើញថា ការទាយនោះអាចនឹងត្រឹមត្រូវដែរ។ ក្នុងករណីជាច្រើនទៀត អ្នកដែលជឿដោយឥត​សង្ស័យលើការទាយ ឬហោរាសាស្ត្រនេះ ក្រោយពីបានទទួលការគន់គូររួចហើយ ពួកគេតែងតែខិតខំធ្វើតាមផ្លូវ គន្លង ឬគំនិត​ដែលហោរ​បាននិយាយ ឬគូសវាសឱ្យ ឬក៏ខិតខំធ្វើឱ្យសម្រេចបានតាមអត្ថន័យនៃការទាយរបស់ហោរនោះ ហើយទីបំផុត ពួកគេបែរជាផ្ដល់គុណសម្បត្តិ ឬតម្លៃទៅឱ្យ​ហោរ ឬហោរាសាស្ត្រនោះទៅវិញ ដោយមិនបានគិតថា សមិទ្ធផលនោះកើតចេញពីការខិតខំប្រឹងប្រែងរបស់ខ្លួនទេ​។ ​ ​ 

ចំពោះការទាយអំពីរឿងរ៉ាវបច្ចុប្បន្នកាលរបស់អ្នកទទួលសេវាទស្សន៍ទាយវិញ ជាទូទៅ​ ហោរទាយទៅតាមអាការ: ទឹកមុខ អារម្មណ៍ ពាក្យសម្ដី ឬផ្នែកខ្លះៗនៃ​អង្គ​ហេតុ​ ដែលអ្នកមករកគ្រូទាយនោះ ​បានរ៉ាយរ៉ាប់ប្រាប់គ្រូទាយពេលដែលពួកគេបានមកជួបគ្រូទាយ​នៅពេលដំបូង។ ចំណែឯគ្រូទាយវិញ គ្រាន់តែទាយ ឬគន់គូរតាមក្បួនបុរាណ  បទពិសោធន៍ និងបូកផ្សំ​ជាមួយអ្វី​ដែលគាត់បានសង្កេត និងយល់ឃើញទៅតាមអ្វី​ដែលអ្នកមកទទួលសេវាទស្សន៍ទាយនោះ​ បានប្រាប់ និងសម្ដែងចេញឱ្យ​ឃើញ​តែប៉ុណ្ណោះ។ ទោះ​បីជា​យ៉ាងនេះក៏ដោយ ក៏អ្នកទទួលសេវា​ទស្សន៍ទាយនៅតែយល់ថា គ្រូទាយ ឬហោរនោះ​ ទាយ ឬគន់គូរ ត្រូវ ឬឆុតដែរ។

ជីវិតរបស់មនុស្សម្នាក់ៗមានតម្លៃណាស់ យើងមិនគួរប្រថុយយកទៅផ្ញើ​លើ​ការទាយរបស់ហោរ ឬគ្រូទាយ​ដែលគ្មានមូលដ្ឋានច្បាស់​លាស់​នោះទេ។  ទោះបីជា​មាន​អ្នកខ្លះ ជឿថា ពួកគេទទួលបានជោគជ័យ​ដោយសារ​ហោរាសាស្ត្រក៏ដោយ ក៏នោះ​ គឺគ្រាន់តែជារឿងចៃដន្យតែប៉ុណ្ណោះ។ មិនតែប៉ុណ្ណោះ បច្ចុប្បន្ននេះ មានមនុស្ស​មួយចំនួន បានទទួលរងគ្រោះ និងចាញ់បោកគ្រូទាយ ឬគ្រូសិល្ប៍មួយចំនួនដែលនាំទៅដល់ការរំលោភផ្លូវភេទ អស់ទាំងទ្រព្យសម្បត្តិ ខូចទាំងកេរ្ដិ៍ឈ្មោះ និងកិត្តិយស ជាដើម៕

ដោយ៖ បណ្ឌិត ឈត ប៊ុនថង អ្នកជំនាញទស្សនវិជ្ជា